ဧရာဝတီတိုင်းမ်
ဖေဖော်ဝါရီ ၆ ရက်
AA ၏ထိုးစစ်မှာ သာပေါင်းမြို့နယ်အတွင်းထိ ရောက်ရှိလာပြီး ထိုးစစ်အရှိန်မြှင့်တင်လာသည့်အတွက် အင်အားလိုအပ်ချက်အရ သာပေါင်းစက္ကူစက်ရုံမှ ဝန်ထမ်းများကိုပါ စစ်သင်တန်းပေးနေကြောင်း သတင်းရရှိသည်။
အခြေခံစစ်ပညာသင်တန်းကို စက္ကူစက်ရုံမှ ဝန်ထမ်းများဖြင့် ပြည်သူ့စစ်အရေးပေါ်ဖွဲ့စည်းပြီး ဖေဖေါ်ဝါရီ ၃ ရက်နေ့တွင် ခလရ ၃၀၈ မှစစ်သင်တန်းလာရောက်ပေးနေကြောင်း သိရ သည်။
“စက်ရုံကာကွယ်ရေးအတွက်ဆိုပြီး စစ်သင်တန်းလာပေးတာ မလုပ်တော့မလုပ်ချင်ဘူးပေါ့။ ဒါပေမဲ့ ကုမ္ပဏီဝန်ထမ်းဆိုတော့ သူတို့ခိုင်းတာလုပ်နေရတာပဲ။ တကယ်လာတိုက်ရင် ဝါရင့်စစ်သားတွေတောင်ပြေးနေကြတာ။ ကျုပ်တို့လည်း မဟန်ရင်တော့ အသေမခံဘူး လွတ်အောင်တော့ပြေးရမှာပဲ။ ခက်တာက စက်ရုံလုံခြုံရေးဆိုပြီး ရှေ့တန်းပို့မှာစိုးရိမ်နေကြတယ်”ဟု စက္ကူစက်ရုံမှ ဝန်ထမ်းတစ်ဦးက ဧရာဝတီတိုင်းမ်ကို ပြောသည်။
ယနေ့ ဖေဖော်ဝါရီ ၆ ရက်နေ့ နေ့လည်ပိုင်းအထိ ကျားခေါင်း၊ သစ်ဝမ်းပူ၊ သာပေါင်းလေးဒေသတို့တွင် တိုက်ပွဲများပြင်းထန်နေပြီး သာပေါင်းမြို့နယ် ခွေးကုပ်အုပ်စု၊ အနန်းကုန်းရွာ ဘုန်းကြီးကျောင်းတွင်လည်း စစ်ကောင်စီအင်အား ၁၀၀ ခန့် အထိုင်ချနေရာ ယူနေကြောင်း သိရသည်။
သာပေါင်းမြို့နယ်အတွင်း AA နှင့်ပူးပေါင်းတပ်ဖွဲ့များ ဝင်ရောက်လာခြင်းမရှိစေရေးအတွက် ဘုရားကုန်းရှိ ရဲများမှ လက်ခုပ်၊ ခေနန်၊ သရက်ကုန်းနှင့် မရမ်းချိုကျေးရွာ အုပ်စုများဘက်သို့ ဆိုင်ကယ်များဖြင့် ကင်းလှည့်နေကြောင်း သိရသည်။
သာပေါင်းမြို့နယ်အတွင်းရှိ ကျားခေါင်းစခန်းသိမ်းခံရပြီးနောက် သဲဖြူကျေးရွာသို့ စစ်ကောင်စီတပ်အားလုံးတပ်ဆုတ်ပြီး ခံစစ်ပြင်နေရကြောင်း သိရသည်။
လက်ရှိတွင် သဲဖြူရှေ့ သုံးဖာလုံခန့်အကွာ ကင်ပွန်းချဉ်တောင်တွင် တိုက်ပွဲပြင်းထန်နေပြီး လက်နက်ကြီးများဖြင့် ပစ်ခတ်လျက်ရှိကြောင်း သိရသည်။
#ဧရာဝတီတိုင်း #သာပေါင်း #စက္ကူစက်ရုံ #ဝန်ထမ်း #စစ်ကောင်စီ #စစ်သင်တန်းပေး #Ayeyarwaddy_Times
