အမြင်မဝေဝါးစေဖို့ဂရုပြုရမယ့်မျက်စိကျန်းမာရေး

ဆောင်းပါးရှင် – ဒေါက်တာမိုးသစ်နေ
(ဧရာ၀တီတိုင်းမ်၊ ဩဂုတ်လ ၁၃ ရက်)

“ချစ်သောမျက်စိနဲ့ကြည့်ပါ”
ဒီစကားဟာ စာရေးသူ ပြောနေကြ လက်သုံးစကားဖြစ်သလို လူတော်တော်များများ လည်း ပြောတတ်ကြပါတယ်။ ကောင်းတဲ့ရှုမြင်ခြင်းနဲ့ ခံစားဖို့အတွက် ကောင်းမွန်တဲ့ အမြင် ရှိနေဖို့လိုအပ်ပါတယ်။ မျက်လုံးတွေက စိတ်ရဲ့ တံခါးပေါက်လို့ဆိုကြတာမို့ အခွင့်ရတုန်း မျက်စိကျန်းမာရေး အကြောင်းကိုပြောပြပေးပါမယ်။

အမြင်၊ အကြား၊ အနံ့၊ အရသာ၊ အထိအတွေ့ ဆိုတဲ့ အာရုံငါးပါးမှာ စက္ခု အမြင်အာရုံကို ဖြစ်ပေါ်စေတဲ့ မျက်လုံးဟာ ဦးစားပေးကျန်းမာရေး ထဲမှာပါဝင်ပါတယ်။

မြန်မာနိုင်ငံမှာအဖြစ်များတဲ့မျက်စိရောဂါတွေကတော့
-အဝေးမှုန် အနီးမှုန် အမြင်အာရုံချို့တဲ့ခြင်း (Refractive Errors)
-အတွင်းတိမ်ရောဂါ (Cataract)
-မြင်လွှာပြင်ထိခိုက်ပျက်စီးယိုယွင်းသည်ရောဂါ (Macular Degeneration)
-ဆီးချိုသွေးချိုကြောင့် မြင်လွှာထိခိုက်ချို့ယွင်းခြင်း (Diabetic Retinopathy)
-ရေတိမ်ရောဂါ ( Glaucoma )
-မွေးရာပါအရောင်အချို့မမြင်နိုင်ခြင်း (Colour Blind)
-မျက်ခမ်းစပ်ရောင်ရမ်းခြင်း၊ မျက်စိနီမျက်စိနာခြင်းနဲ့ မျက်စိစွံခြင်းတို့ ဖြစ်ပါတယ်။

စစ်ကောင်စီဟာ ပြည်သူ‌တွေနေထိုင်တဲ့ ရွာတွေအိမ်‌တွေကို လေယာဉ်သုံးဗုံးကြဲတိုက်ခိုက်တာ၊ ဓာတုပါဝင်တဲ့လက်နက်တွေအသုံးပြုတာ၊ လက်နက်ကြီးများနဲ့ ပစ်ခတ် တာတွေကြောင့် မြန်မာနိုင်ငံသူ၊နိုင်ငံသားတွေဟာ သေကြေပျက်စီးပြီး ကိုယ်လက်အင်္ဂါအစိတ်အပိုင်းတွေ ထိခိုက်ဒဏ်ရာရတာတွေ ၊ မျက်စိထိခိုက်တာတွေudk စိတ်မကောင်းဖွယ် ကြုံတွေ့နေရပါတယ်။

ပြင်ပက အမှုန်အမွား၊ ခဲ၊ သဲ၊ မြေစတွေ လွင့်စင်ထိမှန်တာ လက်နက်ခဲယမ်း ထိမှန်တာ၊ ဗုံးစမှန်တာတွေကြောင့် မျက်လုံးထိခိုက်ဒဏ်ရာရပြီး အမြင်အာရုံယိုယွင်းသွားသူတွေ၊ အမြင်အာရုံလုံးဝချို့ယွင်းသွားတဲ့ ပြည်သူတွေဒုနဲ့‌ဒေးရှိနေပါတယ်။

