လာမည့်ပညာသင်နှစ်အတွက် ပုဂ္ဂလိကကျောင်းနှင့် နိုင်ငံတကာကျောင်းများ ကျောင်းလခ ဈေးတိုးမြှင့် မှုကြောင့် မိဘများအခက်တွေ့

ဧရာဝတီတိုင်းမ်
ဖေဖော်ဝါရီ ၄ ရက်

လာမည့်ပညာသင်နှစ် ၂၀၂၅- ၂၀၂၆ ခုနှစ်အတွက် ပုဂ္ဂလိက ကျောင်းများအပါအဝင် နိုင်ငံတကာ ကျောင်းများသည် ကျောင်းဝင်ကြေးနှင့် ကျောင်းလခများဈေးတိုးမြှင့်မှုကြောင့် ကျောင်းသားမိဘများ အခက်အခဲကြုံတွေ့နေရကြောင်း သိရသည်။

ပုဂ္ဂလိက ကျောင်းများနှင့် နိုင်ငံတကာကျောင်းများသည် စာသင်ကြားမှုပုံစံကျောင်းနာမည်ကြီးမှု အပေါ်မူတည်ပြီး မူလဈေးနှုန်း တစ်ဆမှ နှစ်ဆအထိ ဈေးနှုန်းပြောင်းလဲသွားကြောင်း ကျောင်းသား မိဘများထံက သိရသည်။

လက်ရှိစာသင်နှစ်ကုန်ဆုံးခြင်းမရှိသေးသော်လည်း လာမည့်စာသင်နှစ်အတွက် ကျောင်းလခများ တိုးကောက်ပြီး စာတော်သောကျောင်းသားများကိုသာလက်ခံလိုသည့်ကျောင်းများရှိကြောင်း ကောင်းထက်ကျော်ကိုယ်ပိုင်ကျောင်းတွင် ကျောင်းတက်ရောက်နေသော ကျောင်းသားမိဘများထံက သိရသည်။

“ နောက်နှစ်အတွက် ကျောင်းလခက တော်တော်များတယ်။ ငါးသောင်းကျော်တိုးတယ်။ မနှစ်ကလည်း တစ်သောင်း လောက်ဈေးတိုးသေးတယ်။ ဝင်ကြေးလည်းတိုးတယ်။ ကျောင်းသားအသစ်လည်း မဟုတ်ဘဲပေးရတယ်။ ကျောင်းသားအဟောင်းပေမယ့် သူတို့ကျောင်းအပ်ဖို့သတ်မှတ် ထားတဲ့ ရက်အတွင်း မအပ်ရင် ကျောင်းတက်ရဖို့မသေချာဘူး။ နေရာ ကျပ်လို့ဆိုပြီးက လေးတွေကိုပြောတယ်။ ကလေးတွေက ကြောက်လန့်ပြီးတော့ ကျောင်းအပ်ခိုင်းတယ်။ ခုတော့အပ်ပြီးပြီ” ဟု ကောင်းထက်ကျော် ကိုယ်ပိုင်ကျောင်းတွင် Grade 6 တက်ရောက်နေသော ကျောင်းသားမိခင်တစ်ဦးက ဧရာဝတီတိုင်းမ်ကို ပြောသည်။

ထို့အတူ နာမည်ရှိပုဂ္ဂလိက ကျောင်းများသည်လည်း ကျောင်းလခများဈေးတက်ကာ ကျောင်းလခ ပျှမ်းမျှ ကျပ် ငါးသောင်း ကျပ်နီးပါးဈေးတက်သွားသဖြင့် တစ်လလျှင် ကျောင်းလခ ကျပ် ၂၃၅,၀၀၀၊ ကျောင်းကားခ ကျပ် ၁၆၀,၀၀၀ ရှိကာ ကျောင်းသားတစ်ဦး၏ ကျောင်းအသုံးစရိတ် အနည်းဆုံး ကျပ် ၅ သိန်းရှိကြောင်း သိရသည်။

ထို့ပြင် နိုင်ငံတကာသင်ရိုးညွှန်းတမ်းဖြင့်သင်သောနိုင်ငံတကာကျောင်း IIP International School ၏ ကျောင်းစရိတ်သည် စာရင်းသွင်းခ ကျပ် ၃ သိန်း၊ ကျောင်းဖတ်စာအုပ်ဖိုး ကျပ် ၁၀ သိန်းမှ ၁၅ သိန်းအဖြစ် အတန်းလိုက်ခွဲခြားထားပြီး ကျောင်းလခ တစ်လလျှင် ကျပ် ၇ သိန်းမှ ၈ သိန်းနီးပါးဖြင့် တစ်နှစ်စာကျပ် သိန်း ၁၀၀ နီးပါကျသင့်မည်ဖြစ်ကြောင်း ယင်းကျောင်းက ထုတ်ပြန်သည်။

“ တက်တယ်။ ကျောင်းလခရော ကျောင်းကားခတွေရောတက်တယ်။ အခုဟော့နေတာဆို IIP International School ပဲ။ သူက နှစ်ဆလောက်တက်သွားတယ်။ ကျောင်းတွေအကုန်တက်ပေမဲ့သူက ပိုများသွားတယ်။ IS ( International School) တွေမှာ သူကအခြား IS တွေထက်ဈေးသင့်တော့ အဲဒီမှာကျောင်းထားတဲ့မိ ဘတွေများတယ်။ waiting list ( ကျောင်းအပ်ဖို့စောင့်ဆိုင်း) တွေများတယ်” ဟု ကျောင်းသားမိခင်တစ်ဦးက ဧရာဝတီတိုင်းမ်ကို ပြောသည်။

