ဧရာဝတီတိုင်းမ်
အောက်တိုဘာ ၅ရက်
မကွေးတိုင်း၊ ငဖဲမြို့နယ်၊ နတ်ရေကန်ဗျူဟာစခန်း ပိတ်ဆို့တိုက်ခိုက်ခံနေရသည့်အတွက် စစ်ကော်မရှင် က စခန်းအနီး ကျေးရွာတချို့ကို မီးရှို့ဖျက်ဆီးမှုများ ပြုလုပ်ခဲ့ကြောင်း သိရသည်။
ဂုတ်ကြီးထောက်ပို့စခန်းကို အာရက္ခတပ်တော် (AA) ကသိမ်းယူပြီး နတ်ရေကန်စခန်းကိုပါ ပိတ်ဆို့ ထားသည့်အတွက် စစ်ကော်မရှင်တပ်က ဂုတ်ကြီးအနီးရှိ မြေလပ်ရွာကို ပြီးခဲ့သည့် အောက်တိုဘာ ၃ ရက်နေ့က မီးရှို့ဖျက်ဆီးခဲ့ကြောင်း ဒေသတွင်းသတင်းရင်းမြစ်များထံမှ သိရသည်။
”ဂုတ်ကြီး စခန်းအသိမ်းခံရပြီး နတ်ရေကန်စခန်းပါ ပိတ်ဆို့ခံထားရတော့ လေယာဉ်နဲ့ ဆက်တိုက် ဗုံးကြဲတယ်။ ဒရုန်းဗုံးတွေလည်း အကြိုက်သုံးပြီး စစ်တပ်ကခုခံနေတယ်” ဟု ပဒါန်းစစ်ရေး သတင်းရင်းမြစ်က ဧရာဝတီတိုင်းမ်ကို ပြောသည်။
ထို့အပြင် ယနေ့ အောက်တိုဘာ ၅ရက်နေ့အထိ ဂုတ်ကြီးကျေးရွာ အနီးတဝိုက်တွင် တိုက်ပွဲအပြင်း အထန်ဖြစ်ပွားလျက်ရှိပြီး ပြီးခဲ့သည့် အောက်တိုဘာ ၁ရက်နေ့နှင့် အောက်တိုဘာ ၂ရက်နေ့တို့တွင် နတ်ရေကန်အနီး၌ စစ်ကော်မရှင်နှင့် AAပူးပေါင်းတပ်တို့ တိုက်ပွဲ ဖြစ်ပွားခဲ့ကြောင်း သိရသည်။
စစ်ကော်မရှင်က ဂုတ်ကြီး၊ နောင်ရွာ၊ ဗစီ၊ ပဘဲကျေးရွာများကို လေကြောင်းမှ ဗုံးအလုံးရေ ၅၀ ခန့်ဖြင့် နေ့စဉ်တိုက်ခိုက်ခဲ့ကြောင်း သတင်းရင်းမြစ်များထံမှ သိရသည်။
နတ်ရေကန်လေကြောင်းကာကွယ်ရေးတပ်စခန်းကို စစ်ကော်မရှင်က အမှတ်(၉၀၅) အမြောက်စခန်း ကွပ်ကဲမှု ဌာနချုပ် (မစခ-၉၀၅) မှနေ၍ စစ်သုံးကားကြီးအင်အားအပြည့်ဖြင့် စစ်ယာဉ်တန်းများစွာကို အင်အားဖြည့်နေပြီး အမှတ်(၁၇)စစ်ဆင်ရေးကွပ်ကဲမှုဌာနချုပ် (စကခ-၁၇) လက်အောက်ခံ တပ်ရင်းများဖြင့်လည်း တပ်ဖြန့်ထားကြောင်း သိရသည်။
စစ်ကော်မရှင်က အမ်းမြို့နယ်ကို လက်လွှတ်လိုက်ရပြီးနောက် AA တပ်ဖွဲ့ဝင်များသည် အမ်း- ပဒါန်းလမ်းပိုင်းကို စိုးမိုးမှုရယူနိုင်ရန်ကြိုးစားခဲ့ပြီး စစ်ကော်မရှင်၏ ကာကင်းစခန်းများကို သိမ်းယူ နိုင်ခဲ့သည်။
စစ်ကော်မရှင်က ပဒါန်းတပ်နယ်ရှိ အကြီးဆုံး နတ်ရေကန်စခန်းကို ကာကွယ်ရန် အားထုတ်နေရပြီး သာလွန်အင်အားနှင့် လေကြောင်းပစ်ကူများပါအသုံးပြုနေရခြင်းဖြစ်သည်။
ပုံစာ-စစ်ကော်မရှင်တပ်မ (၉၉) တပ်ဖွဲ့ဝင်များ (ပုံဟောင်း)
