စစ်​တွေမြို့မ​စျေးကို စစ်​ကောင်စီ​ရေတပ်က လက်နက်ကြီးနှင့်ပစ်ခတ်သဖြင့် ပြည်သူ ၁၀ ဦး​ခန့်သေဆုံးပြီး ဒဏ်ရာရသူများပြား

ဧရာဝတီတိုင်းမ်
​ဖေ​ဖော်ဝါရီ ၂၉ ရက်

ရခိုင်ပြည်နယ်၊ မြို့​တော်စစ်​တွေကို စစ်​ကောင်စီ၏ ​ရေတပ်သင်္ဘောမှ လက်နက်ကြီးနှင့်ပစ်ခတ်ခဲ့ရာ မြို့မ​စျေးအတွင်း ကျ​ရောက်​ပေါက်ကွဲပြီး ပြည်သူ ၁၀ဦး​သေဆုံးပြီး ၃၀​ကျော်ဒဏ်ရာရရှိခဲ့​ကြောင်း သိရသည်။

ယ​နေ့ ​ဖေ​ဖော်ဝါရီ ၂၉ရက် မနက် ၈နာရီ ၁၅မိနစ်ခန့်က စစ်​တွေပွိုင့် ​ရေတပ်စခန်းအနီးတွင် ​ကျောက်ချထား​သော စစ်သင်္ဘောမှ ပစ်ခတ်လိုက်သည့်လက်နက်ကြီးကျည်သည် စစ်​တွေမြို့မ​စျေးအတွင်း ကျ​ရောက်​ပေါက်ကွဲပြီး ​စျေးအတွင်းရှိပြည်သူ ၁၀ဦးခန့်​သေဆုံးပြီး ၃၀​ကျော်ဒဏ်ရာရရှိခဲ့​ကြောင်း စစ်​တွေ​ဒေသခံများထံမှ သိရသည်။

​”စျေးထဲလူစည်ကားတဲ့အချိန် ​ရွေးပစ်လိုက်​တော့ လက်နက်ကြီးကျည်ကျတာမှာ လုံးဝမလှုပ်နိုင်ဘဲ လဲကျကုန်တာ ၁၀​ယောက်နီးပါးပဲ။ ​ခေါင်း​တွေ ​ခြေ​တွေ လက်​တွေထိကုန်သူ​တွေလည်းများတယ်။ ပွိုင့်ထိပ်မှာ ရပ်ထားတဲ့ ​ရေတပ်က ပစ်တယ်လို့​တော့ သိထားတယ်”ဟု စစ်​တွေ​ဒေသခံတစ်ဦးက ဧရာဝတီတိုင်းမ်ကို ပြောသည်။

လက်နက်ကြီးကျည် ကျ​ရောက်​ပေါက်ကွဲပြီး​နောက် စစ်​ကောင်စီက ​စျေးကို ပိတ်ထားလိုက်ပြီး လမ်းများကိုပါ လုံခြုံ​ရေးထူထပ်စွာချ၍လမ်းသွား လမ်းလာပြည်သူများကို စစ်​မေးမှုများ ပြုလုပ်​နေ​ကြောင်း သိရသည်။

စစ်​ကောင်စီက စစ်​​တွေမြို့အတွင်း စီမံချက်မျိုးစုံ​ရေးဆွဲ စစ်ပြင်ဆင်လျှက်ရှိပြီး ၎င်းတို့၏ တပ်မိသားစုဝင်များကို ရန်ကုန်၊ ​နေပြည်​တော်နှင့် သံတွဲမြို့များသို့ ​ပြီးခဲ့သည့် ဇန်နဝါရီလမှ စတင်၍ ပြောင်း​ရွှေ့​ပေးခဲ့ပြီးဖြစ်​ကြောင်း သိရသည်။

တပ်မိသားစုဝင်များအပြင် စစ်ဘက်ဆိုင်ရာ အရာရှိများပိုင်ဆိုင်သည့် အိမ်စီးကားများနှင့် ဌာနဆိုင်ရာမှကားများကိုပါ သင်္ဘောများနှင့် ရန်ကုန်သို့​ရွှေ့​ပြောင်းမှုများ ပြုလုပ်ခဲ့​သေးသည်။

ယ​​နေ့ ​ဖေ​ဖော်ဝါရီ ၂၉ရက်​နေ့သည် ရက္ခိုင့်တပ်​တော် AAက စစ်​တွေ ​ဒေသကွပ်ကဲမှုဆိုင်ရာစစ်ဌာနချုပ် ဒကစတစ်ခုလုံးလက်နက်ချအညံ့ခံရန် အချိန်​ပေးထားသည့် ​နောက်ဆုံး​နေ့လည်း ဖြစ်သည်။

#စစ်တွေမြို့ #မြို့မစျေး #စစ်ကောင်စီ #လက်နက်ကြီးကျည် #ကျရောက်ပေါက်ကွဲ #Ayeyarwaddy_Times