ဧရာဝတီတိုင်းမ်
ဩဂုတ်လ ၂၇ ရက်
ဧရာ၀တီတိုင်း၊ ပုသိမ်မြို့တွင် မီတာခ ပေးဆောင်ရန် ကြွေးကျန်ရှိသောနေအိမ်များကို စစ်ကောင်စီလက်အောက်ခံ မီတာရုံးဝန်ထမ်းများကသြဂုတ်လအတွင်းမဆောင်ပါကဖြုတ်သိမ်းမည်ဟု ခြိမ်းခြောက်မှုတွေပြုလုပ်နေကြောင်းပုသိမ် မြို့ခံများထံမှသိရှိရသည်။
ယခင်က မီတာကြွေးကျန်များအား အရစ်ကျခွဲ၍ ဆောင်ခွင့်ပြုထားရာမှ ကြွေးကျန်မှန်သမျှအား သြဂုတ်လအတွင်းမှ အပြီးပေးဆောင်ရန်ပြောကြားခဲ့ပြီး တစ်လတစ်ခါမဆောင်ပါကအရေးယူမယ်လို့ခြိမ်းခြောက်နေကြောင်း ဒေသခံများမှပြောသည်။
“ EPC ကဝန်ထမ်းတွေပါ စကားပြောတာအရမ်းရိုင်းတယ်၊ ကျန်ငွေရော ဒဏ်ငွေရော သူတို့ကိုတစ်ခါထဲပေးရမယ်ဆိုပြီးပြောတယ်။ မီတာခ ကြွေးကျန်တွေရှိတဲ့အိမ်တွေကိုမီးဖျက်ပြီးမီတာပုံးတွေအ အပြီးဖြုတ်သိမ်းမယ်လို့ပြောတယ်”ဟုမြို့ခံ အမျိုးသမီးတစ်ဦးကဧရာ၀တီတိုင်းမ်ကိုပြောသည်။
ပြီးခဲ့တဲ့ ဇူလိူင်လအတွင်းမှာ ပုသိမ်မြို့၊ ရပ်ကွက်များရှိနေအိမ် ၃၀ လုံးထက်မနည်းကို စစ်ကောင်စီလက်အောက်ခံ EPC ရုံးဝန်ထမ်းများက မီတာများ ဖြုတ်သိမ်းခဲ့ကြောင်း ၎င်းမှဆက်လက်ပြောဆိုသည်။
အခြားရပ်ကွက်နဲ့ ကျေးရွာတွေမှာလည်းလိုက်လံဖြုတ်သိမ်းနေကာ မီတာပြန်တပ်ဆင်ပါက ဒဏ်ကြေး တစ်သိန်းနီးပါးပေးဆောင်ရကြောင်းမြို့ခံများကပြောသည်။
ပုသိမ်မြို့တွင် လျှပ်စစ်မီးကို အချိန်ဇယားဖြင့်သာ ဖြန့်ဝေနေသော်လည်း ပေးဆောင်ရသည့် မီတာခမှာ ယခင်ကထက် လျော့နည်းသွားခြင်းမရှိပဲ ဝင်ငွေရလမ်း နည်းပါးလာချိန်မှာ မီတာခများအား ဖိအားပေးကောက်ခံမှုများ ဆက်တိုက်ပြုလုပ်ခြင်းဖြစ်ကြောင်း ဒေသခံများမှပြောသည်။
မီတာဖြုတ်သိမ်းမှုများအပြင် မီတာရုံးဝန်ထမ်းများကမီတာပြန်တပ်ရေးအတွက်ငွေကြေးရယူ လာဘ်စားမှုများဖြစ်ပေါ်နေကြောင်း ဒေသခံများထံမှသိရှိရသည်။
