ဧရာဝတီတိုင်းမ်
ဖေဖော်ဝါရီ ၂၆ ရက်
နယ်နိမိတ်ထိစပ်နေသည့် ဘင်္ဂလားဒေ့ရှ်နိုင်ငံမှ နိုင်ငံခြားရေး ဝန်ကြီးသစ်ကို ကြိုဆိုကြောင်း AAစစ်ဦးစီးချုပ် ဗိုလ်ချုပ် ထွန်းမြတ်နိုင်က သဝဏ်လွှာ ပေးပို့ခဲ့သည်။
ဘင်္ဂလားဒေ့ရှ်နှင့် ရခိုင်ပြည်ကြား ချစ်ကြည် ရင်းနှီးမှု လမ်းကြောင်းသစ်တစ်ခု ရေးဆွဲနိုင် မည်ဖြစ်ကြောင်း ဘင်္ဂလားဒေ့ရှ်နိုင်ငံခြားရေးဝန်ကြီးသစ် ဒေါက်တာ ခါလီလူရာမန် ကို AAစစ်ဦးစီးချုပ် ဗိုလ်ချုပ်ထွန်းမြတ်နိုင်က သဝဏ်လွှာပေးပို့ခဲ့ကြောင်း ယမန်နေ့ ဖေဖော်ဝါရီ ၂၅ရက်တွင် ဘင်္ဂလားဒေ့ရှ် သတင်းမီဒီယာ BSSက ဖော်ပြသည်။
”ဘင်္ဂလားဒေ့ရှ် နိုင်ငံခြားရေး ဝန်ကြီးအဖြစ် ရာထူးသစ်ကို ကြိုဆိုကြောင်း၊ လက်တွေ့ကျ ရေရှည်တည်တံ့သည့် ဖြေရှင်းနည်းများနှင့် ဆက်လက် လက်တွဲလုပ်ဆောင်မည်ဖြစ်ကြောင်းနှင့် ရရှိပြီးသား ကောင်းမွန်သည့် ဆက်ဆံရေးဖြင့် ဘင်္ဂလားဒေ့ရှ်နှင့် ရခိုင်ပြည်ကြား ချစ်ကြည်ရင်းနှီးမှု လမ်းကြောင်းတစ်ခု ရေးဆွဲဖို့ အခွင့်အရေးရရှိပြီ”ဖြစ်ကြောင်း ဗိုလ်ချုပ်ထွန်းမြတ်နိုင်က ရေးသားပေးပို့ချက်တွင် ဖော်ပြသည်။
စစ်ကော်မရှင်၏ နိုင်ငံခြားရေးဝန်ကြီး ဦးသန်းဆွေကလည်း ဘင်္ဂလားဒေ့ရှ် နိုင်ငံခြားရေးဝန်ကြီးထံ သဝဏ်လွှာ ပေးပို့ခဲ့သည်ဟု သိရသည်။
ဘင်္ဂလားဒေ့ရှ်နှင့် ရခိုင်ပြည်နယ်အကြား ရိုဟင်ဂျာအရေးနှင့် ဒုက္ခသည်စခန်းများမှ ဒုက္ခသည်များပြောင်းရွှေ့ရေး၊ ရခိုင်ရေပိုင်နက်အတွင်း ဘင်္ဂလားဒေ့ရှ် ငါးခိုးဖမ်းသမားများအရေးနှင့် လက်နက်ကိုင်တပ်ဖွဲ့များ AAစခန်းများကို ဝင်ရောက်တိုက်ခိုက်မှုတို့ကို ရင်ဆိုင်နေရသည်။
နယ်မြေထိစပ်နေသည့် မောင်တောဒေသကို ထိန်းချုပ်ထားသည့် AAနှင့် ဘင်္ဂလားဒေ့ရှ်တာဝန်ရှိသူများ တရားဝင် ဆက်သွယ်ညှိနှိုင်းမှုများမရှိသေးကြောင်း သိရသည်။
