ဧရာဝတီတိုင်းမ်
ဖေဖော်ဝါရီ ၂၅ ရက်
ဧရာ၀တီတိုင်း၊ ပုသိမ်မြို့နယ်ရှိ ရပ်ကွက်နှင့်ကျေးရွာများတွင် ၂၀၂၄ ခုနှစ် ဩဂုတ်လနောက်ဆုံးပတ်က ပြည့်သူစစ်မှုထမ်းအပါတ်စဥ် လေးအတွက် အတင်းအဓမ္မခေါ်ဆောင်ခြင်းခံခဲ့ရသည့်လူငယ် ငါးဦးသည် တိုက်ပွဲများတွင်သေဆုံးသွားပြီဖြစ်ကြောင်း သတင်းရရှိသည်။
အဆိုပါလူငယ်များသည် စစ်မှုထမ်းရန် ကြိုတင်အကြောင်းကြားခြင်းမရှိပဲ စစ်ကောင်စီက အရပ်၀တ်များ အိမ်စီးကားများအသုံးပြုကာ ဆွဲခေါ်ဖမ်းဆီးသွားခြင်းကို ခံရသူများဖြစ်ကြောင်း မိသားစုနှင့်နီးစပ်သူများကပြောသည်။
“ရွာကို အိမ်စီးကားအဖြူနဲ့လာပြီး ကောင်လေးက ခြံထဲမှာမြေတူးနေတာ အတင်း၀င်ဆွဲသွားတာ။ မိဘတွေက ဘာဖြစ်လို့ဖမ်းမှန်းမသိဘူး။ သုံးရက်လောက်ကြာမှ စစ်တပ်ထဲကိုအ၀တ်
အစားတွေပို့ခိုင်းတယ် ၊ အဲ့ထဲကအဆက်သွယ်မရတော့တာ ခုတော့တိုက်ပွဲကျသွားပြီ” ဟု ပုသိမ်မြို့နယ် သရက်ကုန်းကျေးရွာမှ စစ်မှုထမ်းရန် အတင်းအဓမ္မ ခေါ်ဆောင်ခြင်းခံရသောလူငယ်၏ မိသားစုနှင့်နီးစပ်သူတစ်ဦးက ဧရာ၀တီတိုင်းမ်ကို ပြောသည်။
လက်ရှိတွင် စစ်မှုထမ်းအပါတ်စဥ် လေးအတွက် အဓမ္မစစ်သားစုဆောင်းခံရသော ပုသိမ်မြို့ပေါ်ရှိ ရပ်ကွက်များမှလူငယ် နှစ်ဦးနှင့်ကျေးရွာများမှ လူငယ် သုံးဦး တိုက်ပွဲတွင် သေဆုံးသွားပြီဟု လာရောက်အကြောင်းကြားခဲ့ကြောင်း သိရသည်။
အဆိုပါလူငယ်များကိုသင်တန်းဆင်းပြီးနောက် အနောက်တောင်တိုင်းစစ်ဌာနချုပ် လက်အောက်ခံတပ်များတွင် တာ၀န်ချထားခဲ့ကြောင်းသိရသည်။ အဆိုပါ တပ်သားသစ်များကို ၂၀၂၄ ခုနှစ် နှစ်ကုန်တွင် ရခိုင်ပြည်နယ်သို့ စစ်ကူစေလွှတ်ခဲ့ရာမှ သေဆုံးခဲ့ခြင်းဖြစ်ကြောင်း သိရသည်။
လက်ရှိတွင် ဧရာ၀တီတိုင်းတွင်ပြည်သူ့စစ်မှုထမ်းသင်တန်းအပါတ်စဉ် ၁၀ သို့ ရောက်ရှိနေပြီးတက်ရောက်နေသူအများစုမှာ အုပ်ချုပ်ရေးမှူးများမှ ငွေပေးကာခေါ်ယူလာသူများ၊ စစ်ကောင်စီမှ အတင်းအဓမ္မဖမ်းဆီးခေါ်ဆောင်လာသူများပါ၀င်ကြောင်း သိရသည်။
ဓာတ်ပုံ- အဓမ္မစုဆောင်းခံထားရသည့် ပြည်သူ့စစ်မှုထမ်း အမှတ်စဥ်(၁၀)သင်တန်းသားများအား စစ်ပစ္စည်းများထုတ်ပေးနေစဥ်
#ပြည်သူ့စစ်မှုထမ်း #အပါတ်စဥ်၄ #အတင်းအဓမ္မစုဆောင်းခံရ #ပုသိမ်မြို့နယ် #လူငယ်အချို့ #တိုက်ပွဲတွင်သေဆုံး #Ayeyarwaddy_Times