#ပြင်ပမှထိခိုက်မိ၍မျက်စိဒဏ်ရာရခြင်း(Traumatic Eye Injury)

ပြင်ပမှတခုခုက မျက်လုံးကိုလာထိခိုက်တဲ့အခါ မျက်လုံးလေးကိုကာကွယ်ဖို့ မျက်ခွံက မှိတ်ချလိုက်ပါတယ်။ ဒါပေမယ့် ပြင်းအားကြီးလက်နက်တွေ ပေါက်ကွဲမှုတွေ ဒဏ်ကို တော့ ကာကွယ်နိုင်ဖို့ခက်ခဲပါတယ်။ ဒီလိုထိခိုက်လာတဲ့အခါ မျက်လုံးရဲ့ အပြင်ဆုံးပိုင်း ဖြစ်တဲ့ မျက်ကြည်လွှာ‌ ဒဏ်ရာရပါတယ်။ မျက်လုံး တစ်လုံးလုံးမှာရှိတဲ့ အတွင်းအစိတ် ပိုင်းတွေ သွေးကြောတွေ အာရုံကြောတွေလည်း ထိခိုက်ပါတယ်။ အခန့်မသင့်ရင် အမြင်အာရုံကို အမြဲထာဝရဆုံးရှုံးသွားမှာဖြစ်ပါတယ်။

တိုက်ပွဲကြောင့် ၊ ယာဉ်မတော်တဆမှုကြောင့်စတဲ့ ဘယ်လိုအကြောင်းကြောင့် ဖြစ်ပါ‌စေ မျက်လုံးကိုထိခိုက်ဒဏ်ရာရပြီးဆိုပါက စိုက်ဝင်နေတဲ့ ပြင်ပပစ္စည်းတွေကိုဆွဲမနှုတ်ပါနဲ့။ (Saline)ဆေးရည် ရေသန့်သန့် ရနိုင်တာနဲ့ ဆေးကြောပြီးနီးစပ်ရာဆေးရုံဆေးခန်းကို အမြန်ဆုံးသွားဖို့လိုပါတယ်။ ကျွမ်းကျင်‌ဆေးပညာရှင် ဆရာဝန်သူနာပြုတွေက ပိုးသတ် သန့်စင်ထားတဲ့ပစ္စည်းကိရိယာတွေသုံးပြီး မျက်လုံးကိုစနစ်တကျကိုင်တွယ်မှာပါ။

ဒါကြောင့်နိုင်ရာတာဝန်ထမ်းချင်တဲ့ ပြည်သူ့ဘက်တော်သားတွေအ‌နေနဲ့ ဆေးဝါးပစ္စည်း တွေ ပံ့ပိုးပြီး လူသားချင်းစာနာထောက်ထားမှုကူညီကြစေလိုပါတယ်။

အက်စစ်ပါဝင်တဲ့ဓာတုဆေးရည်တွေ၊ ထုံးလိုအယ်ကာလီတွေ မျက်လုံးထဲဝင်တဲ့ အခါမှာ လည် အန္တရာယ်ရှိပါတယ်။ မျက်လုံးကိုထိခိုက်သွားနိုင်တာကြောင့် ချက်ခြင်းရေသန့်သန့် သို့မဟုတ် ဆလိုင်းရည်ဆေးသုံးပြီး ဆေးကြောဖို့အရေးတကြီးလိုအပ်ပါတယ်။

#အဝေးမှုန်အနီးမှုန်အမြင်အာရုံချို့တဲ့ခြင်း(Refractive Errors)

မျက်စိကျန်းမာရေးဆိုတာနဲ့အားလုံးက မျက်စိမှုန်ခြင်းအကြောင်းကို သိချင်ကြမှာပါ။ မျက်စိမှုန်ခြင်း နှစ်မျိုးရှိပါတယ်။

စာဖတ်ခြင်း၊ ကွန်ပျူတာအသုံးပြုခြင်း တွေလို အနီးကပ်အမြင်အာရုံ အသေအချာ အသုံးပြုနေရသူတွေအနေနဲ့ ကောင်းကောင်းမမြင်နိုင်တဲ့ အမြင်အာရုံချို့တဲ့ခြင်းကို အနီးမှုန် ရောဂါလို့ခေါ်ပါတယ်။

