ဧရာဝတီတိုင်းမ်
ဩဂုတ် ၂၅ရက်
ရခိုင်ပြည်နယ်၊ စစ်တွေမြို့ရှိ စစ်တပ်စခန်းများနှင့် ရှေ့တန်းတပ်ရင်းများကို အင်အားထောင်ချီ ထပ်မံဖြည့်တင်းလျက်ရှိပြီး ဒေသခံ မူဆလင်လူငယ်များကိုလည်း ဖမ်းဆီး၍ အဓမ္မစစ်သင်တန်းပေးမှုများ ပြုလုပ်နေကြောင်း ဒေသတွင်း သတင်းရင်းမြစ်များထံမှ သိရသည်။
စစ်တပ်သည် ပြီးခဲ့သည့်ရက်ပိုင်းအတွင်း ရေကြောင်းမှတစ်ဆင့် စစ်အင်အား ၁,၀၀၀ ခန့်ကို စစ်တွေမြို့သို့ ပို့ဆောင်ခဲ့ပြီး မြို့အခြေစိုက် ခမရ (၃၅၄)၊ ခလရ (၃၄၄) နှင့် ခလရ (၂၃၂) တပ်ရင်းများတွင် အင်အားများ ဖြန့်ခွဲနေခြင်းဖြစ်သည်။
”ရန်ကုန်က တပ်သားသစ်စုပေါင်းအင်အားတွေတင်ထားတဲ့ ရေယာဉ်တွေ စစ်တွေရောက်သွားပြီလို့ ယူဆရပါတယ်။ တပ်စခန်းတစ်ခုကို အင်အား ၂၀၀ လောက် ဖြန့်ခွဲပို့တယ်လို့ သိရပါတယ်” ဟု ရခိုင်သတင်းရင်းမြစ်က ဧရာဝတီတိုင်းမ်ကို ပြောသည်။
ရန်ကုန်မြို့မှ စစ်သင်္ဘော၊ ကုန်တင်သင်္ဘောများဖြင့် လက်နက်ခဲယမ်းနှင့် အင်အားများကို ပို့ဆောင်ကာ စစ်တွေမြို့မှတစ်ဆင့် ရှေ့တန်းတပ်ရင်းများကို အင်အားဖြည့်တင်းနေခြင်း ဖြစ်သည်။
ထို့အပြင် ပါဒလိတ်တပ်ရင်း၊ ဒေသကွပ်ကဲမှုစစ်ဌာနချုပ် (ဒကစ) အနီးရှိ နာရီကန်တပ်ရင်းနှင့် ရေချမ်းပြင်အနီးရှိ တပ်ရင်းများကို စစ်ကားများဖြင့် အင်အား ပို့ဆောင်ဖြန့်ကြက်ထားသည်။ ထို့အပြင် ရွှေမင်းဂံရေတပ်အနီးတွင် စစ်ရေယာဉ် အများအပြား နေရာချထားသည်။
စစ်တပ်သည် စစ်တွေမြို့နယ်အတွင်းရှိ ဒုက္ခသည်စခန်းများနှင့် ကျေးရွာများမှ မူဆလင် လူငယ်များကို ဖမ်းဆီးကာ စစ်သင်တန်းပေးလျက်ရှိသည်။ ပြီးခဲ့သည့်နှစ်ကလည်း အင်းစိန်အကျဉ်းထောင်မှ လွတ်မြောက်လာသည့် သူများထဲမှ အသက် ၁၈ နှစ်မှ ၅၀ နှစ်အတွင်း အမျိုးသားများကို ရွေးထုတ်ခေါ်ဆောင်၍ စစ်သင်တန်းပေးခဲ့သည်။
ထို့ပြင် စစ်တွေမြို့နယ်အတွင်းရှိ သဲချောင်း၊ သက္ကယ်ပြင်၊ ပုလ္လင်ပြင်၊ ဒါးပိုင်၊ အုန်းတောကြီး၊ အုန်းတောငယ် နှင့် ဘုမ စသည့် မူဆလင်ကျေးရွာများမှ လူငယ် ၁၂၀ ခန့်ကို ပြီးခဲ့သည့်နှစ်ကတည်းက စုဆောင်းကာ ဒကစရှိ လေ့ကျင့်ရေးကွင်းတွင် စစ်သင်တန်းပေးခဲ့ဖူးသည်။
လက်ရှိအချိန်တွင် စစ်တွေမြို့နယ်အတွင်း စစ်တပ်နှင့် အာရက္ခတပ်တော် (AA) တို့အကြား ထိတွေ့တိုက်ပွဲကြီးများ မပြင်းထန်သေးသော်လည်း လက်နက်ကြီးများဖြင့် အပြန်အလှန် ပစ်ခတ်မှုများရှိနေပြီး ကျားမသောက်နှင့် ရွှေမင်းဂံဘက်ကို AAက ပစ်ခတ်တိုက်ခိုက်မှုများ ပြုလုပ်ထားသည်။
