ဧရာဝတီတိုင်းမ်
မေ ၂၆ ရက်
စစ်ကိုင်းတိုင်းအထက်ပိုင်း ကသာ၊ အင်းတော်နှင့် မော်လူးဒေသများတွင် ကချင်လွတ်မြောက်ရေး တပ်မတော် (KIA) နှင့် တော်လှန်ရေးပူးပေါင်းတပ်များက မဟာဗျူဟာမြောက် ထိုးစစ်များ ပြန်လည်စတင်လိုက်ရာ ရွေးတုအစိုးရစစ်တပ်ဘက်က ထိခိုက်သေဆုံးးများပြားပြီး စခန်းအချို့ကိုပင် စွန့်ခွာထွက်ပြေးနေရကြောင်း ဒေသခံသတင်းရင်းမြစ်များနှင့် ရှေ့တန်းသတင်းများအရ သိရသည်။
ယခုဖြစ်ပွားနေသော တိုက်ပွဲများသည် ပြီးခဲ့သည့် မတ်လမှစတင်ကာ ထီးချိုင့်၊ တကောင်း၊ ကသာ၊ အင်းတော်နှင့် မော်လူးဒေသများကို နယ်မြေပြန်စိုးမိုးရန် ကြိုးပမ်းလာသည့် စစ်တပ်၏ ဗျူဟာကို တော်လှန်ရေးပူးပေါင်းတပ်များက ဖြတ်တောက်ခြေမှုန်းသည့် အလှည့်အပြောင်းတိုက်ပွဲများလည်း ဖြစ်သည်။
ရွေးတုအစိုးရစစ်တပ်က ယခုမေလအတွင်း ကချင်ပြည်နယ်နှင့် စစ်ကိုင်းအစပ်ရှိ နန့်စီးအောင်ကို ကျော်ဖြတ်ကာ မိုးညှင်းအထိ စစ်အင်အား ဖြန့်ကျက်ပြီး နယ်မြေစိုးမိုးမှု ပြန်ရရန် ကြိုးပမ်းခဲ့သည်။
သို့သော်လည်း မေလ ၂၁ ရက်မှစတင်သည့် တော်လှန်ရေးတပ်ဖွဲ့များ၏ ဟန်ချက်ညီ တုံ့ပြန်ထိုးစစ်ကြောင့် စစ်ကိုင်း-ကချင် လမ်းမကြီးတစ်ခုလုံးအပေါ် စစ်တပ်၏ ထိန်းချုပ်နိုင်စွမ်းကိုပါ ကြီးမားစွာ ခြိမ်းခြောက်ခံနေရပြီဖြစ်သည်။
ပြီးခဲ့သည့်ရက်ပိုင်း မေ ၂၄ ရက်နေ့က မိုးညှင်းဘက်မှ စစ်ကူဆင်းလာသည့် စစ်ကား သုံး စီးကို တော်လှန်ရေးတပ်ဖွဲ့များက မော်ဟဲရွာအနီးတွင် ကြားဖြတ်တိုက်ခိုက်ခဲ့ရာ စစ်တပ်ဘက်မှ တပ်ဖွဲ့ဝင် ၁၅ ဦးထက်မနည်း သေဆုံးခဲ့သည်။
ထို့အပြင် မေ ၂၅ ရက်တွင် မိုးညှင်း-မော်လူးလမ်းပိုင်းရှိ မော်ဟန်ရွာ ရဲစခန်းအနီး တပ်စွဲထားသော စစ်တပ်နေရာကို KIA က KPV ဒရုန်းများဖြင့် ဗုံးသီးချ တိုက်ခိုက်ခဲ့သဖြင့် နှစ်ဦး သေဆုံးကာ အများအပြား ဒဏ်ရာရရှိခဲ့သည်။
အင်းတော်မြို့နယ် ပင်းမလွတ်ကျေးရွာအနီး မေ ၂၄ရက်က ဖြစ်ပွားခဲ့သည့် တိုက်ပွဲတွင်လည်း စစ်တပ်ဘက်က အထိနာခဲ့သလို၊ မော်လူးဒေသတွင်လည်း စခန်းစွန့်ခွာထွက်ပြေးမှုများ ရှိနေသည်။
”မော်လူးမှာ ဒီနေ့ ၂၆ ရက် မနက်ပိုင်းအထိ လက်နက်ကြီးသံနဲ့ ဒရုန်းပေါက်ကွဲသံတွေ တစ်ချက်တစ်ချက် ကြားနေရတုန်းပဲ။ စစ်တပ်ဘက်က ခံစစ်မနိုင်လို့ စွန့်ပြေးသွားတဲ့ စခန်းတွေလည်း ရှိတယ်” ဟု ဒေသခံသတင်းရင်းမြစ်တစ်ခုက အတည်ပြုပြောကြားသည်။
စစ်ရေးအရ အထိနာနေသည့် စစ်တပ်သည် ရှေ့တန်းတွင် စစ်ရှုံးပါက အရပ်သားပိုင်ပစ္စည်းများကို ဖျက်ဆီးသည့် နည်းဗျူဟာအတိုင်း မေလ ၂၄ ရက်က မော်လူးဒေသ ညောင်ပင်သာကျေးရွာမှ ဆုတ်ခွာထွက်ပြေးစဉ် ကျေးရွာအတွင်းရှိ ပြည်သူလူထု၏ နေအိမ်များကို မီးရှို့ဖျက်ဆီးသွားခဲ့ကြသည်။
လက်ရှိတွင် ကသာ၊ အင်းတော်၊ မော်လူးနှင့် မိုးညှင်း လမ်းပိုင်းတစ်လျှောက်တွင် စစ်ရေးတင်းမာမှုများ ဆက်လက်မြင့်တက်နေပြီး မန္တလေး- မြစ်ကြီးနားလမ်းပိုင်းတွင်လည်း ကားအစီးရေ ရာနှင့်ချီ ပိတ်မိနေသည်။
မြေပုံ- NZY
