သတင်း​ထောက် ကို​ဝေလင်းနှင့် မထက်ထက်​အောင်တို့ကို ပေါက်ကွဲဲစေတတ်သော ဝတ္ထုပစ္စည်းများ အက်ဥပဒေပုဒ်မဖြင့် ​ထောင် ၅ နှစ်စီချမှတ်

ဧရာဝတီတိုင်းမ်
ဒီဇင်ဘာလ ၁၇ ရက်

သင်္ဃန်းကျွန်းပို့စ် အယ်ဒီတာချုပ်ဖြစ်သူ ကိုဝေလင်းယုနှင့် တာဝန်ခံအယ်ဒီတာ မထက်ထက်အောင်တို့ကို ယမန်​နေ့(ဒီဇင်ဘာလ ၁၆ရက်)က ​ထောင်ဒဏ် ၅ နှစ် ချမှတ်ခဲ့​ကြောင်း ရန်ကုန်မြို့ခံ သတင်းသမားများထံမှ သိရသည်။

၎င်းတို့ ၂ ဦးကို အင်းစိန်​ထောင်တွင်းတရားရုံးက ​ပေါက်ကွဲ​စေတတ်​သော ဥပ​ဒေ ပုဒ်မ ၅ ဖြင့် ထောင်ဒဏ် ၅ နှစ်စီချမှတ်လိုက်ခြင်းဖြစ်ပြီး ဆက်လက်တရားရင်ဆိုင်နေရဆဲ အမှုအချို့လည်း ရှိမရှိကို​တော့ အတိအကျမသိရ​သေး​ပေ။

ပြီးခဲ့သည့်နှစ် ​မေလဆန်းကတည်းက အဖမ်းခံလိုက်ကြရ​သော ၎င်းတို့ ၂ ဦးကို ယခုမှ အမိန့်ချမှတ်ခဲ့ပြီး သတင်းသမားများကို သတင်းအလုပ် လုပ်​နေစဥ် သတင်းမီဒီယာနှင့် မသက်ဆိုင်ပဲ ရာဇဝတ်ပုဒ်မများဖြင့် ယခုလိုအပြစ်​ပေးခြင်းက အာဏာသိမ်း စစ်တပ်အ​နေဖြင့် သတင်းသမားများကို ​ကြောက်ရွံ့သွား​စေရန် ရည်ရွယ်ချက်ရှိရှိဖြင့် ​ဆောင်ရွက်ခြင်းဖြစ်​​ကြောင်း သတင်းမီဒီယာသမားများက ​ဝေဖန်ကြသည်။

“ရှင်းပါတယ်ဗျာ။ သတင်းသမားက သတင်းအလုပ် လုပ်တာကို ​ပေါက်ကွဲပုဒ်မတပ်တာဆို​တော့။ သတင်းသမား​တွေက စစ်တပ် အာဏာသိမ်းပြီးထဲက ရတဲ့ နည်းနဲ့ ပြည်သူ​တွေရဲ့ သတင်းသိပိုင်ခွင့်ကို ဆက်လုပ်​တော့ စစ်တပ်ရဲ့ အဓိက ပစ်မှတ်​တွေ ဖြစ်လာတယ်။ အခုချိန်ထိ ​ထောင်​တွေထဲမှာ သတင်းသမား​ပေါင်း ၆၀ ​ကျော် ရှိ​နေတယ်။ ပြီးခဲ့တဲ့တ​ခေါက်က လွတ်ငြိမ်း​ပေးတာမှာ သတင်းသမား ၅ ဦးပဲ ပြန်လွတ်တယ်။ သူတို့ သတင်း​လောကကို ဘယ်လိညပဲ နှိပ်ကွပ်​နေပါ​စေ။ သတင်းသမား​တွေက ရတဲ့နည်းနဲ့ ဆက်လက်သတင်း​တွေ တင်ဆက်​နေကြစဲပါ” ဟု ၎င်းတို့၏ မိတ်​ဆွေ လုပ်သက် ၁၅ နှစ်ရှိ သတင်းသမားတစ်ဦးက မှတ်ချက်ပြုပြောဆိုသည်။

ပြီးခဲ့သည့်လက အင်းစိန်​ထောင် ပါဆယ်ဌာန ဗုံး​ပေါက်ကွဲမှုတွင် မထက်ထက်​အောင်၏ မိသားစုဝင်အချို့ ​ထောင်ဝင်စာပို့​စဥ် ထိခိုက်ဒဏ်ရာအချို့ရရှိခဲ့ကြောင်း သိရသည်။

ပေါက်ကွဲစေတတ်သော အက် ဥပဒေ ပုဒ်မ (၅) သည် အနိမ့်ဆုံး ထောင်ဒဏ် (၅) နှစ်မှ (၁၄) နှစ် အထိ ချမှတ်နိုင်သည့် ပုဒ်မဖြစ်သည်။

#သတင်းထောက် #ကိုဝေလင်း #မထက်ထက်အောင် #ထောင်ဒဏ်
#Ayeyarwaddy_Times