ဧရာဝတီတိုင်းမ်
သြဂုတ် ၂၉ ရက်
မလေးရှားနိုင်ငံ၊ ပါဟန်းပြည်နယ်၊ စိုက်ပျိုးရေးခြံတွင် အလုပ်လုပ်ကိုင်နေသည့် ချင်းအမျိုးသား ခုနှစ်ဦးသည် သင်းခွေချပ် ဖမ်းဆီးသတ်ဖြတ်သည့်အတွက် တရားရုံးမှ ထောင်ဒဏ် ရှစ်နှစ် နှင့် လေးလ ချမှတ်ခဲ့ကြောင်း မလေးရောက် ချင်းမျိုးများထံမှ သိရသည်။
ပါဟန်းပြည်နယ်ရှိ ရွှေ့ပြောင်းမြန်မာများ လုပ်ကိုင်နေသည့် စိုက်ပျိုးရေးခြံတွင် ယခုနှစ်အစောပိုင်း အာဏာပိုင်အဖွဲ့မှ ရှောင်တခင် ဝင်ရောက် စစ်ဆေးစဥ် သင်းခွေချပ် သတ်ဖြတ်ထားသည့် အရေခွံများ လက်ဝယ်တွေ့ရှိသည့်အတွက် ဖမ်းဆီးခံရခြင်းဖြစ်သည်။
ဖမ်းဆီးခံရသူများကို မလေးရှားသစ်တောဌာနမှ သင်းခွေချပ်အခွံ ၄၇၇ ခုလက်ဝယ်တွေ့ရှိမူ၊ သားကောင်ဖမ်းရန် ကြိုးလက်ဝယ်တွေ့ရှိမူ၊ ကြံ့သူတော်၏အရိုးစု တွေ့ရှိမူ၊ အသားခြောက်တွေ့ရှိမူဖြင့် တရားရုံးစွဲဆိုခဲ့ခြင်းဖြစ်သည်။
“သူတို့ မီးဖိုချောင်းမှာ သတ်ဖြတ်ထားတဲ့ သင်းခွေချပ် အရေခွံတွေ အများကြီးတွေ့တယ်။ အသားခြောက်တွေ့တယ်။ တခြားသားကောင် အရိုးစုတွေ တွေ့လို့ ဖမ်းဆီးသွားတာပါ။ သူတို့ဖမ်းဆီးပြီး တရားစွဲတာပါ” ဟု လူမှုကူညီရေးဆောင်ပေးသူ ချင်းအမျိုးသားတစ်ဦးက ဧရာဝတီတိုင်းမ်ကို ပြောသည်။
ဖမ်းဆီးခံရသူများကို ပါဟန်းပြည်နယ်၊ တမာလူးတရားရုံးက ယနေ့ သြဂုတ် ၂၉ ရက်နေ့တွင် သင်းခွေချပ်ဖမ်းဆီးမူဖြင့် ထောင်ဒဏ် ငါးနှစ် နှင့်ငွေဒဏ် ရင်းဂစ် ၁၅၀၀၀၀ ချမှတ်ပြီး ငွေဒဏ်မပေးဆောင်နိုင်ပါက ငွေဒဏ်
အစားထောင်ဒဏ် နှစ်နှစ် ကျခံရန်အမိန့်ချမှတ်ခဲ့သည်။
“အမှု့ လေးမှု့နဲ့တရားစွဲဆို ခံရတာပါ။ အဓိကတော့ သင်းခွေချပ် ဖမ်းဆီးသတ်ဖြတ်မှုပါ။ အဲဒါကို မလေးရှားအစိုးရက ပြင်းပြင်းထန်ထန် တားမြစ်ထားပါတယ်။ မလေးရှားအစိုးရက သားကောင်ဖမ်းဆီး သတ်ဖြတ်မှုကို မကြိုက်ဘူး။ ဥပဒေတွေ ပြဋ္ဌာန်းထားတယ်။ ဒီနိုင်ငံမှာနေတဲ့ကာလ ဒီက ဥပဒေကို လိုက်နာဖို့လည်းလိုတယ်”ဟု လူမှုကူညီရေးဆောင်ရွက်ပေးသူတစ်ဦးက ဧရာဝတီတိုင်းမ်ကို ပြောသည်။
မလေးရှားနိုင်ငံ သစ်တောအက်ဥပဒေပြဌာန်းချက်တွင် သင်းခွေချပ်အခွံတစ်ခုတန်းဖိုးသည် မလေးရှားရင်းဂစ် ၁၅၀၀၀ ရှိပြီး၊ သင်းခွေချပ်တစ်ကောင်ဖမ်းဆီးသည့်ပြစ်ဒဏ်သည် ထောင်ဒဏ် ၁၅ နှစ်အထိချမှတ်နိုင်ကြောင်း ပြဌာန်းထားသည်။
