ကြံခင်းတွင် ရဲအင်အား လျော့နည်းနေ၍ စစ်ကောင်စီတပ်နှင့် ပျူစောထီးအင်အား ၃၀ ကျော်ကို ရဲဝတ်စုံ ဝတ်ခိုင်းပြီး အင်အားဖြည့်တင်း

ဧရာဝတီတိုင်းမ်
ဇန်နဝါရီ ၂၂ ရက်

ဧရာဝတီတိုင်း၊ ကြံခင်းမြို့နယ်တွင် ရဲအင်အားလျော့နည်းနေမှုကြောင့် မြို့နယ်ရဲစခန်းသို့ စစ်ကောင်စီတပ်နှင့် ပျူစောထီး (ပြည်သူ့စစ်) အင်အား(၃၀ )ဦးကျော်ကို ရဲဝတ်စုံဝတ်ခိုင်းပြီး အင်အားဖြည့်တင်းထားကြောင်း သတင်းရရှိသည်။

ကြံခင်းမြို့နယ်ရှိ မြို့နယ်ရဲစခန်းနှင့်မြို့နယ်ရဲတပ်ဖွဲ့မှူးရုံးရှိ ရဲအင်အား ၂၀ ခန့်ကို ဇန်နဝါရီလ ပထမအပတ်အတွင်း ပဲခူးတိုင်းနှင့်ရခိုင်ပြည်နယ်သို့ ပို့ဆောင်ခဲ့၍ အင်အား ၁၀ ဦးကျော်သာကျန်ရှိတော့ကြောင်း မြို့နယ်ရဲစခန်းနှင့်နီးစပ်သည့်ရဲသတင်းရင်းမြစ်ထံကသိရသည်။

“ ရဲစခန်းနဲ့မြို့နယ်ရုံးကရဲတွေကို ရခိုင်နဲ့ပဲခူးဘက် ရှေ့တန်းပို့လိုက်တော့အင်အားမကျန်တော့ဘူး။ ၁၀ ဦးထက်မပိုဘူး ”ဟု ကြံခင်းမြို့နယ်ရဲစခန်းနှင့်နီးစပ်သူတစ်ဦးက ဧရာဝတီတိုင်းမ်ကိုပြောသည်။

ထိုသို့အင်အားလျော့နည်းမှုကို ပြန်လည်ဖြင့်တင်းရန်အတွက် တိုင်းစစ်ဌာနချုပ် ညွှန်ကြားမှုဖြင့် ဇန်နဝါရီလ ၁၈ ရက်နေ့က စစ်ကောင်စီတပ်နှင့် ပျူစောထီး(ပြည်သူ့စစ်) အဖွဲ့ဝင်အင်အား ၃၀ ဦး ကို ရဲယူနီဖောင်းပေးဝတ်ကာ အင်အားဖြည့်တင်းထားကြောင်း မြို့နယ်ရဲတပ်ဖွဲ့မှူးရုံးနှင့်နီးစပ်သူများထံကသိရသည်။

“ စစ်သား ၁၀ယောက်နဲ့ ပြည်သူ့စစ် အယောက်၂၀ ကို ရဲစခန်းအတွက်အင်အားပြန်ဖြည့်ထားတယ်။ ရဲဝတ်စုံတွေပေးဝတ်ပြီးအင်အားဖြည့်ထားတာ”ဟု ကြံခင်းမြို့နယ်ရဲတပ်ဖွဲ့မှူးရုံးနှင့်နီးစပ်သူတစ်ဦးကဆိုသည်။

ကြံခင်းမြို့နယ် တွင် ရဲအင်အားလျော့နည်းနေမှုအပေါ် ယခင်ပျူစောထီး(ပြည်သူ့စစ်) သင်တန်းဆင်း အဖွဲ့ဝင်အချို့ကို ရဲတပ်ဖွဲ့ဝင်အဖြစ်တာဝန်ပေးရန်အတွက် အနောက်တောင်တိုင်းစစ်ဌာနချုပ် ၏အမိန့်ဖြင့် မြို့နယ်စစ်ကောင်စီမှ ပြီးခဲ့သည့် ဇန်နဝါရီလ ပထမအပတ်အတွင်းမြို့နယ်ရဲတပ်ဖွဲ့သို့ညွှန်ကြားမှုပြုလာပ်ထားကြောင်း သိရသည်။

#ကြံခင်း #စစ်ကောင်စီတပ် #ပျူစောထီး #ရဲဝတ်စုံ #ပဲခူး #ရခိုင်#Ayeyarwaddy_Times