ဧရာဝတီတိုင်းမ်
ဩဂုတ် ၁ရက်
ကချင်ပြည်နယ်၊ ရွှေကူမြို့နယ်တွင် ကမ်းကပ်ထားသည့် စစ်ကော်မရှင်၏ စစ်ရေယာဉ်အုပ်စုသည် ဗန်းမော်ဘက်သို့ ဦးတည် တက်လာနေပြီး တော်လှန်ရေးပူးပေါင်း တပ်ဖွဲ့များနှင့် တိုက်ပွဲအပြင်းအထန် ဖြစ်ပွားခဲ့ကြောင်း သိရသည်။
ယနေ့ ဩဂုတ် ၁ရက်နေ့တွင် ရွှေကူမှထွက်ခွာလာသော စစ်ရေယာဉ်အုပ်စုကို တော်လှန်ရေး ပူးပေါင်းတပ်များက တိုက်ခိုက်ခဲ့ကြောင်း သိရသည်။
”နှစ်ဖက်အပြန်အလှန်ပစ်ခတ်နေကြတယ်။ စစ်တပ်ကလေယာဉ်မျိုးစုံသုံးပြီးတော့ကို ဗုံးကြဲတယ်။ မြစ်ကျဉ်းရောက်ရင် စစ်သင်္ဘောတွေ ကျန်မှာတောင်မဟုတ်တော့ဘူး” ဟု တော်လှန်ရေးတပ်ဖွဲ့နှင့် နီးစပ်သူတစ်ဦးက ဧရာဝတီတိုင်းမ်ကို ပြောသည်။
စစ်ကောင်စီဘက်ကလည်း စစ်သင်္ဘောများမှနေ၍ လက်နက်ကြီး၊ စက်သေနတ်များဖြင့် အပြန်အလှန် ပစ်ခတ်ခဲ့ပြီး လေယာဉ်မျိုးစုံသုံး၍ ဗုံးကြဲတိုက်ခိုက်ခဲ့ကြောင်း တော်လှန်ရေးအဖွဲ့များနှင့် နီးစပ်သူထံမှ သိရသည်။
မန္တလေးမှ ဧရာဝတီမြစ်ကြောင်းအတိုင်းတက်လာသည့် စစ်သင်္ဘောများကို တော်လှန်ရေးတပ်ပေါင်း စုများက ဆီးကြိုတိုက်ခိုက်ရာ သင်္ဘောတစ်စင်း မီးလောင်ပြီး တစ်စင်း နစ်မြုပ်သွားကာ နောက်ထပ် နှစ်စင်းမှာလည်း မောင်းမရသည့် အခြေအနေရှိခဲ့ကြောင်း သိရသည်။
ကြက်တူရွေးနှုတ်သီးအောက် ဝဲမတွင် ကြားဖြတ်တိုက်ခံရသည့် စစ်သင်္ဘော ငါးစင်း အနက် သုံးစင်းမှာလည်း ရွှေကူအထိပြန်လှည့်လာရသည်။
အဆိုပါတိုက်ခိုက်မှုတွင် စစ်ကောင်စီတပ်ဖွဲ့ဝင် ၁၀ဦးခန့်သေဆုံးပြီး သင်္ဘောများပေါ်မှ စစ်ကူနှင့် လက်နက်၊ ရိက္ခာအချို့ကို ကမ်းပေါ်သို့ပို့ခဲ့ပြီး ရွှေကူကို ပြန်လည် ဆုတ်ခွာသွားသည်။ ယနေ့ ဩဂုတ် ၁ ရက်တွင် သွားလာ၍ မရတော့သည့် သင်္ဘောများကိုပါ တွန်းသင်္ဘောများဖြင့် တွန်းပြီး ဗန်းမော် ဘက်သို့ဦးတည် တက်နေကြောင်း သိရသည်။
ပုံစာ-မန္တလေးမှ ဧရာဝတီမြစ်ကြောင်းအတိုင်းတက်လာသည့် စစ်သင်္ဘောများ။
