ဇွဲနိုင်/ဧရာဝတီတိုင်းမ်
(ရေဖြူ) ၊သြဂုတ်လ ၅ ရက်
ထားဝယ် – ရန်ကုန် ပြည်ထောင်စုလမ်းမရှိ ကလိန်အောင် လမ်းပိုင်းအချို့တွင် ယမန်နေ့ ဩဂုတ် ၄ ရက်နေ့က ကားလမ်းများ ရေကျော်ကာ မော်တော်ကားများ ဖြတ်သန်းသွားလာ၍မရတော့ဘဲ လမ်းတွင် ပိတ်မိနေခဲ့ကြောင်း ယာဥ်မောင်းများထံကသိရသည်။
ရေဖြူမြို့နယ် ကလိန်အောင်မြို့ အမှတ် (၃) ရပ်ကွက်က ပြည်ထောင်စုကားလမ်းမကြီးနှင့် ရေပုံးကျေးရွာတို့တွင် ယနေ့ သြဂုတ်လ ၅ ရက်နေ့ နံနက် ၈ နာရီတွင် ရေများပြန်ကျနေ၍ ကားများပုံမှန်အတိုင်းဖြတ်သန်းသွားလာလို့ရနေပြီဖြစ်ကြောင်း ဒေသခံများထံက သိရသည်။
“ခရီးသည် တစ်ဦးက ကံပေါက် နဲ့ ထားဝယ်ကို မနေ့က နေ့ချင်းပြန်သွားတာ။ရေကြီးနေလို့ ရေပုံးကျေးရွာမှာ ညအိပ်လိုက်ရတယ်။ဒီကနေ့မနက်ပိုင်း က ရေပြန်ကျသွား လို့ အခုမနက် မှ အိမ်ပြန်ရောက်တယ်”ဟု လမ်းတွင် ပိတ်မိနေသူ ကံပေါက် ဒေသခံတစ်ဦးက ဧရာဝတီတိုင်းမ်ကိုပြောသည်။
ကလိန်အောင်မြို့ သည် တောင်ကျချောင်းရေနှင့် ကလိန်အောင်ချောင်းရေတို့ကြောင့် ရေကြီးလေ့ရှိပြီး အနိမ့်ပိုင်း ရပ်ကွက်များဖြစ်သည့် အမှတ် (၂)၊ (၃) နှင့်(၄) ရပ်ကွက်များသည် မိုးကာလတွင် ရေကြီး ရေလျှံသည့် အခြေအနေများကို ကြုံတွေ့ရလေ့ရှိကာ နေအိမ်အောက်ထပ်များအထိရေမြုပ်လေ့ရှိကြောင်း မြို့ခံများထံက သိရသည်။
“အခုတော့ ရေနည်းနည်း ပြန်ကျနေပြီ ။ညကတော့ ရုတ်တရက် ရေကြီးလာလို့ ပစ္စည်းတွေ အပေါ်ထပ်ခိုးကို အားလုံးတင်လိုက်ရတယ်။ ၁ နာရီအတွင်းမှာ ရေက တစ်ပေလောက်အထိတောင်မြင့်တက်လာတာ။အခုရေ ကျသွားတော့ ရေကြီးတုန်းက နုံးတွေ ကျန်ခဲ့တယ် “ဟု အမှတ် (၃) ရပ်ကွက်မှာနေထိုင်တဲ့ မြို့ခံတစ်ဦးကပြောသည်။
ကလိန်အောင်မြို့တွင် ရေကြီးခြင်းမရှိသည်မှာ ၂ နှစ်ခဲ့ရှိပြီဖြစ်ပြီး ယခုနှစ်မှသာ ရေကြီးခြင်းကို ရုတ်တရက် ကြုံတွေ့ရခြင်းဖြစ်သည်။
တနင်္သာရီ တိုင်းတွင် နေရာကွက်၍ မိုးကြီးနိုင်ပြီး ရွာရန် ရာနှုန်းပြည့် ရှိကြောင်း သြဂုတ်လ ၄ ရက် နေ့က မိုလေဝသနှင့် ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။
ဓာတ်ပုံ- ယနေ့ဩဂုတ်လ ၅ နံနက်ပိုင်းက ကလိန်အောင် မြို့ တွင်ရေပြန်ကျသွားသည့်မြင်ကွင်း။
#ကားလမ်းများရေ #ထားဝယ်ရန်ကုန်ကလိန်အောင်လမ်းပိုင်း #ရေပြန်ကျ #ကားများပုံမှန်သွားလာနိုင် #Ayeyarwaddy_Times
