ဆွမ်ပရာဘွမ်မြို့နယ်အတွင်း ကြွက်များသောင်းကျန်းနေမှုကြောင့် စပါးခင်းများပျက်စီးဆုံးရှုံးနေ

အောင်မြသန်း /ဧရာဝတီတိုင်းမ်
(မြစ်ကြီးနား)၊ စက်တင်ဘာလ ၄ ရက်

ကချင်ပြည်နယ်၊ ဆွမ်ဘရာဘွမ်မြို့နယ်အတွင်း ကြွက်များက စပါးခင်းများကို ဝင်ရောက်ဖျက်စီးနေမှုကြောင့် ဒေသခံများ၏ စပါးခင်းများ ပျက်ဆီးမှုဖြစ်ပေါ်နေကြောင်း သိရသည်။
ကြွက်များ၏ ကိုက်ဖြတ်စားသောက်မှုကြောင့် ဆွမ်ပရာဘွမ်မြို့နယ်အတွင်းရှိ စပါးခင်းအားလုံးပျက်ဆီးနေကြောင်း ဒေသခံတောင်သူများထံမှ သိရသည်။

“ကြွက်တွေကရှင်းလို့မနိုင်တော့ဘူး။ ကြွက်ဘေးသင့်ပုံစံဖြစ်နေပြီ။ စပါးခင်းတွေအကုန်ဖျက်​ဆီးတာလေ။ လာမဲ့နှစ်တော့ ဆန်ရှားပါးတဲ့အခက်ခဲ ရင်ဆိုင်ရတော့မယ်” ဟု တောင်ယာလုပ်ကိုင်နေသည့် ​​ဒေသခံအမျိုးသမီးတစ်ဦးက ဧရာဝတီတိုင်းမ်ကို ပြောသည်။

ဆွမ်ပရာဘွမ်မြို့နယ်တွင် ၁၉၇၃ ခုနှစ်ကလည်း ကြွက်များ၏ သောင်းကျန်းမှုကြောင့် စစ်တပ်က ကြွက်စစ်ဆင်ရေးအမည်ဖြင့် နှိမ်နင်းခဲ့ရသေးကြောင်း ဒေသခံများထံမှ သိရသည်။

“ခုဆို တောင်ယာမှာရှိတဲ့ စပါးခင်းတွေအကုန်ပျက်စီးကုန်တာလေ။ အဘိုးအဘွားတွေလက်ထက်ကလည်း ခုလိုဖြစ်ဘူးတယ်။ ၁၉၇၃ ခုနှစ်က ခုထပ်ပိုဆိုးတယ်။ ကြွက်စစ်ဆင်ရေးဆိုပြီး စစ်တပ်ကတောင်နှိမ်းနင်းခဲ့ရဘူးတယ်။ ကြွက်တကောင်တကောင်ကို ပိသာချိန် ၁၀နဲ့ချီရှိတယ်။ ခုလိုပဲ တောင်ယာတည်းတွေ လူနေအိမ်တွေကိုပါဖျက်​ဆီးလို့ ဆွမ်ဘရာဘွမ်၊ ဘုန်အင်ဘုန်ချမ်၊ ဘုန်ဝမ်၊ အင်ဂျမ်းယမ်၊ မလန်းယမ်၊ ကရွာတွေပါ နေထိုင်ကြတဲ့လူတွေ ထွက်ပြေးကြရတဲ့အထိဖြစ်ခဲ့ဘူးတယ်လို့ အဘိုးအဘွားတွေက ပုံပြင်စံစံပြေားခဲ့ဘူးတယ်လေ။ ခုက လမ်းပန်းဆက်သွယ်မှုကလည်းအရမ်းခက်ခဲတော့ လာမဲ့နှစ်မှာ ဆန်ရှာပါးမှာကျိန်းသေတယ်”ဟု ဒေသခံတစ်ဦးက ဧရာဝတီတိုင်းမ်ကို ပြောသည်။

လက်ရှိ​တွင် လမ်းပန်းဆက်သွယ်ရေးခက်ခဲသည့် ဆွမ်ဘရာဘွမ်မြို့နယ်ရှိ ဆွမ်ပီယမ်၊ ဖုန်အင်၊ ဖုန်ချမ်၊ ဖုန်ဝမ်၊ အင်ဂျမ်းယမ် မလမ်းယမ်၊ လုံရှမ်ယမ် စသည့်ကျေးရွာများတွင် ဆန်ကြမ်းတစ်အိတ်လျှင် ကျပ်ငွေ တစ်သိန်းအထိ ပေးဝယ်နေရကြောင်း ဒေသခံများထံမှ သိရသည်။