ဧရာဝတီတိုင်းမ်
ဖေဖော်ဝါရီ ၁၁ရက်
စစ်ကိုင်းတိုင်း၊ ကောလင်း၊ ကန့်ဘလူအစပ်ရှိ အာရက္ခတပ်တော် (AA) နှင့် တော်လှန်ရေးတပ်ဖွဲ့များ သိမ်းပိုက်ထားသည့် ကိုးတောင်ဘို့စခန်းကို ပြန်သိမ်းရန်တက်လာသည့် စစ်ကော်မရှင် စစ်ကြောင်း တိုက်ခိုက်ခံရပြီး တပ်ပျက်သွားကြောင်း သိရသည်။
ကောလင်းမြို့နယ်ထဲတွင် ပြီးခဲ့သည့် ဖေဖော်ဝါရီ ၇ရက်နေ့က အင်အား ၂၀၀ခန့်ပါ စစ်ကော်မရှင် စစ်ကြောင်းကို တော်လှန်ရေးတပ်များက တိုက်ခိုက်ခဲ့ရာ သေဆုံးမှုများပြားပြီး စစ်ကြောင်းပျက်သွား ကြောင်း သတင်းရင်းမြစ်ထံမှ သိရသည်။
”တပ်ပျက်တဲ့အထိဖြစ်သွားတယ်လို့ သိရပါတယ်။ သုံ့ပန်းတွေပါ ရလိုက်တယ်” ဟု သတင်းရင်းမြစ်က ဧရာဝတီတိုင်းမ်ကိုပြောသည်။
ကိုးတောင်ဘို့စခန်းကို ဦးတည်လာသည့် စစ်ကော်မရှင်စစ်ကြောင်း တိုက်ခိုက်ခံရ၍ တပ်ပျက် ထွက်ပြေးစဉ် လက်ရဖမ်းဆီးနိုင်မှုများရှိခဲ့ပြီး လက်နက်များပါသိမ်းဆည်းရမိခဲ့ကြောင်း သိရသည်။
စစ်ကော်မရှင် အင်အား ၁၀၀ကျော်အခြေချနေသည့် ကိုးတောင်ဘို့စခန်းကို ပြီးခဲ့သည့် ဇန်နဝါရီ ၃၀ရက်နေ့တွင် AA နှင့် တော်လှန်ရေးတပ်ဖွဲ့များက ၃ ရက်ကြာတိုက်ခိုက်၍ သိမ်းယူခဲ့ခြင်းပြီး အဆိုပါ ကိုးတောင်ဘို့စခန်းကို ပြန်လည် သိမ်းယူရန်အတွက် စစ်ကော်မရှင်စစ်ကြောင်းများ စေလွှတ်နေခြင်း ဖြစ်သည်။
စစ်ကော်မရှင်တပ်ကို စစ်ကြောင်း ပျက်အောင် တိုက်ခိုက်ခံခဲ့ရပြီးနောက် ပြီးခဲ့သည့် ဖေဖော်ဝါရီ ၇ရက် နံနက်ပိုင်းက ကောလင်းမြို့နယ် ကျောက္ကာရွာအနီးတွင် တပ်မ (၃၃) မှ တပ်ကြပ်ကြီး ထူးထူးနိုင်ကို တော်လှန်ရေးတပ်များက ဖမ်းဆီးခဲ့သည်။
ပုံစာ-တပ်မ (၃၃) မှ တပ်ကြပ်ကြီး ထူးထူးနိုင်ကို ဖမ်းဆီးရမိပြီးနောက် တွေ့ရစဉ်။
