ဧရာဝတီတိုင်းမ်
(မတူပီ)၊ အောက်တိုဘာလ ၂၆ ရက်
ချင်းပြည်နယ်၊ မတူပီ-ဟားခါးလမ်းတွင် တပ်စခန်းချထားသော ချင်းကာကွယ်ရေး တပ်ဖွဲ့(မတူပီ)၊ တပ်ရင်း-၂ တွင် အထူးလိုအပ်နေသော လက်နက်ပိုင်းဆိုင်ရာ ဖြည့်တင်း နိုင်ရေးအတွက် M-4 နှစ် လက်ဝယ်ယူနိုင်ရန် ရန်ပုံငွေရှာဖွေရေးကို Future Hope Foundation က ဦးဆောင် ပြုလုပ်လျက်ရှိကြောင်းသိရသည်။
ချင်းကာကွယ်ရေးတပ်ဖွဲ့(မတူပီ)၊ တပ်ရင်း-၂ သည် စစ်ကောင်စီတပ်၏ရှေ့ဆုံး တပ်စခန်းဖြစ်သော မတူပီခရိုင်၊ ခရိုင်ရုံးနှင့် အလွန်းနီးကပ်စွာ တည်ရှိပြီး စစ်ကောင်စီ တပ်နှင့် တိုက်ပွဲမကြာခဏ ဖြစ်ပွားနေသော တပ်ရင်းဖြစ်ကြောင်း သိရသည်။
“တပ်ရင်း-၂ က မတူပီမြို့မှာ စစ်ရေးအရ အချက်အခြာကျတဲ့ ဟားခါး-မတူပီလမ်းမှာ နေရာယူထားတာဖြစ်တယ်။ ဟားခါး-မတူပီလမ်းပိုင်းကို စစ်ကောင်စီဘက်ကလည်း ထိန်းချုပ်နိုင်ရန် ကြိမ်ကြိမ်ကြိုးစားလာတဲ့အတွက် မကြာခဏတိုက်ပွဲဖြစ်ပွားနေတယ်။ တပ်ရင်းထဲမှာ အခက်အခဲအကြုံတွေ့ဆုံးကတော့ လက်နက်ခဲယမ်းပိုင်းဖြစ်တယ်။ ရရာလက်နက်ဖြစ်တဲ့ တူမီးနဲ့တိုက်ပွဲဝင်ပေမယ့် နှစ်ခါဆက်တိုက်ပစ်တာနဲ့ ပူသွားတဲ့ အတွက် သုံးလို့မရတော့ဘူး။ တပ်ရင်းထဲမှာ လူအင်အားများပြားပေမယ့် လက်နက်လို အပ်ချက်ကြောင့် လက်နက်ဝယ်ယူဖို့ ရန်ပုံငွေရှာဖွေရခြင်း ဖြစ်ပါတယ်။ ဒါကြောင့် မိဘပြည်သူတွေအနေနဲ့ လက်မှတ်ဝယ်ယူအားပေးခြင်းအားဖြင့် ပူးပေါင်းပါဝင် ပေးကြဖို့ မေတ္တာရပ်ခံလိုပါတယ်”ဟု တပ်ရင်း-၂ ၊ တပ်ရင်းမှူး ဆလိုင်းဗန်လောမ်က ဧရာဝတီတိုင်းမ်ကို ပြောသည်။
CDF-မတူပီ တပ်ရင်း-၂ သည် ဟားခါးမြို့နှင့် ဂန့်ဂေါမြို့ဘက်မှ မတူပီမြို့ဘက်သို့ လက်နက်ရိက္ခာဖြည့်တင်းလာသော စစ်ကောင်စီတပ်များကို ခုခံတိုက်ခိုက်နေသလို မတူပီမြို့ဘက်မှ ရေဇွာမြို့၊ လိုင်လင်းပီမြို့နှင့် ဟားခါးမြို့ဘက်သို့ အင်အား ဖြည့်တင်းလာသော စစ်ကောင်စီတပ်ကိုလည်း ပြင်းပြင်းထန်ထန်တိုက်ခိုက်ခဲ့နေသည့် တပ်ရင်း ဖြစ်ကြောင်း သိရသည်။
ထို့အပြင် မတူပီခရိုင်ရုံးတွင် တပ်စခန်းချထားသော စစ်ကောင်စီတပ်ကို တပ်ရင်း-၂ က မကြာခဏသွားရောက်တိုက်ခိုက်ခဲ့ပြီး ခရိုင်ရုံးသို့ အင်အားဖြည့်တင်းလာသော စစ်ကောင် စီတပ်ဖွဲ့နှင့် ငလိုင်ကျေးရွာဘက်သို့ ထိုးစစ်ဆင်လာသော စစ်ကောင်စီတပ်ကိုလည်း ခုခံတော်လှန်တိုက်ခိုက်နေသည့် တပ်ရင်းဖြစ်ကြောင်းသိရသည်။
တပ်ရင်း-၂ အတွက် M4 နှစ်လက်ဝယ်ယူနိုင်ရေးအတွက် ကျပ်သိန်းပေါင်း ၄၀၀ ရန်ပုံငွေရှာဖွေရေးပရောဂျက်ကံစမ်းမဲလက်မှတ်များကို ယမန်နေ့၊ အောက်တိုဘာလ ၂၅ ရက်နေ့မှ စတင်ရောင်းချလျက်ရှိပြီး နိုင်ငံတကာရှိ ကိုယ်စားလှယ်များထံ ဝယ်ယူနိုင်သလို Future Hope Foundation Page မှတဆင့် ဆက်သွယ်၍ တိုက်ရိုက်ဝယ်ယူ နိုင်ကြောင်းသိရသည်။
ပုံစာ- CDF-မတူပီ တပ်ရင်း-၂ မှ တော်လှန်ရေးတပ်ဖွဲ့ဝင်များ
#CDFမတူပီတပ်ရင်း၂ #လက်နက်ဖြည့်တင်းနိုင်ရေး #M4နှစ်လက် #ရံပုံငွေရှာဖွေ #Ayeyarwaddy_Times
