ထိုင်းအစိုးရက နယ်စပ်ဒေသရှိ UWSA တပ်စခန်း ၉ ခုကို ဖယ်ရှာပေးရန် တောင်းဆိုထားပြီး စစ်အင်အား တိုးချဲ့နေဟုဆို

နိုင်မင်းလွင်/ဧရာဝတီတိုင်းမ်
နိုဝင်ဘာ ၂၅ ရက်

မြန်မာ-ထိုင်း နယ်စပ်ဒေသရှိ ‘၀’ ပြည်သွေးစည်းညီညွတ်ရေး တပ်မတော်(UWSA) ၏ တပ်စခန်း ကိုး ခုကို ဆုတ်ခွာဖယ်ရှားပေးရန် ထိုင်းအစိုးရက တောင်းဆိုထားပြီး လက်ရှိတွင် စစ်အင်အား တိုးချဲ့ပြင် ဆင်နေကြောင်း UWSA ၏ တာဝန်ရှိသူအချို့ထံက သိရသည်။

အဆိုပါ တပ်စခန်း ကိုးခုသည် ‘၀’ ပြည်​တောင်ပိုင်း ၁၇၁ ​ဒေသ ဧရိယာအတွင်း တည်ရှိပြီး နှစ်နိုင်ငံအကြား နယ်မြေအငြင်းပွားနေရာမှ ထိုင်းစစ်တပ်က ယခုကဲ့သို့ ဆုတ်ခွာဖယ်ရှားပေးရန် အမိန့်ထုတ် လိုက်ကြောင်း ထိုင်းသတင်းများအရ သိရသည်။

“တပ်စခန်း ကိုးခု ဖယ်ခိုင်းတာ မှန်ပါတယ်။ ဒီလိုကိစ္စမျိုးက ကျွန်တော်တို့နဲ့ မပြီးဘူး။ နိုင်ငံ​တော်အချင်းချင်း​ ဆွေး​နွေးရမယ့် ကိစ္စရပ်ဖြစ်တယ်” ဟု UWSA ၏ လားရှိုးဆက်ဆံရေးရုံး တာဝန်ခံ ဦးညီရမ်း က ဧရာဝတီတိုင်းမ်ကို ပြောသည်။

လက်ရှိတွင် ထိုကိစ္စကို ခေါင်း​ဆောင်ပိုင်းအား သတင်းပေးပို့ထားသလို ထိုင်းစစ်တပ်ဖက်ကလည်း အင်အားတိုးသည်ဟု သိရှိရကာ “၀” တပ်ဖွဲ့အနေဖြင့် ပုံမှန်အ​ခြေအ​နေအတိုင်း ဆောင်ရွက်လျက်ရှိ ကြောင်း ဦးညီရမ်းက ဆက်လက်ဆိုသည်။

ထိုင်းစစ်တပ်၏ ထုတ်ပြန်ချက်နှင့် ဒေသတွင်း သတင်းများအရ ယင်းနယ်မြေများမှ ယခုလာမည့် ဒီဇင်ဘာ ၁၈ ရက် နောက်ဆုံးထား၍ တပ်စခန်းများ ဆုတ်ခွာပေးရမည်ဟု ဆိုသော်ငြားလည်း “၀” တပ် ဖွဲ့အနေဖြင့် အ​သေးစိတ် မသိရ​သေးကြောင်း သိရသည်။

ယင်းမတိုင်ခင် ပြီးခဲ့သည့် ဇွန် ၁၉ ရက်ကလည်း ထို ‘၀’ တပ်စခန်းများ ဆုတ်ခွာပေးရန် ထိုင်းအစိုးရက မြန်မာ-ထိုင်း နယ်စပ်ကော်မတီ မြို့နယ်အဆင့် အစည်းအဝေးပွဲတွင် စစ်
ကောင်စီမှတဆင့် တောင်းဆိုခဲ့သလို နှစ်စဉ်ဖိအားပေး တောင်းဆိုမှုများ ရှိခဲ့သည်ဟုလည်း သိရသည်။

ဓာတ်ပုံ – အင်တာနက်
#ထိုင်းအစိုးရ #နယ်စပ်ဒေသ #UWSAတပ် #ဖယ်ရှာပေးရန် #တောင်းဆိုထား #စစ်အင်အားတိုးချဲ့
#Ayeyarwaddy_Times