KIA သိမ်းပိုက်ထားသည့် ဆော့လော်မြို့နယ် လန်ဆယ်ဒေသကို စစ်ကော်မရှင်စစ်ကြောင်းထိုး

‎ဧရာဝတီတိုင်းမ်
‎စက်တင်ဘာ ၂၁ ရက်
‎
‎ကချင်ပြည်နယ်၊ ဆော့လော်မြို့နယ်၊ လန်ဆယ်ဒေသကို စစ်ကော်မရှင်တပ်များက စစ်ကြောင်းထိုးလာ၍ တိုက်ပွဲဖြစ်ပွားနေကြောင်း သိရသည်။
‎
‎ယနေ့ စက်တင်ဘာ ၂၁ ရက် နံနက်အစောပိုင်းအချိန်မှစ၍ စစ်ကော်မရှင်နှင့် ပြည်သူ့စစ်ပူးပေါင်းစစ်ကြောင်း ထိုးတက်လာ၍ KIAနှင့်တိုက်ပွဲဖြစ်ပွားနေကြောင်း သတင်းရင်းမြစ်များထံမှ သိရသည်။
‎
‎”လန်ဆယ်ကျေးရွာအနီးထိ ကပ်လာပြီး အင်အားလည်းအပြည့်သုံးလာတဲ့ စစ်တပ်နဲ့ ထိတွေ့တိုက်ပွဲဖြစ်နေပါတယ်။ လန်ဆယ်ကို သိမ်းတယ်ဆိုတာတော့မမှန်ပါဘူး။ တပ် အဆုတ် အတက်ရှိတာတော့ မှန်ပါတယ်” ဟု ကချင်သတင်းရင်းမြစ်က ဧရာဝတီတိုင်းမ်ကို ပြောသည်။
‎
‎ပြီးခဲ့သည့် စက်တင်ဘာ ၁၉ ရက်နေ့က စစ်ကော်မရှင်နှင့် ပြည်သူ့စစ်ပူးပေါင်းတပ်တို့ က လန်ဆယ်မြို့ကို စစ်ကြောင်းထိုးဝင်ရောက်လာခြင်းဖြစ်သည်။
‎
‎
‎ပြည်သူ့စစ်များကို မြေပြင်စစ်ကြောင်းထိုးတက်နိုင်ရေးအတွက် စစ်ကော်မရှင်က လူအင်အားအပါအဝင် လက်နက်ခဲယမ်း အမြောက်အမြားကိုလည်း ထောက်ပံ့ပေးခဲ့ကြောင်း သတင်းရင်းမြစ်များထံမှ သိရသည်။
‎
‎လန်ဆယ်ဒေသသည် ရွှေထွက်ရာ ဒေသဖြစ်သည့်အတွက် စစ်ကော်မရှင်က သိမ်းဆည်းလိုခြင်းဖြစ်ပြီး ရွေးကောက်ပွဲမကျင်းပနိုင်သည့် ဆော့လော်ဒေသကိုပါ စစ်ရေးချဲ့လိုခြင်းလည်းဖြစ်​သည်။
‎
‎စက်တင်ဘာ ၂၀ရက်နေ့တွင် စစ်ကော်မရှင်၏ တပ်များနှင့်တန်ဂူတန်ပြည်သူ့စစ်များ KIAတပ်မဟာ၇ တပ်ရင်း ၃၃နယ်မြေ လန်ဆယ်အထက်တောင်ကုန်းတကြောကို ဝင်ရောက်လာ၍ ထိတွေ့တိုက်ပွဲဖြစ်ပွားနေကြောင်း သိရသည်။
‎
‎စစ်ကော်မရှင်ထောက်ခံသူများက လန်ဆယ်ကို စစ်ကော်မရှင်တပ်ဖွဲ့က ပြန်လည်သိမ်းယူပြီးဖြစ်ကြောင်း တပ်ထောက်ခံ တယ်လီဂရမ် ချယ်နယ်များတွင် ရေးသား အောင်ပွဲခံနေကြသည်။
‎
ပုံစာ-KIA တပ်ဖွဲ့ဝင်များ(ပုံဟောင်း)