အသက် ၄၀ ဝန်းကျင်ရောက်တဲ့အခါ လူတွေမျက်စိအားနည်းပြီး အနီးမှုန် ရောဂါစတင် ခံစားရတတ်ပါတယ်။တချို့လူတွေမှာလည်းငယ်ငယ်ရွယ်ရွယ်နဲ့ အနီးမှုန် တတ်ပါတယ်။

အဝေးကလားတဲ့ ကားကို ပီပီသသမမြင်ရတာ ဘက်တံရိုက်ခြင်း၊ ဘောလုံးကန်ခြင်း တို့လို အားကစားပြုလုပ်ရခက်ခဲတာ တွေကို အဝေးမှုန်ရောဂါရှိသူတွေမှာ ကြုံတွေ့ရပါတယ်။

အဝေးမှုန်ခြင်းအနီးမှုန်ခြင်း၊ အမြင်အာရုံချို့တဲ့ခြင်းကို မှန်ဘီလူးပါဝင်တဲ့ မျက်မှန်အမျိုး အစားတွေအသုံးပြုပြီး ကုသရပါတယ်။ ခေါင်းကိုက်ခြင်း၊ မျက်ရည်ပူကျခြင်း၊ ဇာတ်‌ကြောထိုးခြင်း တွေခံစားရပြီဆိုပါက မျက်လုံးအမြင်အာရုံကိုပြန်လည် စစ်ဆေးသင့် ခြောက်လတစ်ကြိမ်လောက် မျက်မှန်ပါဝါစစ်ဆေးနိုင်ရင်အကောင်းဆုံးပါပဲ။

#မြင်လွှာပြင်ထိခိုက်ပျက်စီးယိုယွင်းသည်ရောဂါ(Macular Degeneration)

ဇရာ အိုမင်းခြင်းဆိုတာ ရှောင်လို့မရပါဘူး။ အသက်ကြီးလာတာနဲ့အမျှ ရုပ်ခန္ဓာတွေ ပြောင်းလဲပျက်စီးပါတယ်။ မျက်လုံးအတွင်းမှာရှိတဲ့ မြင်လွှာပြင်‌လေးကလည်း ထိခိုက် ပျက်စီးယိုယွင်းတတ်တဲ့ သဘောတရားအတိုင်း အိုမင်းလာပြီး နေ့စဉ်မြင်နေရတဲ့ တိကျတဲ့ရုပ်သွင်ကို မရှင်းမလင်းဝေဝါးစေမှာပါ။

အိုမင်းခြင်းကြောင့်ဖြစ်တဲ့အပြင် တစ်ခါတလေမှာ မြင်လွှာရဲ့အ‌နောက်ဘက်မှာ ပုံမှန် မဟုတ်တဲ့သွေကြောလေးတွေ အသစ်ဖြစ်ပေါ်လာပြီး သွေးယိုစိမ့်တဲ့အခါ ၊ သွေးကြော လေးတွေ ပေါက်ကွဲတဲ့အခါ မြင်ကွင်းပုံရိပ်တွေကို မကြည်လင်‌ဝေဝါးစေပါတယ်။

#အတွင်းတိမ်ရောဂါ(Cataract)

မျက်လုံးထဲမှာ သဘာဝကပေးထားတဲ့ မှန်ဘီလူးလေးရှိပါတယ်။ မှန်ဘီလူးလေး ကြည်လင်နေရင်တော့ မြင်သမျှအရာတိုင်းက ကြည်ကြည်လင်လင်ဖြစ်နေမှာပါ။ ကောင်ကင်ကတိမ်‌လို မှန်ဘီလူး‌လေး နောက်ကျိသွားခြင်းကို အတွင်းတိမ် ရောဂါ လို့ခေါ်ပါတယ်။ မြင်သမျှအရာရာကကြည်ကြည်လင်လင်မရှိတော့ပါဘူး။ အတွင်းတိမ် ဟာ မြန်မာနိုင်ငံမှာ မျက်စိကွယ်ခြင်းရဲ့ အဓိက အကြောင်းရင်း တစ်ခုဖြစ်နေဆဲပါ။

