ဧရာဝတီတိုင်းမ်
ဧပြီ ၉ ရက်
ရခိုင်ပြည်နယ်ရှိ AAထိန်းချုပ်ရာ မင်းပြားမြို့နယ်၊ ပုလဲတောင်ကျေးရွာကို စစ်ကော်မရှင်က တိုက်လေယာဉ်အများအပြား သုံး၍ ဗုံးကြဲတိုက်ခိုက်ခဲ့ကြောင်း သိရသည်။
ယနေ့ ဧပြီ ၉ရက် နံနက် ၁၂နာရီ အချိန်ခန့်က မင်းပြားမြို့နယ် ပုလဲတောင်ကျေးရွာအနီးတဝိုက်ကို စစ်ကော်မရှင်က ဂျက်ဖိုက်တာ၊ Y12လေယာဉ်တို့ဖြင့် ဗုံးသီး အလုံး ၂၀ခန့် ကြဲချတိုက်ခိုက်ခဲ့ကြောင်း ဒေသတွင်း သတင်းရင်းမြစ်များထံမှ သိရသည်။
”မင်းပြားကို နှစ်ရက်ဆက်ပြီး ဗုံးကြဲတာ။ ဒီနေ့လာထပ်ကြဲတာမှာလည်း ထိခိုက်မှုတွေရှိတယ်ပြောပါတယ်။ အခုနောက်ပိုင်း လေယာဉ်အုပ်လိုက်သုံးပြီးကို ကြဲတာ” ဟု ရခိုင်သတင်းရင်းမြစ်က ဧရာဝတီတိုင်းမ်ကို ပြောသည်။
အဆိုပါ ပုလဲတောင်ကျေးရွာကို ယမန်နေ့ ဧပြီ ၈ရက် နံနက် ရှစ်နာရီခန့်ကလည်း တိုက်လေယာဉ်နှင့် Y12လေယာဉ် စုစုပေါင်း လေစီးကိုသုံးပြီး လေကြောင်းတိုက်ခိုက်သည့်အတွက် အမျိုးသားတစ်ဦး သေဆုံးကာ တစ်ဦးထိခိုက် ဒဏ်ရာရရှိခဲ့သည်။
ထို့အပြင် ပေါက်တောမြို့နယ်၊ မြေငူကျွန်းကိုလည်း ယနေ့ နံနက်ပိုင်းတွင်ပင် လေကြောင်းတိုက်ခိုက်မှု ပြုလုပ်သွားသေးကြောင်း သိရသည်။
ရခိုင်ပြည်နယ်တစ်ခုလုံးတွင် မြို့နယ်သုံးခုကိုသာ အုပ်ချုပ်ထားနိုင်တော့သည့် စစ်ကော်မရှင်က အရပ်သားများကိုပစ်မှတ်ထားကာ AAထိန်းချုပ်နယ်မြေများကို ဆက်တိုက်ဗုံးကြဲတိုက်ခိုက်လာသည့်အပြင် ၎င်းတို့၏လက်အောက်ငယ်သားများဖြစ်သော AAထိန်းသိမ်းခံ စစ်သုံ့ပန်းစခန်းများကိုပင် လေကြောင်းတိုက်ခိုက်လျက်ရှိသည်။
