ဧရာဝတီတိုင်းမ်
နိုဝင်ဘာ ၂၆ ရက်
လာမယ့်ရွေးကောက်ပွဲ ကျင်းပပြီးလျင်ပင် အာဆီယံအဖွဲ့က မြန်မာစစ်ကော်မရှင်နဲ့ ပြန်လည်ထိ တွေ့ဆက်ဆံဖို့ ခက်ခဲမယ်လို့ ထိုင်း နိုင်ငံခြားရေးဝန်ကြီး ဆီဟာဆတ်ဖောင်ကတ်ကီယိုက နိုဝင်ဘာလ ၂၅ ရက်မှာ ပြောကြားခဲ့ပြီး တိုင်းပြည်ရဲ့ ထိန်းသိမ်းခံခေါင်းဆောင်ဟောင်း ဒေါ်အောင်ဆန်းစုကြည်ကို လွှတ် ပေးဖို့ တောင်းဆိုလိုက်ပါတယ်။
“လက်ရှိအခြေအနေနဲ့ အားလုံးပါဝင်သော တွေ့ဆုံဆွေးနွေးမှုတွေ မပြုလုပ်ရသေးတဲ့အချိန်မှာ ရွေးကောက်ပွဲပြုလုပ်တာဟာ ကျွန်တော်တို့အတွက် မြန်မာစစ်ကော်မရှင်နဲ့ ပြန်လည်ထိတွေ့ဆက်ဆံဖို့ ခက်ခဲစေပါလိမ့်မယ်” လို့ ထိုင်း နိုင်ငံခြားသတင်းထောက်များအသင်းမှာကျင်းပတဲ့ အခမ်းအနားမှာ ၎င်း က ပြောပါတယ်။
“ကျွန်တော်တို့ ဒီရပ်တည်ချက်နဲ့ စည်းလုံးညီညွတ်မှုကို ထိန်းသိမ်းနိုင်ဖို့ မျှော်လင့်ပါတယ်” လို့ သူ က ဆက်ပြောပါတယ်။
စစ်ကော်မရှင်ဟာ ၂၀၂၁ ခုနှစ် အာဏာသိမ်းမှုအပြီး စစ်တပ်အာဏာထိန်းချုပ်မှုကို ကြာရှည်စေ မယ့် အတုအယောင်ရွေးကောက်ပွဲကို ဒီဇင်ဘာလ ၂၈ ရက်မှစပြီး အဆင့်လိုက်ကျင်းပဖို့ စီစဉ်ထားပါ တယ်။
ဒီမိုကရေစီပါတီအများအပြားကို ရွေးကောက်ပွဲမှာ ယှဉ်ပြိုင်ခွင့် ပိတ်ပင်ထားပြီး ရွေးကောက်ပွဲ ကို တစ်နိုင်ငံလုံးအတိုင်းအတာ ပြုလုပ်နိုင်မှာမဟုတ်ဖူးလို့ မင်းအောင်လှိုင်က ဝန်ခံထားပါတယ်။
တရားမျှတပြီး အားလုံးပါဝင်တဲ့ ရွေးကောက်ပွဲကျင်းပဖို့ အာဆီယံ နိုင်ငံခြားရေးဝန်ကြီးတွေက အောက်တိုဘာလအတွင်း မြန်မာစစ်ကော်မရှင်ကို တွန်းအားပေးခဲ့ပြီး ဘုံသဘောတူညီချက် (၅) ရပ်ကို လိုက်နာဖို့ တောင်းဆိုခဲ့ပါတယ်။
အသက် ၈၀ နှစ်အရွယ် ဒေါ်အောင်ဆန်းစုကြည်ဟာ အာဏာသိမ်းမှုနောက်ပိုင်း ထိန်းသိမ်းခံထား ရပြီး နှလုံးကျန်းမာရေးပြဿနာ ဆိုးရွားလာကာ အရေးပေါ် ဆေးကုသမှုခံယူဖို့ လိုအပ်နေပါတယ်။
“မြန်မာစစ်ကော်မရှင်က ဒေါ်အောင်ဆန်းစုကြည်ကို လွှတ်ပေးဖို့ စဉ်းစားရမယ့် အချိန်ရောက်ပါ ပြီ။ ဒေါ်အောင်ဆန်းစုကြည်ဟာ ကာလရှည် ထိန်းသိမ်းခံထားရပြီး ဒီအသက်အရွယ်မှာ သူ့ရဲ့ကျန်းမာရေး အခြေအနေကို ကျွန်တော်တို့ မသိပါဘူး” လို့ ဆီဟာဆတ်က ဆိုပါတယ်။
ကိုးကား – Reuters
Ref; ASEAN re engagement with Myanmar ‘difficult’ even after polls, Thai foreign minister says