အသက်အရွယ်ရလာသူတွေ သွေးချိုဆီးချိုရောဂါ‌ရေရှည်ခံစားရသူတွေ၊ နေရောင်ခြည် ကိုအလွန်အမင်းထိတွေ့ရတဲ့သူတွေ၊ ဆေးလိပ်သောက်သုံးသူတွေ၊ အဝလွန်သူတွေ၊ သွေးတိုးရောဂါရှိသူတွေနဲ့ မျက်လုံးခွဲစိတ်ကုသမှုခံယူသူသူတွေမှာ အတွင်းတိမ်ရောဂါပိုမို အဖြစ်များပါတယ်။

ဒါတွေအတွက် အကောင်းဆုံးကုသခြင်းကတော့ ခွဲစိတ်ကုသခြင်းပဲဖြစ်ပါတယ်။

#သွေးချိုဆီးချိုရောဂါကြောင့်မြင်လွှာပျက်စီးယိုယွင်းခြင်း(Diabetic Retinopathy)

သွေးချိုဆီး ချိုရောဂါကိုစနစ်တကျ မထိန်းသိမ်းထားရင် ၊ မကုသရင် မျက်စိကွယ် တတ်ပါတယ်။ သွေးကြော၊ အာရုံကြောအပြင် နောက်ဆက်တွဲနှစ်ခုစလုံးကြောင့် အပြင် သကြားဓာတ် ကမောက်ကမဖြစ်ခြင်းက မြင်လွှာယိုယွင်းတာကို သက်ရောက်မှုရှိ စေတာကြောင့် ဆီးချိုဝေဒနာရှင်များအနေနဲ့ ဂရုပြုစေလိုပါတယ်။

#ရေတိမ်ရောဂါ(glaucoma)

မျက်လုံးအတွင်းရေဖိအား (IOP) ရေပေါင်ချိန် တက်တဲ့အခါ မျက်စိနီရဲခြင်း၊ မျက်စိနာကျင်ကိုက်ခဲခြင်း၊ ခေါင်းကိုက်ခြင်း၊ နားထင်အောင့်ခြင်း၊ အမြင်မှုန်ဝါးခြင်း တွေခံစားရပါတယ်။

အသက်‌လေးဆယ်‌ကျော် လူလတ်ပိုင်းအရွယ်မှစ သက်ကြီးရွယ်အိုတွေမှာ ရေတိမ် ရောဂါ အဖြစ်များပါတယ်။ရေတိမ်ရောဂါမျိုးရိုးရှိသူ၊ သွေးချိူဆီးချို၊ သွေးတိုး၊ နှလုံးနှင့် သွေးကြောကျဉ်းရောဂါများရှိသူ၊ စတီးရွိုက်(Steroids)မျက်စဉ်း‌ဆေးဝါးသုံးသူတွေမှာ ရေတိမ်ရောဂါ ဖြစ်တတ်ပါတယ်။

ရေပေါင်ချိန်တက်လာပါက အမြင်အာရုံကြောကို ဖိပြီး ပျက်စီးစေပါတယ်။ မြင်ကွင်းက ပိုကျဥ်းကျဉ်းလာပြီး ပျက်စီးသွားတဲ့ အာရုံကြောက ပြန်မကောင်းတော့လို့ အမြင်ကွယ် တဲ့အထိ ဖြစ်သွာတတ်ပါတယ်။ မျက်စဉ်းဆေး၊ လေဆာရောင်ခြည်နဲ့ပစ်ခြင်း၊ ခွဲစိတ် ကုသခြင်း ဆိုပြီး နည်းလမ်းသုံးခုဖြင့် ကုသနိုင်ပါတယ်။

Dexamethasone, Prednisolone, Betamethasone မျက်စဉ်းဆေးနဲ့ ဘဲနှုတ်သီး မျက်စဉ်းတွေကို ဆရာ၀န်မညွှန်ကြားဘဲ မိမိသဘောနဲ့ သုံးစွဲခြင်းလုံးဝ (လုံးဝ) မပြုသင့်ပါဘူး။

