‎ကျောက်ဖြူတွင် စစ်ကော်မရှင်စစ်ကြောင်းတိုက်ခိုက်ခံရပြီး ဗိုလ်တစ်ဦးအပါအဝင် ထိခိုက်သေဆုံးသူများ၍ ကြည်း၊ ရေ၊ လေပေါင်းပြီး ခုခံနေရ

ဧရာဝတီတိုင်းမ်
‎ဇန်နဝါရီ ၈ ရက်
‎‎

ကျောက်ဖြူရှိ ရေတပ်ဌာနချုပ်အပါအဝင် စစ်တပ်စခန်းများကို AAကတိုက်ခိုက်လျက်ရှိပြီး ဓညဝတီရေတပ်ဌာနချုပ်မှ ထွက်လာသည့် စစ်ကြောင်းကိုလည်း ကြားဖြတ်တိုက်ခိုက်လိုက်ကြောင်း သိရသည်။
‎‎

အင်အား ၁၀၀ ခန့်ပါ စစ်ကော်မရှင်စစ်ကြောင်းတစ်ခု ဓညဝတီရေတပ်ဌာနချုပ်မှထွက်အလာ ဦးကင်းကျေးရွာအနီးတွင် AA၏ ကြားဖြတ်တိုက်ခိုက်မှုကို ခံရပြီး စစ်ကော်မရှင် ဗိုလ်တစ်ဦးအပါအဝင် စစ်ကြောင်းအတွင်း ထိခိုက်ဒဏ်ရာရရှိသူများကြောင်း သိရသည်။
‎‎

“ရန်ကုန်ကနေစစ်ကူပို့ထားတဲ့တပ်တွေကို သစ်ပုတ်တောင်တပ်ထဲစုထားတာရှိတယ်။ အဲဒီ့အင်အားတွေက စစ်ကြောင်းထိုးဖို့ထွက်လာတာ။ နေရာတင်သေဆုံးတာ ၁၀ယောက်ကျော်တယ်ပြောကြတယ်။ စစ်ကြောင်းတော့ ပျက်သွားတယ်” ဟု ကျောက်ဖြူ သတင်းရင်းမြစ်က ဧရာဝတီတိုင်းမ်ကို ပြောသည်။

တိုက်ပွဲဖြစ်ပွားရာနေရာကို စစ်ကော်မရှင်က လေကြောင်းမှ နေ၍ ပေါင် ၅၀၀ဗုံး၊ ပေါင် ၂၀၀ဗုံးများကြဲချတိုက်ခိုက်သည့်အပြင် ရေတပ်ဌာနချုပ်မှ လက်နက်ကြီးများဖြင့် ပစ်ခတ်တိုက်ခိုက်ခဲ့သည်။
‎

AAတပ်များမှာ စစ်ကော်မရှင် တပ်စခန်းများကို စစ်ကြောင်းထိုးတိုက်ခိုက်ခြင်း၊ ကြားဖြတ်တိုက်ခိုက်ခြင်းများပြုလုပ်လာရာ စစ်ကော်မရှင်တပ်များ အထိနာပြီး မြို့အနီးထိ တပ်ဆုတ်လာရကြောင်း သိရသည်။
‎

ဓညဝတီရေတပ်နှင့် အမှတ် ၃၂ရဲတပ်ရင်းတို့ကိုလည်း လက်နက်ကြီး၊ ဒရုန်းများဖြင့် ပစ်ခတ်တိုက်ခိုက်ထားရာ အရာရှိများအပါအဝင် သေဆုံးထိခိုက်သူများကြောင်း ဒေသတွင်းသတင်းဖော်ပြချက်များအရ သိရသည်။
‎

ကျောက်ဖြူတွင် AAထိုးစစ်အရှိန်မြှင့်လိုက်ပြီးနောက် စစ်ကော်မရှင်တပ်များ ဆက်တိုက် တပ်ဆုတ်နေရကာ မြို့နှင့်နီးကပ်လာသည့် AAတပ်ဖွဲ့များ မြို့အတွင်းမဝင်နိုင်ရန် စစ်ကြောင်းများစေလွှတ်ပြီး ခုခံကာကွယ်ရန်ကြိုးစားနေကြောင်း သိရသည်။