ဧရာဝတီတိုင်းမ်
ဇွန် ၁၅ရက်
ရခိုင်ပြည်နယ်၊ ပုဏ္ဏားကျွန်းမြို့နယ်တွင် ခရီးသည်တင်စက်လှေတစ်စီး တိမ်းမှောက်မှုဖြစ်ပွားခဲ့ပြီး အနည်းဆုံး လူ ရှစ် ဦး သေဆုံးကာ သုံး ဦး ပျောက်ဆုံးနေကြောင်း ဒေသတွင်းသတင်းဌာနများနှင့် ကယ်ဆယ် ရေးလုပ်ဆောင်နေသူများထံမှ သိရသည်။
ရသေ့တောင်မြို့နယ်၊ ကူတောင်ကျေးရွာမှ ကျောက်တော်မြို့သို့ ဈေးဝယ်ရန် ထွက်ခွာလာသည့် အဆိုပါ စက်လှေသည် ယနေ့ ဇွန်လ ၁၅ ရက် နံနက် ၁၁ နာရီ ၄၅ မိနစ်ဝန်းကျင်ခန့်က ပုဏ္ဏားကျွန်း ကြိုးတံတားအနီး ကင်းချောင်းအရောက်တွင် ကျောက်ဆောင်နှင့်တိုက်မိကာ တိမ်းမှောက်ခဲ့ခြင်း ဖြစ်သည်။
”ဦးရာဇ်တော်တောင်ကြိုးတံတားကို တိုက်မိလို့မှောက်တယ်လည်းပြောတယ်။ ကျောက်ဆောင်နဲ့ တိုက်မိတယ်လည်း ဆိုတယ်။ ကယ်ဆယ်ရေးလုပ်သူတွေ ရေထဲပျောက်နေသူတွေကိုရှာနေကြပါတယ်” ဟု ရခိုင်သတင်းရင်းမြစ်က ဧရာဝတီတိုင်းမ်ကိုပြောသည်။
စက်လှေပေါ်တွင် စုစုပေါင်း ခရီးသည် ၃၅ ဦး လိုက်ပါလာခဲ့ပြီး လတ်တလော ကယ်ဆယ်ရေး ရရှိထားသည့် အချက်အလက်များအရ ထိခိုက်မှုအခြေအနေမှာ အမျိုးသမီး ငါး ဦးနှင့် အမျိုးသား သုံး ဦးသေဆုံးပြီး သုံးဦးပျောက်ဆုံးနေကြောင်း သိရသည်။
အသက်အသက်ရှင်ကျန်ရစ်သူ ၂၄ ဦးအနက် ဒဏ်ရာပြင်းထန်သည့် အမျိုးသားသုံးဦးကို ဆေးရုံသို့ အရေးပေါ်ပို့ဆောင်ကာ ဆေးကုသမှုပေးထားရသည်။
ယခုရက်ပိုင်းအတွင်း သံတွဲ၊ အမ်း၊ ရမ်းဗြဲ၊ စစ်တွေတို့တွင် မိုးကြီးပြီး မိုးသက်လေပြင်းကျရောက်နိုင်၍ သတိထားနေထိုင်ကြရန် မိုးလေဝသပညာရှင်များက ကြေညာထားပြီး မြစ်၊ ချောင်းများ မြစ်ရေ တိုးနိုင်ကြောင်းလည်း ဆိုထားသည်။
ဓာတ်ပုံ-ဖြူစင်ရင်ခွင်ဖောင်ဒေးရှင်း
