ဂွ- ငသိုင်းချောင်းတွင် စစ်ကောင်စီတပ်ဖွဲ့ဝင် ၆၀ကျော်ဒဏ်ရာရရှိကာ အင်အား ၂၀ခန့် ဖြင့် ခုခံနေရ
ဧရာဝတီတိုင်းမ်
ဖေဖော်ဝါရီ ၂ရက်
ရွှေသောင်ယံမှ တပ်ဆုတ်ပြေးလာသည့် စစ်ကောင်စီတပ်ဖွဲ့ဝင်များကို တိုက်ပွဲရှိနေသည့် ဂွ- ငါးသိုင်းချောင်းဘက်ပို့ဆောင်၍ တပ်ရင်းမှူးနှင့် ဒုတပ်ရင်းမှူးတို့ ထွက်ပြေးသွားကြောင်း သိရသည်။
စစ်ကောင်စီသည် ရွှေသောင်ယံရှိ ခလရ ၁၁ မှ စစ်ကောင်စီတပ်ဖွဲ့ဝင်များ ထွက်ပြေးမှုများနေခြင်း ကြောင့် ပြန်လည်ခေါ်ယူ၍ ဂွ- ငသိုင်းချောင်းလမ်းဘက်သို့ပို့ဆောင်ရာ စစ်ကောင်စီတပ်ဖွဲ့ဝင် ၆၀ ခန့် ထိခိုက် သေဆုံးမှုများရှိနေပြီး အင်အား ၂၀ ခန့်ဖြင့် ခုခံနေရသည့်အတွက် စိတ်ဓာတ်ကျဆင်းကာ တပ်ရင်းမှူးနှင့် ဒုတပ်ရင်းမှူးတို့ပါ ထွက်ပြေးကြောင်း သိရသည်။
စစ်ကောင်စီသည် ထိုသို့ ထွက်ပြေးသွားသည့် တပ်ရင်းမှူးနှင့် ဒုတပ်ရင်းမှူးတို့၏ မိသားစုဝင်များကို ဖမ်းဆီးအကျပ်ကိုင်သဖြင့် ပြန်လာရပြီး နောက်တန်းတပ်ရင်းတွင်ကွပ်ကဲနေရကြောင်း သိရသည်။
“ဝါးယားချောင်း ခလရ ၁၁က စိတ်ဓာတ်ကျနေကြတာ။ လူမရှိဘူးလေ။ ခလရ ၃၀၈ ကလည်း ဝါးယားချောင်းနဲ့ ကဇင်းတော အတိုက်ခံရရင် သူလည်းလူအင်အားမရှိဘဲ ခုခံရမှာ” ဟု သာပေါင်းဒေသ ခံတစ်ဦးကဧရာဝတီတိုင်းမ်ကိုပြောသည်။
သာပေါင်းမြို့အတွင်းရှိ စစ်ကောင်စီတပ်များ ဝင်တိုက်ခိုက်ခံရမည်ကို စစ်ကောင်စီက စိုးရိမ်နေရပြီး သာပေါင်း- ရေနံ့သာလမ်းပေါ်ရှိ သစ်တောစိုက်ခင်းရုံးတွင် အင်အားအချို့ သုံး၍ ကာကင်းစခန်းများ ပြုလုပ်ထားကြောင်း သိရသည်။
ထို့အပြင်ကြက်သွန်ကွင်း လမ်းဆုံဂိတ်တွင်လည်း လှံစွပ်တပ်ခြံစည်းရိုးများကာထားပြီး ကတုတ်ကျင်း များတူးကာ ခံစစ်ပြင်ဆင်နေကြောင်း သိရသည်။
သာပေါင်းမြို့နယ်အတွင်းရှိ ဒေသခံများမှာ စစ်ရောက်ရှိလာမည်ကို စိုးရိမ်၍ စစ်ရှောင်လိုသော်လည်း စစ်ရှောင်ပါက မြို့နယ်ထွေအုပ်ရုံးအမိန့်ဖြင့် စစ်ရှောင်အိမ်များကို ချိတ်ပိတ်မည်ဟု ပြောဆို ထားသည့်အတွက် စစ်ရှောင်ရန်ခက်ခဲနေကြောင်း သိရသည်။
ဓာတ်ပုံ- AA Info Desk
ပုံစာ-ဂွမြို့သိမ်းစဉ်က တွေ့ရသည့် AA တပ်ဖွဲ့ဝင်များ (ပုံဟောင်း)
#ဂွ #ငသိုင်းချောင်း #စစ်ကောင်စီ #AA #တိုက်ပွဲပြင်းထန် #တပ်ရင်းမှူး #ဒုတပ်ရင်းမှူး #ထွက်ပြေး #Ayeyarwaddy_Times
