အသေးစားချေးငွေများအပါအဝင် ချေးငွေရယူထားသူများ အကြွေးပြန်ဆပ်ရန်နှင့် ပြန်မဆပ်ပါက တရားစွဲမည်ဟု KBZ ဘဏ် ထုတ်ပြန်

ဧရာဝတီတိုင်းမ်
ဇန်နဝါရီ ၁၆ ရက်

စစ်တပ်ခရိုနီ ဆရာကျောင်း ခေါ် ဦးအောင်ကိုဝင်း ပိုင်ဆိုင်သော ကမ္ဘောဇဘဏ်(KBZ)က အသေးစား ချေးငွေများ အပါအဝင်ခေါင်းစဉ် အမျိုးမျိုးဖြင့်ချေးငွေရယူထားသူ ၆၆ ဦးကို အကြွေးပြန်ဆပ်ရန်နှင့် သတ်မှတ်ရက် ၁၄ ရက်အတွင်းပြန်မဆက်ပါက ဥပဒေအတိုင်းတရားစွဲဆိုသွားမည်ဖြစ်ကြောင်း ယမန်နေ့ ဇန်နဝါရီ ၁၅ နေ့တွင် KBZ က ထုတ်ပြန်ထားသည်။

KBZ ဘဏ်သည် Quick Acess Loan (အမြန်ချေးငွေ) ၊ Personal Loan (ကိုယ်ပိုင်ချေးငွေ)၊ Shopper Loan (ဝယ်ယူရန်ချေးငွေ) ၊ Shopper Installment Loan (ဝယ်ယူရန်အရစ်ကျချေးငွေ) စသည့် ခေါင်းစဉ်အောက်များမှ ချေးငွေရယူထားသူ ၆၆ ဦး နာမည်နှင့် မှတ်ပုံတင်နံပါတ်များ အပါအဝင် အလုပ်အကိုင်များကိုထည့်သွင်းကာ စစ်ကောင်စီအာဘော် သတင်းစာမှတစ်ဆင့် ကြေညာချက် ထုတ်ထားသည်။

အဆိုပါ ၆၆ ဦးပေးဆောင်ရမည့် ချေးငွေအရင်း၊ အတိုးနှင့်ကျသင့်သည့်အဖိုးအခများကို ဇန်နဝါရီ ၁၅ မှစတင်ကာ ၁၄ ရက်အတွင်း နီးစပ်ရာဘဏ်ခွဲများတွင်ပေးဆောင်ရမည်ဖြစ်ကြောင်းပါဝင်သည်။

အဆိုပါလုပ်ငန်းများတွင် ကုန်စုံဆိုင်၊ ဆေးဆိုင်၊ အထည်ဆိုင်၊ အကင်ဆိုင်၊ စတိုးဆိုင်၊ ဖုန်းဆိုင်၊ ဆန်စက်၊ လျှပ်စစ်ပစ္စည်းရောင်းဝယ်ရေး၊ မိတ္တူကူးဆိုင်၊ ဓာတ်ပုံနှင့် ဗွီဒီယိုရိုက်ကူးရေးလုပ်ငန်းများနှင့် ကုမ္ပဏီများက Quick Access ချေးငွေအများဆုံးယူကြောင်းသိရသည်။

ထို့ပြင် Quick Access Loan သည် ပမာဏ ကျပ် ၅ သိန်းမှ သိန်း ၅၀ ထိချေးငွေရယူနိုင်ပြီး ပြန်လည် ပေးဆပ်ရန်ပျက် ကွက်ပါက ချေးငွေပမာဏနှင့် အတိုးပေါ်တွင်နောက်ကျကြေး ၁၄ ဒသမ ၅ ရာခိုင်နှုန်း ကျခံရမည်ဖြစ်ကြောင်း ကမ္ဘောဇဘဏ်ထံက သိရသည်။

ထို့ပြင်ကျန်ရှိနေသူများကိုဆက်လက်ထုတ်ပြန်သွားမည်ဖြစ်ကြောင်း KBZ က ကြေညာချက်ထုတ်သည်။

ဓာတ်ပုံ – လူမှုကွန်ရက်
#KBZဘဏ် #‌အကြွေးတောင်း #ပြန်မဆပ်အရေးယူမည် #Ayeyarwaddy_Times