ဧရာဝတီတိုင်းမ်
အောက်တိုဘာ ၁၂ ရက်
မကွေး – ရခိုင်အစပ်ရှိ အမ်း – ပဒါန်းလမ်းပိုင်းတွင် ရွေးတုအစိုးရစစ်တပ်နှင့် အာရက္ခတပ်တော် (AA) တို့အကြား တိုက်ပွဲများ ဆက်လက်ပြင်းထန်နေကြောင်း ဒေသခံ စစ်ရေးသတင်းရင်းမြစ်များထံမှ သိရသည်။
အဆိုပါ လမ်းပိုင်းအတွင်း တိုက်ပွဲများအတွင်း ရွေးတုအစိုးရစစ်တပ် တပ်ဖွဲ့ဝင်များ၏ အလောင်းများနှင့် လက်နက်ခဲယမ်းများကို AA က ပြီးခဲ့သည့်ရက်ပိုင်းအတွင်း သိမ်း ဆည်းရမိခဲ့ခြင်းဖြစ်သည်။
“ဒီရက်ပိုင်း တိုက်ပွဲပြန်စလာပါတယ်။ ဆုံကုန်းအမြောက်တပ်ထဲကိုလည်း စစ်ယာဉ်တန်းတွေ အင်အား ဖြည့်ဝင်ရောက်လာတာလည်း ရှိပါတယ်” ဟု မကွေးသတင်းရင်းမြစ်က ဧရာဝတီတိုင်းမ်ကို ပြောသည်။
ပြီးခဲ့သည့် အောက်တိုဘာ ၈ ရက်က အမ်း – တလိုင်းတောင်လမ်းကို ထိုးစစ်ဆင်နေသည့် ရွေးတုအစိုးရ စစ်တပ် စစ်ကြောင်းတစ်ကြောင်းကို AA က ကံကြိုးရွာနှင့် ပတ်ဝန်းကျင်တွင် တိုက်ခိုက်ခဲ့ခြင်းဖြစ်ပြီး စစ်သားအလောင်းများနှင့် လက်နက်ခဲယမ်းများအပြင် စစ်လက်နက်ပစ္စည်းများကိုပါ သိမ်းဆည်းရမိ ခဲ့ခြင်း ဖြစ်သည်။
ထို့ပြင် အမ်း – ပဒါန်းလမ်းရှိ AA ပိတ်ဆို့ထားသည့် နတ်ရေကန်ဗျူဟာ လေကြောင်းရန် ကာကွယ်ရေး စခန်းကို ထိုးစစ်ဆင်နေသည့် စစ်ကြောင်းနှင့် AA တို့သည် ဂုတ်ကြီးရွာ (လမ်းသစ်) အနီးတွင် အောက်တိုဘာ ၉ ရက် နေ့လယ်ပိုင်းက တိုက်ပွဲဖြစ်ပွားခဲ့ပြီး စစ်တပ်မှာ အထိနာကာ နောက်ဆုတ်သွားကာ သေဆုံးသူများလည်း ရှိခဲ့သည်ဟု သိရသည်။
အဆိုပါ စစ်ကြောင်း ချေမှုန်းခံရမှုများနှင့် တိုက်ပွဲများကြောင့် ယနေ့ (အောက်တိုဘာ ၁၁ ရက်) နေ့လယ်အချိန်အထိ ရွေးတုအစိုးရစစ်တပ်ဘက်မှ ထောက်ပို့ဗုံးကြဲလေယာဉ် နှစ် စင်းနှင့် ဂျက်ဖိုက်တာ တစ် စင်းတို့ဖြင့် အမ်းမြို့နယ်အတွင်းသို့ ဆက်လက်ပျံသန်း တိုက်ခိုက်မှုများ ပြုလုပ်လျက်ရှိကြောင်း သိရသည်။
ပြီးခဲ့သည့် အောက်တိုဘာ ပထမပတ်အတွင်း နတ်ရေကန်ဗျူဟာ လမ်းပိုင်းကို ပို့လွှတ်ထားသည့် စကခ-၁၀ တပ်ရင်းအချို့ကို ညောင်ကျိုးသို့ ပြန်လည်ခေါ်ယူ စုဖွဲ့မှုများ ပြုလုပ်ပြီးနောက် ယခုကဲ့သို့ တိုက်ပွဲများ ပြန်လည်ပြင်းထန်လာခြင်း ဖြစ်သည်။
စစ်တွေ-ပုဏ္ဏားကျွန်းအစပ်တွင် ရွေးတုတပ်ထံက သိမ်းဆည်းရမိသည့် လက်နက်ခဲယမ်းများ(ပုံဟောင်း)
