ဧရာဝတီတိုင်းမ်
နိုဝင်ဘာ ၁၃ ရက်
ရခိုင်ပြည်နယ်အပါအဝင် တိုင်းနှင့်ပြည်နယ် ငါးခုအတွင်းရှိ နယ်မြေ ၁၄ ခုတွင် အာရက္ခတပ်တော် (AA) က တစ်ပြိုင်နက် ပုံဖော်လာသည့် ထိုးစစ်များကို စစ်တပ်က ကြည်း၊ ရေ၊ လေ ပူးပေါင်း၍ အပြင်းအထန် ခုခံနေရသကဲ့သို့ စစ်တပ်ဘက်မှ စတင်ထိုးစစ်ဆင်သည့် စစ်မျက်နှာများတွင်လည်း အင်အားအများအပြား ပြုန်းတီးကာ တပ်ဆုတ်ခွာနေရကြောင်း စစ်ရေးသတင်းရင်းမြစ်များထံမှ သိရသည်။
လက်ရှိတွင် AA ၏ ထိုးစစ်များကို ရခိုင်ပြည်နယ်၊ မကွေးတိုင်း၊ ချင်းပြည်နယ်အစပ်၊ ပဲခူးတိုင်းအစပ်နှင့် ဧရာဝတီတိုင်းအတွင်းရှိ နယ်မြေ ၁၄ ခု၌ စစ်တပ်က ရင်ဆိုင်နေရခြင်းဖြစ်ပြီး စစ်တိုင်းဌာနချုပ် ငါးခုမှ တိုင်းမှူး ငါးဦးကိုယ်တိုင် အနီးကပ် ကွပ်ကဲနေရကြောင်း သိရသည်။
”မြို့ပြင်တပ်ရင်း၊ မြို့တွင်း ရဲတပ်ရင်းနှင့် နပခအပါအဝင်တပ်ပျက်များမှ အင်အား ၇၀၀၀ ခန့် စစ်တွေမှာ ခံစစ်ဆင်ထားတယ်” ဟု CDMဗိုလ်ကြီး ဇင်ယော်က ဧရာဝတီတိုင်းမ်ကိုပြောသည်။
ရခိုင်ပြည်နယ်အတွင်း AA သိမ်းပိုက်ထိန်းချုပ်ထားသည့် ပုဏ္ဏားကျွန်းမြို့နယ်ဘက်သို့ စစ်တပ်က ထိုးစစ်ဆင်ရာမှတစ်ဆင့် AA ၏ တန်ပြန်တိုက်စစ်ကြောင့် စစ်တပ်အနည်းငယ်သာ ထိန်းချုပ်နိုင်တော့သည့် ပြည်နယ်မြို့တော် စစ်တွေမြို့နှင့် ၆ မိုင်ခန့်သာ ကွာဝေးသည့် ကျားမသောက်ကျေးရွာအထိ တိုက်ပွဲများ နီးကပ်ရောက်ရှိလာပြီ ဖြစ်သည်။
ပုဏ္ဏားကျွန်းမြို့နယ်၊ ကွမ်းတောင်ကျေးရွာဘက်သို့ စစ်တပ်က “၄၉၂၆ စစ်ဆင်ရေး” (ခေါ်) “ရန်နိုင်အောင် စစ်ဆင်ရေး” အမည်ဖြင့် ထိုးစစ်ဆင်ခဲ့သော်လည်း အထိနာပြီး တပ်လန်သွားသဖြင့် အမြင့်ကျွန်းအထိ ပြန်လည်ဆုတ်ခွာခဲ့ရကြောင်း စစ်ရေးသတင်းရင်းမြစ်များက ဆိုသည်။
စစ်ရေးအခြေအနေ ဆိုးရွားလာမှုကြောင့် ပါဒလိတ်အခြေစိုက် (ပညရ-၁၀) တွင် အထိုင်ချကွပ်ကဲနေသည့် တပ်မ (၁၀၁) ၏ ဒုတိယတပ်မမှူးကိုယ်တိုင် တိုက်ပွဲပြင်းထန်နေသည့် အမြင့်ကျွန်းရှေ့တန်းသို့ ဆင်း၍ တိုက်ပွဲဝင်ရန် အနောက်ပိုင်းတိုင်းစစ်ဌာနချုပ် (နပခ) တိုင်းမှူးက စေခိုင်းခဲ့ရသည်အထိ အခြေအနေ ယိမ်းယိုင်နေကြောင်း သိရသည်။
ထို့အပြင် ရွှေမင်းဂံရေတပ်စခန်းနှင့် စစ်တွေမြို့အကြား အဆက်အသွယ် ပြတ်တောက်သွားနိုင်သည့် အခြေအနေကြောင့် ဆတ်ရိုးကျတံတား ပတ်ဝန်းကျင်တွင်လည်း စစ်တပ်က အင်အားများ ဖြန့်ခွဲချထားရသည်။
စစ်တွေတပ်နယ်အတွင်း AAက တန်ပြန်တိုက်စစ်ဖြင့်ထိုးစစ်ဆင်လာချိန်တွင် ပါဒလိတ်ပါရမီရင်းစုများ၊ နာရီကန်၊ တောကန်၊ ရာတန်၊ ရေချမ်းပြင်၊ ဝါဘိုစသည့် ဒကစအနီးကျေးရွာများရှိ တပ်ရင်းများအထိ တိုက်ပွဲဖြစ်လာခဲ့သည်။ ပြီးခဲ့သည့် အောက်တိုဘာ ၂၂ရက်နေ့က ဒကစအတွင်းကို AAက လက်နက်ကြီးဖြင့် ပစ်ခတ်တိုက်ခိုက်ရာ စစ်တပ်ဘက်မှ ဗိုလ်မှူးအဆင့်အရာရှိများအပါအဝင် အများအပြား သေဆုံးခဲ့သည်။
