အသက်အာမခံလုပ်ငန်းများနှင့် လေယာဉ်ကွင်းပါသည့်ဆေးရုံကြီးကို သားဖြစ်သူနာမည်ဖြင့် ပိုင်ဆိုင် ထားသည့် စစ်ခေါင်းဆောင်က အဂတိလိုက်စားမှုများကို အရေးယူမည်ဟုပြော

ဧရာဝတီတိုင်းမ်
ဒီဇင်ဘာ ၁၁ ရက်

မလျော်ဩဇာသုံးပြီး ကိုယ်ကျိုးအတ္တရယူခြင်းသည် အဂတိမှုပင်ဖြစ်သည့်အတွက် အဂတိ လိုက်စား သူများ ကို အရေးယူပြီး ပိုင်ဆိုင်မှုများကို သိမ်းယူသွားမည်ဖြစ်ကြောင်း ပြီးခဲ့သည့် ဒီဇင်ဘာ ၉ ရက်နေ့က နေပြည်တော်တွင်ပြုလုပ်သည့် အပြည်ပြည်ဆိုင်ရာ အဂတိလိုက်စားမှုတိုက်ဖျက်ရေးနေ့ အခမ်း အနားတွင် စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ပြောဆိုခဲ့သည်။

အဂတိလိုက်စားမှုကို လာဘ်ပေးလာဘ်ယူမှုဟုသာ ထင်မှတ်ကြသော်လည်း အမှန်တကယ်တွင် လူ့ဘောင်လောက၌ ကျယ်ပြန့်နက်ရှိုင်းသည့် မကောင်းမှုကြီးဖြစ်ပြီး အဂတိလိုက်စားမှု ကျူးလွန်သူများကို တရားစွဲဆို အရေးယူရုံသာမက အဂတိလိုက်စားမှုဖြင့် ကြွယ်ဝချမ်းသာလာသည့် ငွေကြေးနှင့်ပစ္စည်းများ ပြည်သူ့ဘဏ္ဍာဖြင့် သိမ်းယူသွားမည်ဟု စစ်ခေါင်းဆောင်က ပြောကြားခဲ့သည်။

စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ပြည်သူပိုင်ပစ္စည်းငွေကြေးများကို ကိုယ်ကျိုး အတွက် မသင့်မလျော် သုံးစွဲခြင်းသည်လည်း အဂတိမှုပင်ဖြစ်ကြောင်း ပြောဆိုခဲ့သော်လည်း ၎င်း၏ သားနှင့်သမီး၊ ခယ်မစသည်တို့၏ နာမည်ဖြင့် ရင်း နှီးမြုပ်နှံမှုလုပ်ငန်းများစွာ ပိုင်ဆိုင်ထားသည်။

စစ်ခေါင်းဆောင်ဗိုလ်ချုပ်မှူးကြီးမင်းအောင်လှိုင်၏ သားဖြစ်သူ အောင်ပြည့်စုံတွင် စစ်မှုထမ်းများနှင့် ရဲဝန်ထမ်းများ၏ အသက်အာမခံလုပ်ငန်း၊ သွင်းကုန်ထုတ်ကုန် ရင်းနှီးမြုပ်နှံမှုလုပ်ငန်းများ၊ အခြား ပိုင်ဆိုင်မှုလုပ်ငန်းများအပြင် ထင်ရှား‌သည့်ပိုင်ဆိုင်မှုအဖြစ် လေယာဉ်ကွင်းပါထည့်သွင်း တည်ဆောက် ထားသည့် ကန်သာယာကဲ့သို့ ဆေးရုံကြီးများကိုပါ ပိုင်ဆိုင်ထားသည်။

အဆိုပါ ပိုင်ဆိုင်မှုများသည် စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် ကာကွယ်ရေး ဦးစီးချုပ်ဖြစ်လာသည့်အချိန်တွင် တပြိုင်နက်တည်း ပိုင်ဆိုင်ခဲ့ခြင်းဖြစ်ပြီး ၎င်း၏ သမီးဖြစ်သူ ခင်သီရိ သက်မွန်သည်လည်း ရုပ်ရှင်ကုမ္ပဏီများ၊ အစုရှယ်ယာ လုပ်ငန်းများနှင့် သွင်းကုန်ထုတ်ကုန်လုပ်ငန်းများ၊ အိမ်ခြံမြေလုပ်ငန်းများကိုပါ အချိန်တိုအတွင်း ပိုင်ဆိုင်လာခဲ့သည်။

စစ်ခေါင်းဆောင်သည် ၎င်းနှင့်စစ်အရာရှိများ၏ ဝင်ငွေထွက်ငွေနှင့် ပိုင်ဆိုင်မှုများ၊ လုပ်ငန်းများ စစ်ဆေးခွင့်ကို လက်မခံဘဲ အစိုးရ အဆက်ဆက်ပယ်ချခဲ့သည်။

ထိုသို့ စစ်အရာရှိတစ်စုသည် ဝင်ငွေ ထွက်ငွေသက်သေမပြနိုင်ဘဲ ချမ်းသာကြွယ်ဝနေပြီး နိုင်ငံ‌တော် ဘဏ္ဍာနှင့် ပြည်သူပိုင်ပစ္စည်းများ ခွဲဝေသုံးစွဲနေမှုအပေါ် ပြည်သူအများသိပြီးဖြစ်သော်လည်း စစ်ခေါင်း ဆောင်က အဂတိလိုက်စားမှုကို တိုက်ဖျက်သွားမည်ဟု ပြောဆိုခဲ့သည်။

မကြာသေးမီကာလက ဒေါ်လာဘီလီယံချီသော အဂတိလိုက်စားမှုဖြင့် စစ်ဗိုလ်ချုပ်ဖြစ်သူ ဒုဗိုလ်ချုပ်ကြီး မိုးမြင့်ထွန်းနှင့် ဒုဗိုလ်ချုပ်ကြီးစိုးထွဋ်တို့ကိုဖမ်းဆီး၍ ပိုင်ဆိုင်မှုများ သိမ်းယူခဲ့ရာတွင် နိုင်ငံတော် အာဏာကို ထိပါးလာသည့် လုပ်ဆောင်မှုများကို ထိန်ချန်ပြီး အဂတိမှုဖြင့် ခေါင်းစဉ်တပ်ခဲ့ခြင်း ဖြစ်ကြောင်း တပ်သတင်းရင်းမြစ်ထံက သိရသည်။

ဓာတ်ပုံ-စစ်ကောင်စီ
#စစ်ခေါင်းဆောင် #အဂတိတိုက်ဖျက်ရေး #လာဘ်စားမှု #အရေးယူမည် #Ayeyarwaddy_Times