ဧရာဝတီတိုင်းမ်
ဇွန် ၁၅ရက်
ကချင်ပြည်နယ်၊ ရွှေကူမြို့နယ်အထက်ဘက်ရှိ ကျေးရွာများကို ရွေးတုအစိုးရစစ်တပ်က Y12 လေယာဉ် ဖြင့် ဗုံးသီးအလုံးရေ ၇၀ နီးပါး ဆက်တိုက်ကြဲချတိုက်ခိုက်ခဲ့ကြောင်း ဒေသတွင်းသတင်း ရင်းမြစ်များ ထံမှ သိရသည်။
ရွှေကူမြို့၏ အထက်ရွာဘက်ခြမ်းများကို ယနေ့ ဇွန် ၁၅ရက် နံနက်ပိုင်းတွင် Y12 လေယာဉ်ဖြင့် လာရောက်ဗုံးကြဲခဲ့ခြင်းဖြစ်ပြီး လက်ရှိအချိန်အထိလည်း ငါးဘက်ကြီး၊ ပန်းတင် နှင့် တော်လှန်ရွာဘက် များမှ လက်နက် ကြီးပစ်ခတ်သံများကို အဆက်မပြတ် ကြားနေရဆဲဖြစ်ကြောင်း ဒေသခံများက ဆိုသည်။
”ရွှေကူ-စင်ခန်းဖြတ်လမ်းနဲ့ တော်လှန်ရွာဘက်တွေ ကြဲတယ်ကြားတယ်။ သေချာတော့မပြောနိုင်ဘူး၊ ပတ်ကြဲသွားတာဆိုတော့။ လူတွေကရှောင်ကုန်ကြလို့ ထိခိုက်မှုတော့မသိရဘူး။ ပတ်ကြဲနေတာ” ဟု ရွှေကူ ဒေသခံတစ်ဦးက ဧရာဝတီတိုင်းမ်ကို ပြောသည်။
ယမန်နေ့ ဇွန် ၁၄ရက်နေ့ကလည်း ပလောင်တောင်တက် ကိုင်းရွာများဘက်တွင် စစ်တပ်၏ လက်နက်ကြီးပစ်ခတ်မှုကြောင့် အိမ်များ မီးလောင်နေပြီး လူထိခိုက်မှုရှိကြောင်း သိရသည်။
နှစ်ဖက် စစ်ရေးအခြေအနေ တင်းမာနေသော်လည်း ရွှေကူမြို့ပေါ်ရှိ အခြေအနေမှာမူ ပုံမှန်အတိုင်း ရှိနေပြီး လူဦးရေသွားလာမှု အနည်းငယ်လျော့နည်းသွားကြောင်း သိရသည်။ ထို့ပြင် စစ်ဘေးကြောင့် ပညာရေး ဆုံးရှုံးထားရသည့် ကျေးရွာဘက်မှ ကျောင်းသား၊ ကျောင်းသူအချို့မှာလည်း မြို့ပေါ်သို့ လာရောက်ကာ စာမေးပွဲ ဖြေဆိုနေကြသည်ကို တွေ့ရသည်။
ကချင်လွတ်လပ်ရေးတပ်မတော် (KIA) သည် ပြီးခဲ့သည့် ဇွန် ၈ ရက်နေ့က ပြည်သူများ မြို့တွင်းမှ ထွက်ခွာပေးရန် သတိပေးစာ ထုတ်ပြန်ထားခဲ့ပြီး ယနေ့တွင် ၈ ရက်မြောက်ရှိလာပြီ ဖြစ်သည်။ KIA ၏ ထုတ်ပြန်ချက်တွင် ဇွန် ၁၆ ရက်နေ့ကို နောက်ဆုံးထား၍ ထွက်ခွာရန် သတ်မှတ်ထားကြောင်းလည်း သိရသည်။
လက်ရှိအချိန်အထိ KIA ဘက်က မြို့ကို အလုံးအရင်းဖြင့် ထိုးစစ်ဆင်တိုက်ခိုက်ခြင်း၊ ပစ်ခတ်ခြင်းမျိုး လုပ် ဆောင်လာသည်ကို တွေ့ရှိရခြင်းမရှိသေးဘဲ ရွေးတုအစိုးရစစ်တပ်ဘက်ကမူ မြို့တွင်းနေရာ စိုးမိုးရေးအတွက် ပြင်ဆင်မှုများ ပြုလုပ်နေပြီး နှစ်ဖက်စစ်ရေးအရ ထိတွေ့တိုက်ပွဲငယ်အချို့သာ ရှိနေသေး ကြောင်း ဒေသတွင်း သတင်း များအရ သိရသည်။
ပုံစာ-KIA တပ်ဖွဲ့ဝင်အချို့ကိုတွေ့ရစဉ်(ပုံဟောင်း)
