မံစီမြို့နယ်ရှိ မန့်ဝိန်းကြီးစစ်ကောင်စီတပ်စခန်းကို KIA ဆက်လက်သိမ်းပိုက်

ဧရာဝတီတိုင်းမ်
ဇန်နဝါရီ ၂၁ရက်

ကချင်ပြည်နယ်၊ မံစီမြို့နယ်ရှိ စစ်​ကောင်စီ၏ မန့်ဝိန်းကြီးစခန်းကို ကချင်လွတ်လပ်​ရေးတပ်မ​တော်(KIA)က ယ​နေ့ ဇန်နဝါရီ ၂၁ ရက်နေ့ နံနက်ပိုင်းတွင် တိုက်ခိုက်သိမ်းပိုက်ခဲ့​ကြောင်း သိရသည်။

KIA သည် နန်ခမ်းမြို့နယ်နှင့် မံစီမြို့နယ်ကြား မန့်ဝိန်းကြီး​ဒေသရှိ စစ်​ကောင်စီ၏ ​ခြေမြန်တပ်ရင်း ခမရ(၄၂၄)ကို ပြီးခဲ့သည့် ဇန်နဝါရီလ ၁၉ရက်​နေ့ကတည်းက စတင်တိုက်ခိုက်ခဲ့ရာ ယ​​နေ့ ဇန်နဝါရီ ၂၁ ရက်​နေ့တွင် သိမ်းပိုက်ခဲ့​နိုင်ကြောင်း KIA စစ်​ရေးသတင်းရင်းမြစ်ထံက သိရသည်။

​”ကောင်းမှုယန်​ကျေးရွာအ​ခြေစိုက် ခမရ-၄၂၄ရဲ့ မန့်ဝိန်းကြီးစခန်းကို ဝင်တိုက်တာမှာ စစ်ကောင်စီတပ်ဖွဲ့ဝင် အ​လောင်း ၁၀​လောင်း​ကျော်နဲ့ လက်နက်ခဲယမ်း​တွေအများကြီးသိမ်းမိထားတယ်” ဟု KIA စစ်​ရေးသတင်းရင်းမြစ်က ဧရာဝတီတိုင်းမ်ကို ​ပြောသည်။

စစ်​ကောင်စီသည် ရှမ်းပြည်မြောက်ပိုင်းနှင့် ကချင်ပြည်နယ်ကြားတွင်ရှိသည့် ၎င်းတို့၏ စစ်စခန်းကျသွားသည့်အတွက် မန့်ဝိန်းကြီး စခန်းရှိရာသို့ တိုက်​လေယာဥ် နှစ်စင်းဖြင့် ဗုံးကြဲ​နေ​ကြောင်းသိရသည်။

ထို့အပြင် ကချင်လွတ်လပ်​ရေးတပ်မ​တော်(KIA) က ယမန်​နေ့တွင်ဖားကန့်မြို့နယ် ​ဝှေ့ခါရွာရှိ စစ်​ကောင်စီစခန်းကို သိမ်းပိုက်နိုင်ခဲ့ပြီး စခန်းစွန့်ခွာထွက်​ပြေးသွားသည့် စစ်​ကောင်စီအဖွဲ့များနှင့် ဆိုင်း​တောင်ရွာတွင် တိုက်ပွဲအပြင်းအထန်ဖြစ်ပွားလျက်ရှိ​ကြောင်းသိရသည်။

ကချင်လွတ်လပ်ရေးတပ်မတော် (KIA) နှင့် ပြည်သူ့ကာကွယ်ရေးတပ်ဖွဲ့ (PDF) ပူးပေါင်းတပ်ဖွဲ့သည် ယနေ့ ဇန်နဝါရီ ၂၁ ရက်နေ့ နံနက်ပိုင်းကလည်း ရှမ်းပြည်မြောက်ပိုင်း၊ မိုးမိတ်ခရိုင်ရှိ မဘိမ်းမြို့ကို သိမ်းပိုက်ခဲ့ပြီး နယ်မြေရှင်းလင်းရေးများ လုပ်ဆောင်နေကြောင်းသိရသည်။

#မံစီမြို့နယ် #မန့်ဝိန်းကြီးစစ်​စခန်း #KIAတိုက်ခိုက်သိမ်းပိုက် #Ayeyarwaddy_Times