ရွှေမင်းဂံရေတပ်စခန်း တိုက်ခိုက်ခံရချိန်တွင် စစ်တပ်ဘက်မှ ငပြီကျွန်းဘက်သို့ တန်ပြန်ကမ်းတက်စစ်ဆင်ရေး ပြုလုပ်ခဲ့ရာ ပထမအကြိမ် စစ်ဆင်ရေး၌ပင် စစ်တပ်၏ တိုက်ခိုက်ရေးအင်အား ထက်ဝက်ခန့် ပြုန်းတီးခဲ့ပြီး တစ်ရက်တည်းတွင် တပ်ဖွဲ့ဝင် ၅၀ ခန့် သေဆုံးခဲ့ကြောင်း သိရသည်။ ယင်းတိုက်ပွဲအတွင်း စစ်တပ်၏ စစ်သင်္ဘော ၄ စီးအထိ တိုက်ခိုက်ဖျက်ဆီးခံခဲ့ရသည့်အပြင် စစ်တွေတပ်နယ်မှ ခမရ (၃၅၄) ယာယီတပ်ခွဲမှူးအဆင့်ရှိသူတစ်ဦးလည်း ပြင်းထန်ဒဏ်ရာ ရရှိခဲ့သည်။
ပထမအကြိမ် ကမ်းတက်စစ်ဆင်ရေး မအောင်မြင်ခဲ့သော်လည်း စစ်တပ်ဘက်မှ အင်အား ၁၈၀ ကျော်ဖြင့် ဒုတိယအကြိမ်နှင့် တတိယအကြိမ် ကမ်းတက်စစ်ဆင်ရေးများကို ဆက်လက်ပြုလုပ်နေသောကြောင့် နှစ်ဖက်တိုက်ပွဲများ ပြင်းထန်နေဆဲ ဖြစ်သည်။
တစ်ဖက်တွင်လည်း စစ်တပ်သည် ပုဏ္ဏားကျွန်းမြို့နယ်ကို ပြန်လည်ထိုးစစ်ဆင်ရန် အောက်တိုဘာလ ၂၈ ရက်နေ့မှ စတင်ကာ အင်အား ၁,၀၀၀ ခန့်ကို အသုံးပြု၍ ဒုတိယအကြိမ် ထိုးစစ်ပြန်လည် စတင်နေကြောင်း သိရသည်။
အဆိုပါ ဒုတိယအကြိမ် ထိုးစစ်တွင် စစ်တပ်၏ အထူးဒရုန်းစစ်ဆင်ရေးတပ်ဖွဲ့ဖြစ်သည့် ဒစရ (၂) ကိုပါ စေလွှတ်အသုံးပြုထားပြီး လက်ရှိတွင် အမြင့်ကျွန်းနှင့် ခမောင်းတောဘက်တို့မှ စစ်ကြောင်းများခွဲကာ စစ်ဆင်ရေး စတင်နေပြီဖြစ်ကြောင်း ဒေသတွင်း စစ်ရေးသတင်းရင်းမြစ်များထံမှ သိရှိရသည်။
ကျောက်ဖြူတပ်နယ်တွင်လည်း တောင်မော်ဦးရေတပ်၏ ကာကင်းစခန်းများရှိရာ အဝတောင်ကျေးရွာတွင် တိုက်ပွဲများပြန်ဖြစ်လာသည့်အပြင် မင်းပြင်၊ သိုင်းချောင်းစသည့် နယ်မြေများတွင်လည်း တိုက်ပွဲပြင်းထန်လာကြောင်း သိရသည်။ စနဲဘက်ကို ဦးတည်သည့် စစ်ကြောင်းများကို AAက အနီးကပ် တိုက်ခိုက် ဖြတ်တောက်ထားသည်ဟု သိရသည်။
ရခိုင်ပြည်နယ် ပြင်ပ ဧရာဝတီတိုင်းအတွင်း စစ်တပ်ပုံဖော်ခဲ့သည့် ရခိုင်တောင်ပိုင်းတစ်ခုလုံး ပိတ်ဆို့ပြီး နယ်မြေစိုးမိုးမှုရယူလိုရေး စီမံချက်မှာလည်း လုံးဝလက်လျှော့ရသည့်အခြေအနေဖြစ်ကာ ငဝန်မြစ်ကမ်းတလျှောက် တပ်ဖြန့် ခံစစ်ဆင်ရသည့် အခြေအနေရှိနေခဲ့သည်။
မေလကုန်ကာနီးမှစ၍ အောက်တိုဘာ တတိယပတ်နှင့်နောက်ဆုံးပတ်အထိ စစ်တပ်က ဧရာဝတီတိုက်ပွဲအတွင်းကို အင်အား ၂၀၀၀ မှ ၃၀၀၀ အထိသုံးထားသည်။
ထို့အပြင် သာပေါင်းနှင့် ရေကြည်အစပ်ရှိ ဘုရားကြီး၊ ကမ္ဘားကြီး၊ သဲဖြူ၊ ကင်ပွန်းချဉ်ကုန်း စသည့်စခန်းများကို ဗျူဟာမှူးများထိုင်စေပြီး နတခ ဒုတိုင်းမှူးကို ဆင်းခိုင်းပြီး အနီးကပ်ကွပ်ကဲခိုင်းထားသည်။ သို့သော် ရွှေသောင်ယံတွင် အခြေချထားသည့် တပ်မ ၆၆ လက်အောက်ခံ နည်းဗျူဟာတစ်ခုမှာ လုံးပါးပါး အင်အားပြုန်းတီးနေပြီဖြစ်ကြောင်း သိရသည်။
