ဧရာဝတီတိုင်းမ်
အောက်တိုဘာ ၂၃ ရက်
ဧရာ၀တီတိုင်း၊ ပုသိမ်မြို့နယ်အတွင်းရှိ ရပ်ကွက်နှင့်ကျေးရွာများတွင် အောက်တိုဘာလ(၁၈)ရက်အထိ လူငယ်(၁၀)ဦးခန့်ကို အုပ်ချုပ်ရေးမှူးများက ကြိုတင်အသိပေးခြင်းမရှိပဲ စစ်မှုထမ်းရန် အဓမ္မဖမ်းဆီး ခေါ်ဆောင်ခြင်းခံခဲ့ရကြောင်း သိရသည်။
စစ်မှုထမ်းအစားထိုးရန် လစဥ်ငွေထည့်နေသော်လည်း လူငယ်များကို စစ်တပ်နှင့်အုပ်ချုပ်ရေးအဖွဲ့များမှ ကြိုတင်အကြောင်းကြားခြင်းမရှိပဲ စစ်မှုထမ်းရန် ဖမ်းဆီးခေါ်ဆောင်သွားခြင်းဖြစ်ကြောင်း ဒေသခံများက ပြောသည်။
“ပိုက်ဆံကတော့ လတိုင်းထည့်နေရတယ် လာပြီးခေါ်သွားတော့ မြို့နယ်ကတိုက်ရိုက်လာခေါ်တာဆိုပြီး အုပ်ကြီးကလွှဲချတယ်”ဟု ပုသိမ်ဒေသခံတစ်ဦးမှ ဧရာ၀တီတိုင်းမ်ကိုပြောသည်။
ပြီးခဲ့သည့်အောက်တိုဘာ ၁၅ ရက်နေ့တွင်အမှတ်(၁၀)ရပ်ကွက်နှင့်ရေအိုးစင်ကျေးရွာတို့မှ လူငယ်နှစ်ဦးကို စစ်မှုထမ်းရန်အတွက် အတင်း၀င်ရောက်ဖမ်းဆီးခေါ်ဆောင်သွားကြောင်း ဒေသခံများထံများထံမှသိရသည်။
လက်ရှိတွင်ခေါ်ဆောင်ခံရသူ လူငယ်များကို စစ်ကောင်စီတပ်များအတွင်း ခေါ်ဆောင်ထားပြီး မိဘများနှင့်ဆက်သွယ်ခွင့်မပေးပဲ စစ်သင်တန်းဆင်းမှ ဆက်သွယ်ခွင့်ရမည်ဟုသိရသည်။
စစ်ကော်မရှင်အနေဖြင့် ရှေ့တန်းစစ်မျက်နှာပြင်သို့ ပို့ဆောင်ရန် တပ်ဖွဲ့ဝင်အင်အားဖြည့်ဆည်းရန်အတွက် ဧရာ၀တီတိုင်းအပါအ၀င် အခြားတိုင်းနှင့်ပြည်နယ် အချို့တွင် လူငယ်များကို အဓမ္မဝင်ရောက်ဖမ်းဆီးမှုများ ပိုမိုလုပ်ဆောင်လာကြောင်း သိရသည်။
