ဧရာဝတီတိုင်းမ်
မေလ ၂၆ ရက်

ဖိလစ်ပိုင်ပင်လယ်ပြင်တွင်ဖြစ်ပေါ်နေသော တိုက်ဖွန်းမုန်တိုင်း မဝါ ( Mawar) အရှိန်ကြောင့် လာမည့် သုံးရက်အတွင်း တိုင်း‌နှင့် ပြည်နယ် ရှစ် နေရာတွင် ‌မိုးကြီးခြင်းနှင့် လေပြင်းတိုက်ခတ်မှုများဖြစ်ပေါ်နိုင်သဖြင့် သတိပြုရန်လိုအပ်ကြောင်း စစ်ကောင်စီလက်အောက်ခံ မိုးလေဝသနှင့်ဇလဗေဒညွှန်ကြားမှု‌ဦးစီးဌာနက ထုတ်ပြန်ထားသည်။

လာမည့် မေလ ၂၈ ရက်မှ ၃၀ ရက်နေ့အတွင်း နေပြည်တော်၊ ပဲခူးတိုင်း၊ရန်ကုန်တိုင်း၊ ဧရာဝတီတိုင်း၊ တနင်္သာရီတိုင်း အပါအဝင် ကရင်နီပြည်၊ ကရင်ပြည် နှင့် မွန်ပြည်နယ်တို့တွင် နေရာစိပ်စိပ်နှင့် နေရာအနှံ့အပြား မိုးထစ်ချုန်း ရွာမည်ဖြစ်ကြောင်း သိရသည်။

အဆိုပါနေရာများတွင်ဒေသအပေါ်မူတည်ပြီး မိုးကြီးခြင်းနှင့်အတူ လေပြင်းတိုက်ခတ်ခြင်းများဖြစ်ပေါ်နိုင်ကြောင်း ထုတ်ပြန်ချက်အရသိရသည်။

“အခုတစ်ပတ်အတွင်း မေလကုန်အထိက မိုးများစွာရွာသွန်းပြီး မိုးကြီးရေလျှံတာတွေရှိနိုင်ပါတယ်။ မုတ်သုန်မိုးပါတစ်ခါတည်း တစ်နိုင်ငံလုံးလွှမ်းခြုံ‌သွားနိုင်ပါတယ် ” ဟု မိုးလေဝသပညာရပ်ကိုလေ့လာနေသူတစ်ဦး က ခန့်မှန်းပြောကြားသည်။

ထို့အပြင် မိုးကြိုကာလရောက်လာပြီဖြစ်ကာ ‌မိုးတိမ်တောင်ကြောင့်ဖြစ်ပေါ်လာနိုင်သည့် မိုးကြိုးပစ်ခြင်း၊ လျှပ်စီးလက်ခြင်း နှင့် မိုးသီးကြွေကျခြင်းတို့ဖြစ်ပေါ်နိုင်သဖြင့် အထူးသတိထားရန်လိုအပ်ကြောင်း မိုးလေဝသပညာရပ်ကိုလေ့လာနေသူတစ်ဦး က ခန့်မှန်းပြောကြားသည်။

လက်ရှိ ချင်းပြည်နယ်၊ ကရင်ပြည်နယ် နှင့် မွန်ပြည်နယ်တို့တွင် မိုးတိမ်တောင်များဖြစ်ပေါ်နေသဖြင့်ဒေသခံများသတိပြုရန်လိုအပ်ကြောင်း သိရသည်။

ယင်းအပြင် တနင်္သာရီကမ်းရိုးတန်းဒေသ ရန်ကုန်တိုင်း၊ ဧရာဝတီတိုင်းအပါအဝင် ရခိုင်ပြည်နယ်တောင်ပိုင်းဒေသများတွင် မိုးရွာသွန်းမြဲထက် နှစ်ဆပိုနိုင်ပြီး ရေကြီးရေလျှံမှုများဖြစ်ပေါ်နိုင်ကြောင်းလည်း မိုးလေဝသ ခန့်မှန်းသုံးသက်သူများက ခန့်မှန်းထားကြသည်။

” မိုးရာသီရောက်ချိန်ဆို မိုးများတယ်။ ရေကြီးတာတွေဖြစ်လာတော့မယ်။ မနှစ်ကဆို တစ်ခါမှမကြားဖူးတဲ့ တောင်ပေါ်ဒေသမှာ ရေကြီးရေလျှံဖြစ်လာတယ်။ ရေ‌ဝေရေလဲဒေသတွေကိုသေချာစနစ်တကျလုပ်ဖို့လိုနေပြီ ” ဟု ပတ်ဝန်းကျင်ထိန်းသိမ်းရေးလုပ်ဆောင်နေသူတစ်ဦး ကဆိုသည်။

ယင်းအပြင် မြစ်ဝကျွန်း‌ပေါ်ဒေသ မုတ္တမကွေ့၊ မွန် – တနင်္သာရီကမ်းရိုးတန်း တစ်လျှောက်နှင့် ကမ်းလွန်ပင်လယ်ပြင်တို့တွင် တစ်ခါတရံ မိုးသက်လေပြင်းကျရောက်ပြီးလှိုင်းကြီးနိုင်သည့်အတွက် ကမ်းနားအနီးနေသူများ သတိပြုသင့်ကြောင်း မိုးလေဝသလေ့လာသူများက အကြံပြုပြောကြားသည်။

မိုးသက်လေပြင်းကျရောက်ချိန်တွင် ရေပြင်၊ မြေပြင်လေသည် တစ်နာရီလျှင် ၃၅ မိုင်အထိ တိုက်ခတ်နိုင်ပြီး ၈ ပေမှ ၁၀ ပေ အထိ လှိုင်းကြီးနိုင်ကြောင်း စစ်ကောင်စီလက်အောက်ခံ မိုးလေဝသနနှင့် ဇလဗေဒညွှန်ကြားမှုဦးစီးဌာန ထုတ်ပြန်ချက်အရသိရသည်။

ပြီးခဲ့သည့် ၂၀၂၂ ခုနစ် ဇူလိုင်လနှင့် ဩဂုတ်လများတွင် နိုင်ငံတဝန်း နေအိမ်တစ်ဝက်ခန့်နစ်မြုပ်သည့်အထိရေကြီးရေလျှံမှုများဖြစ်ပွားခဲ့သည်။
ဓာတ်ပုံ-DDR website
#တိုက်ဖွန်းမုန်တိုမုန်တိုင်း #အရှိန်ကြောင့် #မိုးကြီးခြင်းနှင့် #လေပြင်းတိုက်ခတ်မှုဖြစ်ပေါ်နိုင်
#Ayeyarwaddy_Times