ပုသိမ်တံတားထိပ် သံပေါင်ပေါ်ကိုတက်ရောက်ခဲ့သည့် စိတ်မမှန်သူကို စစ်ကောင်စီတပ်က ဖမ်းဆီး

ဧရာဝတီတိုင်းမ်
ဇူလိုင်လ ၂၈ ရက်

ဧရာ၀တီတိုင်း၊ ပုသိမ်မြို့တွင် ဇူလိူင်လ ၂၇ ရက်နေ့က အမှတ်(၂) ပုသိမ်မြစ်ကူးတံတား သံပေါင်ပေါ်သို့တက်ရောက်ခဲ့သူဟာ စိတ်ပုံမှန်မဟုတ်ဘဲ ကျေးရွာတစ်ခုမှရောက်ရှိလာခြင်းဖြစ်ကြောင်းသိရှိရသည်။

တံတားပေါ်ကိုတက်ရောက်ခဲ့သူမှာ ငွေဆောင်မြို့နယ်ခွဲ၊မဒေါ့ကုန်းကျေးရွာအုပ်စု ၊ဝါးတောတဲစုမှာနေထိုင်တဲ့ အသက်(၂၂)အရွယ်လပြည့်စိုး(ခ)ကြွက်နီ ဆိုသူဖြစ်ပြီး စိတ်ဝေသနာရှင်တစ်ဦးဖြစ်ကြောင်းဒေသခံများထံမှ သိရသည်။

“မီးသတ်တွေ နဲ့လူမှုရေးအဖွဲ့တွေ အမျိုးမျိုး ကြိုးစားပြီးချော့ခေါ်တော့မှ တံတားပေါ်တက်ပြီး ၃ နာရီလောက်အကြာမှာ ဆင်းလာတယ်။ အောက်မှာ လူတွေကသူ့ကိုထိုးမယ်ကြိတ်မယ်လုပ်ကြလို့ ရုတ်ရုတ်သဲသဲတွေဖြစ်သွားကြသေးတယ်” ဟု မြို့ခံတစ်ဦးက ဧရာ၀တီတိုင်းမ်ကိုပြောသည်။

မိသားစုဘက်ကမှ စိတ်ကျန်းမာရေးမကောင်းသူဟု ပြောဆိုသော်လည်း စစ်ကောင်စီလက်အောက်ခံ ရဲတပ်ဖွဲ့မှ ဖမ်းဆီးခဲ့ကြောင်း ရဲတပ်ဖွဲ့နှင့်နီးစပ်သည့်အသိုင်းအ၀န်းကသိရှိရသည်။

အဆိုပါအမျိုးသားသည် နေ့လည်ပိုင်းက ပုသိမ်တံတား အမှတ် ၂ ၏ တံတားထိပ်သံပေါင်ပေါ်သို့ တက်ရောက်သွားခြင်းဖြစ်ပြီး ပုသိမ်မြို့ခံများမှ သူတို့၏လူမှုကွန်ယက်(facebook)များမှတစ်ဆင့် ဖော်ပြရာမှ လာရောက်ကြည့်ရူသူများပြားခဲ့ကြောင်းမြို့ခံများမှ ပြောသည်။

ပြီးခဲ့သည့် ဇူလိူင်လ ၂၁ ရက်နေ့ညပိုင်းကလည်း ပုသိမ်တံတားအမှတ်၂ပေါ်မှ အသက် ၂၂ အရွယ်အမျိုးသားတစ်ဦး ခုန်ချမှုဖြစ်ပွားခဲ့ပြီး ရုပ်အလောင်းကို လေးရက်အကြာမှာပြန်လည်ရှာတွေ့ကြောင်းသိရှိရသည်။

#ပုသိမ်မြို့နယ် #တံတားသစ် #စိတ်ကျန်းမာရေးမကောင်သူ #တက်ရောက်သဖြင့် #စစ်ကောင်စီတပ်ဖမ်းဆီး #Ayeyarwaddy_Times