ကျွန်တော်တို့ လူသား‌တွေမှာ အဖိုးတန်မျက်လုံးနှစ်လုံးသာရှိတာမို့ အမြင်အာရုံက အလွန်ကို အရေးကြီး ပါတယ်။ ဒါကြောင့် အမြင်အာရုံကို ထိခိုက်စေနိုင်တဲ့ ဆီးချို၊ သွေးတိုး၊ နှလုံးရောဂါများကို စနစ်တကျကုသပါ။ ကျန်းမာရေးနဲ့အညီ စားသောက် နေထိုင်ပါလို့ အသိပေးချင်ပါတယ်။

နောက်တစ်ခါ ဖုန်း၊ ကွန်ပျူတာ တို့ကိုကြည့်ပြီး နေ့စဉ်အလုပ်လုပ်ရတဲ့လူတွေအနေနဲ့ ကိုယ့်ရဲ့မျက်လုံးအမြင် အာရုံကိုတန်ဖိုးထားကြပါ။ ဇက်ကြောတက်ခြင်း၊ ခေါင်းကိုက် ခြင်း၊ နောက်ကြောထိုးခြင်းတွေ ခံစားရပြီဆိုရင် ပေါ့ပေါ့ဆဆမနေဘဲ မျက်စိဆရာဝန်နဲ့ တွေ့ပါ။ မြင်နိုင်စွမ်းတိုင်းတာခြင်း(visual acuity)၊ အရောင်ဖတ်ခြင်း စွမ်းရည်တိုင်းတာ ခြင်း (Colour blind test)၊ ရေပေါင်ချိန်တိုင်းခြင်း( IOP)၊ မြင်ကွင်းစမ်းသပ်စစ်ဆေးခြင်း (Visual Field )အမြင်အာရုံကြောဓာတ်ပုံရိုက်စစ်ဆေးခြင်း (OCT – Optic Nerve Head)တွေလို လိုအပ်တာကို စစ်ဆေးပြီး ဆွေးနွေးတိုင်ပင် ကုသပါ။

ဧရာဝတီတိုင်းမ် ပရိသတ်အားလုံးရဲ့ မျက်စိ‌တွေ ပကတိကျန်းမာပြီး ဖက်ဒရယ်ဒီမိုကရေစီ မြန်မာနိုင်ငံတော်ကြီးကို အမြန်ဆုံး မြင်တွေ့နိုင်ပါစေကြောင်းဆုတောင်းလိုက်ပါတယ်။

နောက်တပတ်မှာတော့ စိတ်ဒဏ်ရာများမှလွတ်မြောက်ဖို့ ကြိုးစားသင့်တဲ့ နည်းလမ်း တွေကိုမျှဝေပေးသွားမှာဖြစ်ပါတယ်။

#ကျန်းမာရေးအသိပညာပေးကဏ္ဍ #ပဋိပက္ခကာလအတွင်းရှင်သန်နေထိုင်ခြင်း #ဆောင်းပါး #အမြင်မဝေဝါးစေဖို့ #ဂရုပြုရမယ့်မျက်စိကျန်းမာရေး #Ayeyarwaddy_Times

(စစ်အာဏာသိမ်းမှုကြောင့် မြန်မာနိုင်ငံ၌ဖြစ်ပေါ်နေသည့် ပဋိပက္ခကာလအတွင်း ပြည်သူများ ကျန်းမာစွာရှင်သန်နေထိုင်နိုင်ရေးအတွက် “ပဋိပက္ခကာလအတွင်း ရှင်သန် နေထိုင်ခြင်း” (ကျန်းမာရေးအသိပညာပေးအစီအစဉ်) ကို ဧရာ၀တီတိုင်းမ် သတင်းဌာန အနေဖြင့် အပတ်စဉ် တနင်္ဂနွေနေ့နှင့် ဗုဒ္ဓဟူးနေ့တိုင်းတင်ဆက်သွားမည် ဖြစ်ပါ၍ စောင့်မျှော်ကြည့်ရှုကာ ကျန်းမာရေးအသိပညာများရယူနိုင်ပါကြောင်း သတင်း ကောင်းပါး အပ်ပါသည်။)