ဧရာဝတီတိုင်းမ်
ဖေဖော်ဝါရီ ၆ ရက်
ဂွ-ငါးသိုင်းချောင်းတိုက်ပွဲတွင် ထွက်ပြေးသည့် ခလရ ၁၁ ၏ တပ်ရင်းမှူးဖြစ်သူကို သာပေါင်းမြို့နယ် အထက်ခြမ်း ခွေးကုပ်ရွာအုပ်စု အနန်းကုန်းသို့ ပို့လွှတ်တာဝန်ပေးထားကြောင်း သိရသည်။
ခလရ ၁၁ တပ်ရင်းမှူးသည် ပြီးခဲ့သည့် ဖေဖော်ဝါရီ ၄ ရက်နေ့ နံနက် ၁၁ နာရီခန့်တွင် စစ်ကောင်စီတပ်ဖွဲ့ဝင် အင်အား ၄၀ ခန့်ပါဝင်သည့် စစ်သုံးဖောကားတစ်စီး နှင့် အတူ ဆိုင်ကယ် သုံးစီး၊ စစ်ကောင်စီတပ်သား ခြောက်ဦးတို့ဖြင့် အနန်းကုန်းရွာဘုန်းကြီးကျောင်းသို့ ရောက်ရှိလာပြီး ညနေပိုင်းတွင် နောက်ထပ် အင်အား ၅၀ ခန့် ထပ်မံရောက်ရှိလာ၍ ဦးစီးကွပ်ကဲနေကြောင်း သိရသည်။
“ခွေးကုပ်အုပ်စုက ကြံ့ဖွံသိန်းထွန်းအပိုင်၊ အနန်းကုန်းကျေးရွာထဲကို အင်အား ၁၀၀ လောက်လာပြီး အထိုင်ချတယ်။ ပြီးတော့ NLD ပါတီဝင်တွေကိုလည်း မပြတ်စောင့်ကြည့်နေဖို့ တိုင်းအဆင့်ညွှန်ကြား ထားတာတွေလည်းရှိတယ်”ဟု သာပေါင်းဒေသခံတစ်ဦးက ဧရာဝတီတိုင်းမ်ကို ပြောသည်။
ကျားခေါင်းရွာရှိ စစ်ကောင်စီတပ်စခန်းအသိမ်းခံရပြီးနောက် အဆိုပါစခန်းမှ ထွက်ပြေးလာသည့် စစ်ကောင်စီတပ်ဖွဲ့ဝင် အချို့ကိုပါ အနန်းကုန်းကျေးရွာသို့ ပို့ဆောင်ထားခြင်းဖြစ်ပြီး ကျေးရွာအတွင်းမှ ဒေသခံများကိုလည်း ညနေ ၆ နာရီနောက်ပိုင်း အပြင်မထွက်ရဟု နှုတ်မိန့်ဖြင့်ညွှန်ကြားထားကြောင်း သိရသည်။
စစ်ကောင်စီက တိုက်ပွဲနှင့်နီးကပ်နေသည့် သစ်ဝမ်းပူ၊ သစ်ဆင်၊ သာပေါင်းလေး၊ သဲဖြူစသည့် ကျေးရွာများမှ ဒေသခံများကို နေအိမ်များသော့ခတ်ပိတ်ထားခြင်းများမပြုလုပ်ရန် မှာကြားထားပြီး သော့ခတ်ပိတ်ထားသည့် နေအိမ်များကို သော့ရိုက်ချိုးကာ အိမ်အတွင်းဝင်ရောက်ပြီး တန်ဖိုးရှိ ပစ္စည်းများယူဆောင်နေကြောင်း သိရသည်။
ကျားခေါင်းရွာစခန်းမှ ထွက်ပြေးလာသည့် စစ်ကောင်စီတပ်ဖွဲ့များသည် သစ်ဝမ်းပူနှင့် သစ်ဆင်ဘက်သို့ ဆင်းလာကြပြီး ခြေကုပ်ယူထားကြောင်း သိရသည်။
လက်ရှိတွင် ကျားခေါင်း၊ သစ်ဝမ်းပူ၊ သာပေါင်းလေး၊ သစ်ဆင်၊ သဲဖြူစသည့် ကျေးရွာများမှ ဒေသခံများမှာ ဘောမိချောင်းတောင်ဘက်ခြမ်းရှိ ပြာတိုက်၊ အိုးလှုပ်၊ ကျွန်းလျားကြီး၊ ကန်ချောင်း၊ မရမ်းကျင်းနှင့် သစ်ထုတ်လုပ်ရေး သစ်ကွင်းဟောင်းနေရာဖြစ်သည့် ဂါယာကွင်းတို့တွင် ရှောင်တိမ်းနေထိုင်နေရကြောင်း သိရသည်။
ဓာတ်ပုံ-အင်တာနက်(ပုံဟောင်း)
#ဧရာဝတီတိုင်း #သာပေါင်း #ခလရ၁၁တိုင်းမှူး #ထွက်ပြေး #တိုက်ပွဲဝေးရာ #နေရာချထားရ #Ayeyarwaddy_Times