စစ်တပ် အာဏာသိမ်းခဲ့သည့် ၂၀၂၁ နောက်ပိုင်းမှ စတင်၍ ရန်ကုန်မြို့အပါအဝင် မြို့ကြီးများတွင် စစ်ကောင်စီစာသင် ကျောင်းထပ် ပုဂ္ဂလိက ကျောင်းများတွင် တက်ရောက်သည့် ကျောင်းသားသူဦးရေ တစ်စထက်တစ်စ ပိုမိုများလာကြောင်း စုံစမ်းသိရသည်။

” မိဘတွေမှာက အမျိုးမျိုးရှိတယ်။ အစိုးရကျောင်းထားသူ၊ ပုဂ္ဂလိက ကျောင်းထားသူ၊ နိုင်ငံတကာ ကျောင်းထားသူတောင်ဈေးသင့်တာတာ၊ ဈေးကြီးတဲ့အကောင်းဆုံးထားတာ၊ ကိုယ့်ပိုက်ဆံနဲ့ တတ်နိုင်တာ ထားကြပါ။ တချို့တွေက ကျောင်းကောင်းထားပြီးတော့ ကျောင်းအသေးတွေကို ဒီလိုကျောင်းတော့သွားမထားဘူးဆိုပြီး ပြောကြတာတွေကြားရတယ်။ မိဘတွေအနေနဲ့က ကိုယ်တတ် နိုင်တာကိုယ်ထားပေမယ့် အခြားကျောင်းတွေနိမ့်တယ်လို့ပြောတဲ့အခါ တစ်ဖက်မိဘကခံစားရတယ် ” ဟု ကျောင်းသားမိခင်တစ်ဦးက ဧရာ၀တီတိုင်းမ်ကို ပြောသည်။

လက်ရှိရင်ဆိုင်နေသည့် အထွေထွေအကျပ်အတည်းအခက်အခဲများအပြင် ကျောင်းလခများ ဈေးတက်၍ ကျောင်းသားမိခင်များပိုစိတ်ပင်ပန်းကြရပြီး ‌ဝင်ငွေနှင့်တတ်နိုင်သည့် ကျောင်းပြောင်း ထားရန် စဉ်းစားနေရပြီဖြစ်ကြောင်း ရန်ကုန်ရှိ ကျောင်းသားမိဘတစ်ဦးက ပြောကြားသည်။

” သမီးလေးကျောင်းက ဈေးအရမ်းတက်တာမဟုတ်တော့ဘာမှမဖြစ်ဘူး။ တခြားကျောင်းသားမိဘတွေ ကျတော့ နှစ်ယောက် သုံးယောက်ဆိုလို့ရှိရင်မနိုင်ဘူးဆိုတော့ ကျောင်းဈေးနည်းနည်းသက်သာတာ ပြောင်းမလို့ပြောနေကြတာတွေ့တယ်။ ကျောင်းတော်တော်များများက ထက်ဝက်လောက် ခုန်တက်သွားတယ်” ဟု နိုင်ငံတကာကျောင်းတစ်ခုတွင်တက်ရောက်နေသူ Grade P 2 ကျောင်းသား မိခင်တစ်ဦးက ဧရာ၀တီတိုင်းမ်ကို ပြောသည်။

စစ်ကောင်စီ၏ အာဏာသိမ်းမှုကြောင့် နိမ့်ကျသောကဏ္ဍများတွင် ပညာရေးကဏ္ဍတစ်ခုလည်းပါဝင်ကာ စစ်ကောင်စီလက်အောက်ခံ အခြေခံ ပညာစာသင်ကျောင်းများတွင် တတ်ကျွမ်းသူ ဆရာ၊ ဆရာမ ရှားပါးမှု၊ ကျောင်းဆရာ မလုံလောက်မှု များဖြစ်ပေါ်နေပြီး ကျောင်းအပ်နှံမှုမှာလည်း နှစ်စဉ် လျှော့ကျ လျက်ရှိသည်။

စစ်ကောင်စီသည် ၂၀၂၃ ခုနှစ်တွင် ပုဂ္ဂလိက ပညာရေးဥပဒေကို ပြဋ္ဌာန်းကာ ကျောင်းမှတ်ပုံတင်ကြေး ကျပ် သိန်း ၅၀၊ နှစ်စဉ်ကြေး ကျပ် သိန်း ၆၀ သတ်မှတ်ထားပြီး ကျောင်းသားအရေအတွက်နှင့် ကျောင်းပရဝဏ်မျှတရန်၊ အချိန်ပြည့်ကျောင်းဆရာ ၅၀ ဦးရှိရန်သတ်မှတ်ထားသည်။

အဆိုပါဥပဒေပါပြဋ္ဌာန်းချက်များကို ဖောက်ဖျက်ကျူးလွန်ပါက အများဆုံးထောင်ဒဏ်၂နှစ်အထိ ချမှတ်နိုင်သလို ငွေဒဏ်ဆိုရင် အများဆုံး ငွေကျပ်သိန်း၅၀၀အထိ ချမှတ်နိုင်ကြောင်းပြဋ္ဌာန်းထားသည်။

ဓာတ်ပုံ – လူမှုကွန်ရက် ၊ ဧရာဝတီတိုင်းမ်
#ကျောင်းလခများ #ဈေးတက် #ပုဂ္ဂလိဂကျောင်း #internationalschool #မိဘများအခက်ကြုံ #Ayeyarwaddy_Times