ဧရာဝတီတိုင်းမ်
နိုဝင်ဘာ ၁၃ ရက်
အမေရိကန်ပြည်ထောင်စုက အာဏာသိမ်းစစ်တပ်၏ လက်ဝေခံတပ်ဖွဲ့တစ်ခုဖြစ်သည့် ဒီမိုကရေစီအကျိုးပြုကရင့်တပ်မတော်(DKBA) ခေါင်းဆောင် လေး ဦးနှင့် ထိုင်းနိုင်ငံသား တစ် ဦး အပါအဝင် ဆက်စပ်နေသည့် ကုမ္ပဏီနှစ်ခုကို ဒဏ်ခတ်ပိတ်ဆို့ခဲ့ကြောင်း ထုတ်ပြန်ခဲ့သည်။
DKBAခေါင်းဆောင်လေးဦးဖြစ်သည့် စောစတီး၊ စိုင်းကျော်လှ၊ စောစိန်ဝင်း၊ စောဆန်းအောင် တိုနှင့်အတူ တရုတ်ရာဇဝတ်ဂိုဏ်းများနှင့် DKBAအပါအဝင်လက်နက်ကိုင်တပ်ဖွဲ့များကို ချိတ်ဆက်ပေးသည့် ထိုင်းနိုင်ငံသား Chamu Sawang တို့ကို အမေရိကန်ဘဏ္ဍာရေးဝန်ကြီးဌာန၏ နိုင်ငံခြားသားပိုင်ဆိုင်မှုထိန်းချုပ်ရေးရုံး(OFAC) က ပိတ်ဆို့ဒဏ်ခတ်မှုပြုလုပ်ခဲ့ခြင်း ဖြစ်သည်။
ထို့ပြင် DKBAတပ်ဖွဲ့၏ ကျားဖြန့်လုပ်ငန်းများနှင့် ဆက်စပ်သည့် မြန်မာအခြေစိုက် Troth Star Company နှင့် ထိုင်းနိုင်ငံ၊ မဲဆောက်အခြေစိုက် Trans Asia International Holding Group Thailand Company တို့ကိုပါ အရေးယူမှုများပြုလုပ်ခဲ့ကြောင်း သိရသည်။
“မြန်မာနိုင်ငံမှာ လည်ပတ်နေတဲ့ ရာဇ၀တ်ကွန်ရက်တွေဟာ အွန်လိုင်းလိမ်လည်မှုတွေကနေတဆင့် အလုပ်ကြိုးစားတဲ့ အမေရိကန်နိုင်ငံသားတွေဆီကနေ ဒေါ်လာဘီလီယံပေါင်းများစွာကို ခိုးယူနေကြတယ်” ဟု ဘဏ္ဍာရေးဝန်ကြီးဌာန၏ အကြမ်းဖက်မှုနှင့်ငွေကြေးစုံစမ်းထောက်လှမ်းရေးဆိုင်ရာလက်ထောက်အတွင်းရေးမှူးJohn K. Hurley က ပြောဆိုခဲ့သည်။
အရှေ့တောင်အာရှအခြေစိုက် အွန်လိုင်းရာဇဝတ်လိမ်လည်မှုလုပ်ငန်းများမှာ အမေရိကန်နိုင်ငံသားများကို ပစ်မှတ်ထားလာပြီး ပြီးခဲ့သည့် ၂၀၂၄ ခုနှစ်တစ်နှစ်တာအတွင်း ဒေါ်လာ ၁၀ ဘီလီယျံကျော် လိမ်လည်ခြင်းခံခဲ့ရပြီး ယခင်နှစ်များထက် ၆၆ ရာခိုင်နှုန်းခန့် ပိုမိုများပြားလာခဲ့ကြောင်း သိရသည်။
ထို့ပြင် အမေရိကန်အစိုးရက ကျားဖြန့်လိမ်လည်မှုဂိုဏ်းများကို နှိမ်နင်းရန် Federal Bureau of Investigation’s(FBI) နှင့် US Secret Service (USSS) တို့ပူးပေါင်းကာ Scam Center Strike Force ကိုဖွဲ့စည်းခဲ့ကြောင်းလည်း သိရသည်။
Scam Center Strike Force သည် OFAC၊ နိုင်ငံခြားရေးဝန်ကြီးဌာနအပါအဝင် သက်ဆိုင်ရာအေဂျင်စီများနှင့် ပူးပေါင်းကာ မြန်မာ၊ လာအို၊ ကမ္ဘောဒီးယားတို့ရှိ ကျားဖြန်ငွေကြေးလိမ်လည်မှုဂိုဏ်းများကို ဖမ်းဆီးခြင်း၊ ပိတ်ဆို့အရေးယူခြင်း၊ ငွေကြေးစနစ်များကိုကာကွယ်ခြင်း၊ လိမ်လည်ခံရသူများကို ကူညီပေးခြင်းတို့ လုပ်ဆောင်သွားမည်ဖြစ်ကြောင်း သိရသည်။
လက်ရှိတွင် ကရင်ပြည်နယ်၊ မြဝတီမြို့အနီးရှိ Tai Chang၊ Huanya နှင့် KK Park ကျားဖြန့်ရုံးများမှာ DKBA အဖွဲ့နှင့်ပတ်သက်ဆက်နွယ်နေကြောင်းလည်း အမေရိကန်ကပြောဆိုခဲ့သည်။
ပိတ်ဆို့အရေးယူခံထားရသည့် DKBA ခေါင်းဆောင်များ၏ အမေရိကန်ရှိ ပိုင်ဆိုင်မှုများကို ရပ်ဆိုင်းထားပြီး အမေရိကန်နိုင်ငံသားများနေဖြင့် ၎င်းတို့နှင့်ဆက်စပ်သည့် ငွေကြေးလွှဲပြောင်းမှုများ၊ စီးပွားရေးလုပ်က်ုဆောင်ရွက်မှုများရှိလာပါက ရေးယူခံရမည်ဖြစ်ကြောင်းလည်း ထုတ်ပြန်ခဲ့သည်။
ကိုးကား – U.S. Department of The Treasury
