အမိန့်စာမစမီကတည်းက လေဆိပ်တွင် ပိတ်ပင်မှုများရှိနေပြီး ခွင့်ပြုချက်ရမှသာ ထွက်ခွာ ခွင့်ရမည်ဟုပြော
ဧရာဝတီတိုင်းမ်
ဇန်နဝါရီ ၁၃ ရက်
ပြည်ပနိုင်ငံများတွင် အလုပ်လုပ်ကိုင်နေပြီး မိသားစုနှင့် တွေ့ဆုံရန် ခွင့်ပြန်လာသည့် အလုပ်သမားများ အနေဖြင့် နိုင်ငံခြားသို့ ပြန်လည်ထွက်ခွာလိုပါက စစ်ကော်မရှင်ထံမှ ကြိုတင်ခွင့်ပြုချက် ရယူရမည်ဟု ထပ်မံတင်းကျပ်လိုက်သဖြင့် ပြည်ပထွက်ခွာအလုပ်လုပ်ကိုင်နေသည့် အလုပ်သမားများ အခက်ကြုံ နေရကြောင်း သိရသည်။
ပြည်ပအလုပ်အကိုင် အလုပ်သမားသက်သေခံကတ် (OWIC) ကိုင်ဆောင်ထားသည့် ခွင့်ပြန်အလုပ် သမားများသည် လာမည့် ဇန်နဝါရီ ၁၄ ရက်မှစတင်ကာ စစ်ကော်မရှင်လက်အောက်ခံ အလုပ် သမားညွှန်ကြားရေးဦးစီးဌာန၏ ခွင့်ပြုချက် ရယူပြီးမှသာ ပြည်ပသို့ ပြန်လည်ထွက်ခွာရမည်ဟု ထုတ်ပြန်ထားသည်။
ထိုသို့ထုတ်ပြန်ထားသော်လည်း လက်ရှိတွင် အမိန့်စာစတင်ရက် မတိုင်မီကတည်းက ရန်ကုန်လေဆိပ်၌ တင်းကျပ်စွာ စစ်ဆေးပိတ်ပင်မှုများ ကြုံတွေ့နေရပြီး လေဆိပ်မှနေ၍လှည့်ပြန်ခိုင်းနေကြောင်း သိရသည်။
“အမျိုးသား ပြန်လာခါနီးမှ ဒီစာထွက်တော့ စိတ်ပူရတယ်။ မတွေ့ရတာ ၅ နှစ်လောက် ရှိပြီ။ ကလေးကလည်း ကြီးလာပြီ။ မိဘတွေကလည်း မျှော်နေတာ။ ပြန်လာပြီးမှ ပြန်ထွက်မရမှာကို အစိုးရိမ်ဆုံးပဲ” ဟု မလေးရှားမှ ပြန်လာမည့် အမျိုးသားကို စောင့်မျှော်နေသည့် အိမ်ရှင်မတစ်ဦးက ဓရာ၀တီတိုင်းမ်ကို ပြောသည်။
သတ်မှတ်ချက်အသစ်အရ ခွင့်ပြန် OWIC လက်ဝယ်ရှိသူများသည် ပြည်ပသို့ ပြန်လည်မထွက်ခွာမီ အလုပ်သမားညွှန်ကြားရေးဦးစီးဌာနသို့ အနည်းဆုံး ရုံးပိတ်ရက်မပါ ၅ ရက် ကြိုတင်၍ လျှောက်ထားရမည်ဖြစ်သည်။
ယခင်က အီးမေးလ် (Email) ဖြင့်သာ အကြောင်းကြားပြီး ထွက်ခွာနိုင်သော်လည်း ယခုအခါ ဌာန၏ အတည်ပြု အမည်စာရင်းကျလာမှသာ လေယာဉ်စီးနင်းခွင့် ရရှိမည်ဖြစ်ကြောင်း စစ်ကော်မရှင်က ထုတ်ပြန်ထားသည်။
ရန်ကုန်အပြည်ပြည်ဆိုင်ရာလေဆိပ်၌ ယနေ့ ဇန်နဝါရီ ၁၂ ရက်ကတည်းက စစ်ဆေးမှုများတင်းကျပ် နေသဖြင့် ခွင့်ပြန်အလုပ်သမားအချို့မှာ လေယာဉ်လက်မှတ်ခ ဆုံးရှုံးမှုများနှင့် လုပ်ငန်းကြန့်ကြာမှုများ ကြုံတွေ့နေရကြောင်း သိရသည်။
စစ်ကော်မရှင်ကမူ ခွင့်ပြန် OWIC ကိုင်ဆောင်ထားသူများသည် ဌာနသို့ တင်ပြခြင်းမရှိဘဲ ပြည်ပသို့ ထွက်ခွာနေခြင်းကြောင့် ယခုကဲ့သို့ စိစစ်ရခြင်းဖြစ်သည်ဟု အကြောင်းပြချက် ထုတ်ပြန်ထားသည်။
ဓာတ်ပုံ – လူမှုကွန်ရက်
