ဧရာဝတီတိုင်းမ်
အောက်တိုဘာ ၈ ရက်
ကချင်ပြည်နယ်၊ ဖားကန့်မြို့နယ်၊ ဆိုင်းတောင်ကျေးရွာရှိ Lucky Men ဟိုတယ်တွင် ဝင်ရောက် တပ်စွဲနေသည့် စစ်ကောင်စီတပ်ကို ကချင်လွတ်လပ်ရေးတပ်မတော် (KIA) ၊ LPDF ပူးပေါင်းအဖွဲ့က ဝင်ရောက်တိုက်ခိုက်ကာ မောင်းထုတ်လိုက်ကြောင်း သိရသည်။
Lucky Men ဟိုတယ်အတွင်း တပ်စွဲထားသည့် စစ်ကောင်စီတပ်ဖွဲ့ကို ယနေ့ အောက်တိုဘာ ၈ ရက် နံနက် ၆ နာရီခန့်တွင် KIA က ဝင်ရောက်တိုက်ခိုက်၍ တပ်စွဲထားသူ တစ်ယောက်မကျန် မောင်းထုတ်လိုက် ပြီဖြစ်ကြောင်း သိရသည်။
“ဟိုတယ်ထဲ ပိတ်မိနေတာ တစ်လနီးပါးရှိပြီ။ မနေ့ကည ပိုင်းမှာ စစ်တပ်ကအပြင် စထွက်လာတယ်။ လက်နက်ကြီး ပစ်ကူတွေလည်း ကာပစ်ပေးပြီး ထွက်ဖို့ကြိုးစားတာ။ KIA ကအကုန်ပိတ်ဆို့ပြီး ဒီမနက်မှာ ဖမ်းဆီးမိတာတွေရော၊ သေတာတွေရောရှိတယ်”ဟု ဖားကန့် ဒေသခံ အမျိုးသမီးတစ်ဦးက ဧရာဝတီတိုင်းမ်ကို ပြောသည်။
ဟိုတယ်အတွင်းမှ စစ်ကောင်စီ အယောက် ၂၀ ခန့်ကို KIA က ဖမ်းဆီးနိုင်ခဲ့ပြီး အယောက် ၂၀ ခန့် သေဆုံး ကြောင်း သိရသည်။
Lucky Men ဟိုတယ်အတွင်း စစ်ကောင်စီက ပြန်မလွှတ်ပေးဘဲ ဖမ်းဆီးထားသည့် ဝန်ထမ်းနှင့် တည်းခိုသူများကိုလည်း ပြန်လည်လွှတ်ပေးနိုင်ကြောင်း သိရသည်။
ပြီးခဲ့သည့် စက်တင်ဘာ ၇ ရက်နေ့က Lucky Men ဟိုတယ် ကျောက်သွေးတောင်နှင့် ဟိုတယ်အနီး တံတား တို့မှ စစ်ကြောင်းသုံးကြောင်းခွဲ၍ တက်လာသော စစ်ကောင်စီတပ်နှင့် KIA တို့ ဆိုင်းတောင် ကျေးရွာအတွင်း စတင် တိုက်ပွဲဖြစ်ပွားခဲ့ခြင်းဖြစ်သည်။
စစ်ကောင်စီက ဆိုင်းတောင်ကို လေကြောင်းမှ လေး ကြိမ်ထက်မနည်း ဗုံးကြဲတိုက်ခိုက်ခဲ့သည့်အတွက် ဆိုင်းတောင်ကျေးရွာအတွင်းရှိ ရပ်ကွက် ၂ ၊ ၃၊ ၄၊ ဆန်းကြွယ်၊ မောတောင်း၊ ဖားပြင်စသည့် ရပ်ကွက်နှင့် ကျေးရွာအချို့မှ နေအိမ်များမီးလောင်ပျက်စီးခဲ့ရ ကြောင်း သိရသည်။
ပုံစာ- စက်တင်ဘာ ၁၂ရက်နေ့က စစ်ကောင်စီဗုံးကြဲတိုက်ခိုက်၍ မီးလောင်နေသည့် ဆိုင်းတောင်ရွာ
#ကချင် #ဖားကန့် #ဆိုင်းတောင် #LuckyMenဟိုတယ် #တပ်စွဲ #စစ်ကောင်စီ #KIAတိုက်ခိုက် #မောင်းထုတ် #Ayeyarwaddy_Times
