ဧရာဝတီတိုင်းမ်
ဩဂုတ် ၂၉ ရက်
ဧရာ၀တီတိုင်း၊ သာပေါင်းမြို့နယ်အတွင်းရှိကျေးရွာများတွင် မဲပေးစက်သရုပ်ပြပွဲများလိုက်လံပြုလုပ်နေကြောင်း သတင်းရရှိသည်။
အဆိုပါ မဲပေးစက်သရုပ်ပြပွဲကို ပြည်သူများအနေဖြင့် မလာမနေရဟု အုပ်ချုပ်ရေးအဖွဲ့ များက ဖိအားပေး ခေါ်ယူပြုလုပ်ခြင်းဖြစ်ကြောင်း ဒေသခံများထံက သိရသည်။
“အလုပ်ရှိလည်း မဲပေးနည်းပြတဲ့နေရာကိုလာရမယ်။ ရောက်ရင် လက်မှတ်ထိုးရတယ်၊ မလာတဲ့အိမ်ဆို ပြသနာရှာမှာစိုးလို့ အလုပ်ဖျက်ပြီးသွားရတယ်”ဟု ဒေသခံတစ်ဦးမှ ဧရာ၀တီတိုင်းမ်ကိုပြောသည်။
သာပေါင်းမြို့နယ်ရှိ ဥသျှစ်ကျေးရွာအုပ်စု၊ ခေနန်ကျေးရွာအုပ်စု၊မကျည်းကုန်းကျေးရွာအုပ်စု၊ကြို့ကုန်းကျေးရွာအုပ်စု၊ဘုရားကုန်းကျေးရွာအုပ်စု၊ဆောင်ဘုံကျေးရွာအုပ်စု၊ဇီးဖြူကွင်းကျေးရွာအုပ်စုတို့တွင် မဲပေးစက်သရုပ်ပြပွဲ များကို ဖိအားပေးပြုလုပ်ခဲ့ကြသည်ဟု ဆိုသည်။
ဧရာ၀တီတိုင်းတွင် သြဂုတ်လ ဒုတိယပါတ်မှ စတင်ပြီး ရပ်ကွက်နှင့် ကျေးရွာ များတွင် စစ်ကောင်စီမှ ကျင်းပမည့် ရွေးကောက်ပွဲအတွက် မဲပေးနည်း အသိပညာပေးခေါင်းစဥ်များဖြင့် ပြည်သူများကို ဖိအားပေးခေါ်ယူ ကာပြုလုပ်နေခြင်းဖြစ်ပြီး ပြည်သူ့စစ်၊ ရဲများမှ လုံခြုံရေးယူစောင့်ကြည့်ကြကြောင်းသိရသည်။
