မြဝတီသို့ ဦးတည်လာသည့် စစ်ကောင်စီတပ်ကို KNLA  ဦးဆောင်သည့် ပူးပေါင်းတပ်ဖွဲ့က  ဖြတ်တောက်ထားပြီး စစ်ကောင်စီတပ်ဖွဲ့ဝင်များ  ရာနှင့်ချီ၍ သေဆုံး

ဧရာဝတီတိုင်းမ်

ဧပြီ ၁၈ရက်

မြဝတီမြို့သို့ ထိုးစစ်ဆင်လာသော စစ်ကောင်စီတပ်ကို ကရင်အမျိုးသား လွတ်မြောက်ရေးတပ်မတော် (KNLA)က  ဦးဆောင်သည်​့ ပူးပေါင်းတပ်ဖွဲ့များက ရှေ့ဆက်မတိုးနိုင်အောင် ဖြတ်တောက်ထားနိုင်ကြောင်း သိရသည်။

မြဝတီမြို့ကို ထိုးစစ်ဆင်ပြီးတက်လာသည့် စစ်ကောင်စီတပ်ကို ယနေ့ ဧပြီ ၁၈ ရက်တွင် KNLA  ဦးဆောင်တပ်ဖွဲ့များက ကြားဖြတ်တိုက်ခိုက်ခဲ့ရာ  စစ်ကောင်စီတပ်ဖွဲ့ဝင်များ ရာနှင့်ချီ၍ ထိခိုက်သေဆုံးခဲ့ကြောင်း သိရသည်။

မြဝတီမြို့တွင် နောက်ဆုံး ကျန်ရှိသော ခလရ-၂၇၅ တပ်စခန်းကို  ပြီးခဲ့သည့် ဧပြီ ၁၁ ရက်နေ့တွင် ကရင်အမျိုးသားလွတ် မြောက်ရေးတပ်မတော် (KNLA) က  ဦးဆောင်၍ ကရင်အမျိုးသားကာကွယ်ရေး တပ်ဖွဲ့ (KNDO) နှင့် ပြည်သူ့ကာကွယ်ရေးတပ်ဖွဲ့ (PDF) တို့က    တိုက်ခိုက်သိမ်းပိုက်ခဲ့သည်။

ထို့နောက် စစ်ကောင်စီသည်  မြဝတီမြို့အား ပြန်လည်ရရှိရန်အတွက် “အောင်ဇေယျ” အမည်ဖြင့် နိုင်ငံတော်အဆင့် စစ်ဆင်ရေး တစ်ရပ်ကို ဖော်ဆောင်ကာ မြဝတီမြို့သို့ ထိုးစစ်ဆင်လာကြောင်း ကရင်အမျိုးသားအစည်းအရုံး (KNU) ကထုတ်ပြန်ထားသည်။

ထိုသို့ ထိုးစစ်ဆင်လာသော စစ်ကောင်စီတပ်များကို  KNLA က  ဦးဆောင်၍ KNDO နှင့် PDF ပူးပေါင်းတပ်ဖွဲ့များက ၎င်းတို့လာရာလမ်း တစ်လျှောက်တွင် အဆက်မပြတ် ဖြတ်တောက် တိုက်ခိုက်ခြင်းများကို ပြုလုပ်ခဲ့ကြောင်း သိရသည်။

ထိုသို့ ဖြတ်တောက်တိုက်ခိုက်မှုကြောင့် စစ်ကောင်စီဘက်မှ သံချပ်ကာယာဉ် အပါအဝင် စစ်သုံးကားအချို့ အပြင် စစ်ကောင်စီတပ်ဖွဲ့ဝင် ရာကျော် ထိခိုက်သေဆုံးခဲ့ရသော ကြောင့် ရှေ့သို့ဆက်မတက်နိုင်ဘဲ ဒေါန တောင်တန်း အနောက်ဘက် တောင်​ခြေတွင်သာ ရပ်တန့်နေခဲ့ကြောင်း သိရသည်။

ထိုးစစ်ဆင်လာသော စစ်ကောင်စီတပ်များသည် ၎င်းတို့ လာရာလမ်း တစ်လျှောက်တွင် စစ်ရေးပစ်မှတ်မဟုတ်သည့် အရပ်သားများနေထိုင်ရာ နေရာဒေသများကို  လက်နက်ကြီးဖြင့် ပစ်ခတ်ခြင်း လေကြောင်းမှ ဗုံးကြဲတိုက်ခိုက်ခြင်းတို့အား လုပ်ဆောင်ခဲ့ခြင်းကြောင့် အပြစ်မဲ့ အရပ်သားပြည်သူလူထုများ ထိခိုက်သေဆုံး ဒဏ်ရာရရှိခဲ့ခြင်းများရှိသည့်အပြင် ပြည်သူလူထု ပိုင်ဆိုင်သည့် ပစ္စည်း ဥစ္စာများလည်း ထိခိုက်ပျက်စီးခဲ့ရကြောင်း  KNU ကထုတ် ပြန်သည်။

ဓာတ်ပုံ-KNU

#ကရင်ပြည်နယ် #မြဝတီမြို့ #စစ်ကောင်စီ #KNLA #KNDO #PDF  #Ayeyarwaddy_Times