ငရုတ်ကောင်းမြို့ လမ်းခွဲတွင် စစ်ကောင်စီတပ်သားတွေက ဆိုင်ကယ်တွေကို ဖမ်းချင်လို့ ဖမ်းတာပြောပြီး ငွေ ၅၀၀၀၀ စီ ဓါးပြတိုက်သလိုတောင်းနေ

ဧရာဝတီတိုင်းမ်
ဖေဖော်ဝါရီလ ၂၃ ရက်

ဧရာဝတီတိုင်း၊ ငပုတောမြို့နယ်၊ ငရုတ်ကောင်းမြို့မှာ စစ်ကောင်စီတပ်သားတွေက ငရုတ်ကောင်း ငွေဆောင် သွားတဲ့ လမ်းလေးခွဆုံမှာ လက်နက်အပြည့်အစုံနဲ့ ဆိုင်ကယ်တွေကို တားဆီးပြီး ငွေတောင်းတာတွေ ပြုလုပ် နေတယ်လို့ ခရီးသွားပြည်သူတွေဆီက သိရပါတယ်။

ဆိုင်ကယ်ဦးထုပ်နဲ့ လိုင်စင်အပြည့်အစုံပါရင်လည်း အရက်သေစာသောက်စားထားတဲ့ စစ်ကောင်စီ ရေတပ် ယူနီဖောင်းဝတ်ဆင်ထားတဲ့ တပ်ဖွဲ့ဝင် ၅ ဦးလောက်က ဖမ်းချင်လို့ ဖမ်းတာလို့ ပြောဆိုကာ ငွေ ၅၀၀၀၀ ထိ တောင်းယူတာတွေပြုလုပ်နေတာလို့ ခရီးသွားပြည်သူတွေက ပြောပါတယ်။

“ အားလုံးဆို ၅ ယောက်၊ အကုန်လုံးကတော့ ရေတပ်ယူနီဖောင်းတွေနဲ့ပါ၊ အရက်နံတွေကတော့ အဝေးကနေ တောင်မခံနိုင်ဘူး၊ လိုအပ်တာတွေ အကုန်ပြည့်စုံရင်တောင် ဖမ်းချင်လို့ ဖမ်းတာ၊ ၅ သောင်းပေးဆိုပြီး တောင်းတာ”လို့ ခရီးသွားပြည်သူ အမျိုးသမီး ၁ ဦးက ဧရာဝတီတိုင်းမ်ကို ပြောပါတယ်။

စစ်ကောင်စီတပ်သား ၅ ဦးလောက်ဟာ အရက်သေစာသောက်စားပြီး မူးရူးပြီး ငွေတောင်းချင်သလို တောင်းသလို အမျိုးသမီးငယ်တွေဆိုင်ကယ်မောင်းလာရင်လည်း တားဆီးပြီး နှုတ်နဲ့ စော်ကားပြောဆိုတာတွေ ပြုလုပ်နေတယ်လို့ ဆိုပါတယ်။

ပုံမှန် ယာဉ်စည်းကမ်းထိန်းသိမ်းရေးအတွက် ဖမ်းတာမျိုးဆိုရင် ယာဉ်ထိန်းရဲ၊ မီးသတ်နဲ့ အခြားဝန်ထမ်းတွေ ပါဝင်ပေမယ့် ခုလိုမျိုး ဆိုင်ကယ်တွေကို တားပြီး လက်နက်ပြ ဓါးပြတိုက်သလိုဖမ်းတာမျိုးတော့ မကြုံဘူးသလို ဒါဟာ လက်နက်နဲ့အနိုင်ကျင့်တဲ့ လုပ်ရပ်ဖြစ်တယ်လို့ ခရီးသွားပြည်သူတွေက ပြောပါတယ်။

#ငရုတ်ကောင်း #လမ်းခွဲ #စစ်ကောင်စီ #ဆိုင်ကယ် #ငွေ၅၀၀၀၀ #ဓားပြတိုက်
#Ayeyarwaddy_Times