ဧရာဝတီတိုင်းမ်
ဇန်နဝါရီ ၂၈ ရက်
အိန္ဒိယနိုင်ငံတွင်ဖြစ်ပွားနေသော ကုသဆေးနှင့် ကြိုတင်ကာကွယ်ဆေးမရှိသည့် နီးပါးရ်ဗိုင်းရပ်စ် မူလ လက်ခံအကောင် လင်းနို့၊လင်းဆွဲများကိုသတိထားရန်လိုပြီး ယနေ့အထိ မြန်မာနိုင်ငံတွင် ကူးစက်မှု မရှိသေးကြောင်း စစ်ကော်မရှင်လက်အောက်ခံ ကျန်းမာရေးဝန်ကြီးဌာနက ထုတ်ပြန်သည်။
နီးပါးရ်ဗိုင်းရပ်စ်သည် တိရစ္ဆာန်မှတစ်ဆင့် လူကိုကူးစက်သည့်ရောဂါတစ်မျိုးဖြစ်ပြီး မြန်မာနိုင်ငံတွင် နီပါးရ်ဗိုင်းရပ်စ် ကူးစက်ဖြစ်ပွားမှုကို တွေ့ရှိရခြင်းမရှိသေးသော်လည်း မူလလက်ခံကောင် လင်းနို့ မျိုးစိတ် ဖြစ်သည့် သစ်သီးစားလင်းနို့/လင်းဆွဲပေါင်းများစွာ တည်ရှိရာဒေသဖြစ်၍ သတိ ထားရန် လိုအပ်ကြောင်း သိရသည်။
နီးပါးရ်ဗိုင်းရပ်စ်သံသယရောဂါလက္ခဏာများမှာ ပြင်းထန်စွာဖျားခြင်း၊ ပြင်းထန်စွာခေါင်းကိုက်ခြင်း၊ ချောင်း ဆိုးခြင်း၊ အသက်ရှူခက်ခဲခြင်း၊ စိတ်ရှုပ်ထွေးခြင်း၊ အိပ်ငိုက်ခြင်းတို့ဖြစ်ပြီး လက်ရှိတွင် ကုသဆေးမရှိသဖြင့် ကြိုတင်ကာကွယ်သည့်နည်းလမ်းဖြစ်သည့် လက်မကြာခဏဆေးရန်၊ လင်းနို့ကိုက်ထားသည့် အသီးအနှံမစားရန်၊ Mask တပ်ရန်၊ ဖျားနာလူနာများနှင့် နီးကပ်စွာမနေရန် အာရက္ခတပ်တော် (AA) ကျန်းမာရေးဌာနက ထုတ်ပြန်ထားသည်။
ထို့ပြင် ကူးစက်မှု မကြာခဏဖြစ်ပွားလေ့ရှိသော ဒေသတွင်းနိုင်ငံများနှင့် နယ်နမိတ်ချင်းထိစပ်နေသဖြင့် နီပါးရ်ဗိုင်းရပ်စ်ရောဂါ စောင့်ကြပ်ကြည့်ရှုခြင်းလုပ်ငန်းကို အထူးအလေးထား ဆောင်ရွက်လျက် ရှိကြောင်း AA ကျန်းမာရေးဌာနက ဆိုသည်။
ထို့ကြောင့် နီပါးရ်ဗိုင်းရပ်စ်ရောဂါဖြစ်ပွားနေသည့် အိန္ဒိယနိုင်ငံ၊ အနောက်ဘင်္ဂလားပြည်နယ်ဒေသသို့ မလိုအပ်ဘဲ ခရီးမသွားရန်၊ လက်တလော ရောဂါဖြစ်ပွားရာ ဒေသကို ရောက်ရှိနေသူများအနေဖြင့် ရောဂါဖြစ်ပွားရာဒေသရှိ ဆေးရုံသို့မဟုတ် ဖျားနာသူများပြားရာ နေရာများဆီ မလိုအပ်ဘဲ သွားရောက်ခြင်းမပြုရန် သတိပေးထားသည်။
ယင်းပြင်ရောဂါဖြစ်ပွားရာဒေသမှ ပြန်လာပြီး ၁၄ ရက်အတွင်း သံသယရောဂါလက္ခဏာများခံစားရခြင်း၊ မိမိနေရာပတ်ဝန်းကျင်တွင် ဝက်၊ လင်းနို့များ ထူးထူးခြားခြားသေဆုံးနေသည်ကိုတွေ့ပါက နီးစပ်ရာ ကျန်းမာရေးဌာနထံအကြောင်းကြားရန် ကျန်းမာရေးဝန်ကြီးဌာနက ထုတ်ပြန်ထားသည်။
နီးပါးဗိုင်းရပ်စ်သည် သေဆုံးမှုမြင့်သည့်ရောဂါဖြစ်ပြီး ကူးစက်မှု၊ ရောဂါပြင်းထန်မှုအပေါ်မူတည်ပြီး သေဆုံးမှု ၄၀ ရာခိုင်နှုန်းမှ ၇၅ ရာခိုင်နှုန်းရှိကြောင်း ကမ္ဘာ့ကျန်းမာရေးအဖွဲ့က ( WHO ) က ခန့်မှန်းထားသည်။
ဓာတ်ပုံ – WHO
