မြန်မာပြည်ရှိ အမေရိကန်အကူညီ USAID ဖြင့် လည်ပတ်နေသော စီမံကိန်းများအားလုံးဖျက်သိမ်းခံရ

ဧရာဝတီတိုင်းမ်
ဖေဖော်ဝါရီ ၂၈ ရက်

မြန်မာပြည်ရှိ အမေရိကန်နိုင်ငံတကာ ဖွံ့ဖြိုးရေး အေဂျင်စီ (USAID) ဖြင့်လည်ပတ်နေသောစီမံကိန်းများ အားလုံးဖျက်သိမ်းရန်အတွက် သက်ဆိုင်ရာအဖွဲ့အစည်းများထံ ယမန်နေ့က တရားဝင်အကြောင်းကြားစာပေးပို့ကြောင်း သတင်းရရှိသည်။

ယခုနှစ်စတွင် အမေရိကန်သမ္မတအသစ် ဒေါ်နယ်ထရမ့်တက်လာပြီးနောက် အမေရိကန်နိုင်ငံတကာ ဖွံ့ဖြိုးရေး အေဂျင်စီ (USAID) မှ နိုင်ငံတကာထံကူညီထောက်ပံ့မှုအားလုံးကို ရက် ၉၀ ရပ်ဆိုင်းထားရန်အမိန့်ထုတ်ပြီးနောက် ယခုအခါ မြန်မာနိုင်ငံရှိစီမံကိန်းများအားလုံးတရားဝင်ရပ်ဆိုင်းလိုက်ခြင်းဖြစ်သည်။

မြန်မာပြည်တွင်းအပါဝင် မြန်မာ – ထိုင်းနယ်စပ်တွင် USAID အကူအညီဖြင့်လည်ပတ်နေသည့် လူသားချင်းစာနာ ထောက်ထားမှုအကူအညီများ၊ ကျန်းမာရေးစောင့်ရှောက်မှုအဖွဲ့အစည်းများ၊ လူ့အခွင့်ရေးလှုပ်ရှားမှုနှင့် လူမှုအဖွဲ့အစည်းများအပါဝင် မီဒီယာထောက်ပံ့ရေးလုပ်ငန်းများရပ်ဆိုင်းသွားပြီဖြစ်ကြောင်းသိရသည်။

“ USAID ရပ်တော့ထိတယ်။ အဖွဲ့အစည်းမှာလူတော့မလျှောသေးဘဲ ထောင့်ခံနေတယ်။ ဒါပေမဲ့လစာတော့ လျှော့မှာ။ အခုလည်ပတ်နေတာက အရင်ရပြီးသားကျန်တာတွေ။ လောလောဆယ်အသစ်တွေရှာတုန်းပေါ့။ စိတ်ပူရတာပေါ့။ ခြိုးခြံချွေတာရတယ် “ ဟု ထိုင်းနိုင်ငံရောက် NGO ဝန်ထမ်းတစ်ဦးက ဧရာဝတီတိုင်းမ်ကို ပြောသည်။

လက်ရှိအဖွဲ့အစည်းများအနေဖြင့် အခြားကူညီထောက်ပံ့ပေးနေသောနိုင်ငံများဖြစ်သည့် ကနေဒါ၊ ဂျပန်၊ ဆွစ်ဇာလန် ၊ ဂျာမဏီ၊ ထိုင်ဝမ်အပါအဝင် အခြားနိုင်ငံများထံကူညီပေးနိုင်ရန်တောင်းဆိုသင့်ကြောင်း သုတေသနပညာရှင် အမျိုးသားတစ်ဦးက သုံးသပ်ပြောကြားသည်။

ထို့ပြင် USAID မှ မြန်မာနိုင်ငံရှိ လူ့အခွင့်အရေးကာကွယ်ရေးစီမံကိန်း၊ ဒီမိုကရေစီမြှင့်တင်ရေးလုပ်ငန်း၊ လွတ်လပ်သောမီဒီယာများပံ့ပို့ရေးအပါအဝင် တီဘီ နှင့် HIV စီမံကိန်းများတွင် ကူညီရန်ကတိကဝတ်ပြု ထားသည့်ရန်ပုံငွေ ကန်ဒေါ်လာ သန်း ၁၅၀ ဝန်းကျင်ရှိကြောင်း Human Rights Myanmar က ထုတ်ပြန်ထားသည်။

လွန်ခဲ့သည့်ဘဏ္ဍာရေးနှစ်အတွင်း မြန်မာနိုင်ငံအတွင်းမှ ထိခိုက်လွယ်ပြည်သူများအတွက် အမေရိကန်ပြည်ထောင်စုကပေးအပ်သည့် လူသားချင်းစာနာမှုအကူအညီပေးအပ်မှုစုစုပေါင်းပမာဏကို ဒေါ်လာ ၁၄၁ သန်းအထိရှိကြောင်း မြန်မာနိုင်ငံဆိုင်ရာအမေရိကန်သံရုံးထုတ်ပြန်ချက်အရသိရသည်။

ဓာတ်ပုံ – NGO , လူမှုကွန်ရက်
#USAID #အကူညီများ #တရားဝင်ရပ်ဆိုင်း
#လူသားချင်းစာနာထောက်ထားမှုကူညီများရပ်ဆိုင်းခံရ
#Ayeyarwaddy_Times