ဧရာဝတီတိုင်းမ်
ဖေဖော်ဝါရီ ၂၇ ရက်
ရခိုင်ပြည်နယ်၊ ကျောက်ဖြူမြို့နယ်ရှိ ဓညဝတီရေ တပ်ဌာနချုပ်ကို အာရက္ခတပ်တော် AA က ထိုးစစ်ဆင် တိုက်ခိုက်နေပြီး တိုက်ပွဲအပြင်းအထန်ဖြစ်ပွါးနေကြောင်း သိရသည်။
စီမော်ကျေးရွာရှိ ရေတပ်ဌာနချုပ်၏ ကာကင်းများကို AA ကထိုးစစ်ဆင်တိုက်ခိုက်နေရာ ကာကင်းစခန်းအတွင်းရှိ စစ်ကောင်စီတပ်ဖွဲ့ဝင် ၁၀ ဦးကျော်ကို AA က ယနေ့ ဖေဖော်ဝါရီ ၂၇ ရက်နေ့တွင် ဖမ်းဆီးရမိခဲ့ကြောင်း သိရသည်။
“ရေတပ်ဌာနချုပ်ကို အဓိကထားထိုးစစ်ဆင်နေတာ။ အခုက ကာကင်းစခန်းတွေကို အရင်ဖြုတ်တဲ့သဘောပဲ။ စစ်တပ်ဘက်က သေတဲ့သူတွေများတယ်။ အရှင် ဖမ်းဆီးရမိတဲ့သူတွေလည်းရှိတယ်”ဟု ကျောက်ဖြူ ဒေသခံတစ်ဦးက ဧရာဝတီတိုင်းမ်ကို ပြောသည်။
ရေတပ်ဌာနချုပ် တိုက်ခိုက်ခံနေရချိန်တွင် စစ်ကောင်စီက ကြည်း၊ရေ၊လေမှ အပြင်းအထန်ခုခံနေပြီး ရေ တပ်မှ တိုက်ရေယာဉ် တစ်စီးထက်မနည်းရောက်ရှိနေပြီး လက်နက်ကြီးများဖြင့် ပစ်ခတ်နေကြောင်း သိရသည်။
ယမန်နေ့ ဖေဖော်ဝါရီ ၂၆ ရက်နေ့ နေ့လည်ပိုင်းက ဂျက်ဖိုက်တာ နှစ်စီးဖြင့် တိုက်ပွဲဖြစ်ပွားရာ ဦးကင်း၊ စီမော်၊ ကြပ်တ္တိန်ကျေးရွာဝန်းကျင်ကို ပေါင် ၅၀၀ ဗုံးများဖြင့် ကြဲချတိုက်ခိုက်ခဲ့ကြောင်း သိရသည်။
ယနေ့တွင် စီမော်ကျေးရွာရှိ ဓညဝတီရေတပ်ဌာနချုပ် ၏ ကာကင်းစခန်း၌တိုက်ပွဲပြင်းထန်နေခဲ့ပြီး အမှတ် ၃၂ ရဲတပ်ရင်းကိုလည်း AA က တပြိုင်နက်ထိုးစစ် ဆင်တိုက်ခိုက်နေကြောင်း သိရသည်။
ဓာတ်ပုံ- ဓညဝတီရေတပ်ဌာနချုပ် (ပုံဟောင်း)
#ရခိုင် #ကျောက်ဖြူ #ဓညဝတီရေတပ် #AA #တိုက် ခိုက် #စစ်ကောင်စီတပ်သား #ဖမ်းမိ
#Ayeyarwaddy_Times
