ဧရာဝတီတိုင်းမ်
ဖေဖော်ဝါရီ ၂၀ ရက်
ကချင်ပြည်နယ်၊ ဗန်းမော်မြို့နယ်အတွင်း တိုက်ပွဲများမှာ တစ်နှစ်ကျော်ကြာမြင့်လာပြီဖြစ်သော်လည်း ဆက်လက်ပြင်းထန်နေပြီး ကချင်လွတ်လပ်ရေးတပ်မတော် (KIA) ၏ ထိုးစစ်ကို စစ်ကော်မရှင်က လေကြောင်း ပစ်ကူကိုသာ အဓိကထား၍ ခုခံနေရကြောင်း သိရသည်။
စစ်ကော်မရှင်သည် KIA က သိမ်းယူထားသည့် စစ်စခန်းများနှင့် ခြေကုပ်စခန်းများကို ပြန်လည် ရယူနိုင်ခြင်း မရှိသည့်အပြင်၊ KIA ၏ ထိုးစစ်ဆင်လာမှုကိုသာ စောင့်ကြည့်ခုခံနေရသည့် “ခံစစ်အသေ” အနေအထားသို့ ရောက်ရှိနေကြောင်း စစ်ရေးသတင်းရင်းမြစ်များထံမှ သိရသည်။
”KIA ကတော့ လက်ရှိ အသာစီးယူထားတဲ့အခြေအနေကနေ အပြောင်းအလဲမရှိဘူး။ ကချင်ထဲမှာကို စစ်ဆိုင်တဲ့နေရာက သုံး ခုလောက်ရှိတယ်။ ကသာ၊ ကောလင်း၊ ဗန်းမောက်ဘက်လည်း တပ်ဖြန့်ထားရ တာတွေရှိတော့ အင်အားသုံးထားရတယ်ပေါ့” ဟု ကချင်သတင်းရင်းမြစ်က ဧရာဝတီတိုင်းမ်ကို ပြောသည်။
စစ်ကော်မရှင်သည် ဗန်းမော်စစ်မျက်နှာတစ်ခုတည်းတွင်ပင် အင်အား အနည်းဆုံး ၉၀၀ မှ ၁၅၀၀ အထက် အထိအသုံးပြု ခံစစ်ဆင်နေရခြင်းဖြစ်ကြောင်း CDM ဗိုလ်ကြီးဇင်ယော်က ဆိုသည်။
ထို့အပြင် Yak-130 တိုက်လေယာဉ်နှစ်စင်းဖြင့် လေကြောင်းတိုက်ခိုက်မှုရှိပြီး စစ်ကော်မရှင်၏ အထူးသီးသန့် ဒရုန်းကျွမ်းကျင်အဖွဲ့များပါ ဗန်းမော် စစ်မျက်နှာတွင် ရှိနေသော်လည်း KIA ကလည်း စစ်တပ်၏ နည်းပညာမြင့် ဒရုန်းအကြီးစားများကို ဖျက်ချထားနိုင်သည်အထိရှိကြောင်း သိရသည်။
ဗန်းမော်တွင် လပိုင်းအတွင်း၌ပင် စစ်ကော်မရှင်၏ သံချပ်ကာယာဉ် ၇ စီး အထိ KIA က ဖျက်ဆီးခဲ့ပြီး စစ် လက်နက်ပစ္စည်းတပ် စစန-၆၄၁ နှင့် ထောက်ပံ့နှင့် ပို့ဆောင်ရေးတပ်ဖွဲ့ ထပရ-၉၃၃ တပ်များ ကိုလည်း ခြိမ်းခြောက်ထားနိုင်သည်။
လက်ရှိ တိုက်ပွဲသတင်းအရ ယနေ့ ဖေဖော်ဝါရီ ၂၀ ရက်တွင် ဖြစ်ပွားနေသည့် ဗန်းမော်တိုက်ပွဲတွင် ခမရ ၆၀၁မှ ဗိုလ်မှူးရာထူးအဆင့်ရှိသူတစ်ဦး သေဆုံးသွားကြောင်း သိရသည်။
ပုံစာ-ဖျက်ဆီးခံထားရသည့်စစ်ကော်မရှင်၏သံချပ်ကာယာဉ်များ။
