မီဇိုးပြည်နယ်ရှိ မြန်မာစစ်ဘေးရှောင်များ လေ့လာနိုင်ရန်အတွက် အခြေခံမီဇိုးဘာသာစကားအစီအစဥ်ကို အပတ်စဉ်တနင်္လာနေ့တိုင်း အွန်လိုင်းကတစ်ဆင့် ထုတ်လွှင့်ပေးနေ

ဗွီအာတီ/ ဧရာဝတီတိုင်းမ်
(ချင်းပြည်နယ်)၊ သြဂုတ်လ ၄ ရက်

အိန္ဒိယနိုင်ငံ၊ မီဇိုးပြည်နယ်သို့ ရောက်ရှိနေကြသော မြန်မာစစ်ဘေးရှောင်ပြည်သူများအနေဖြင့် သိသင့်သိထိုက်သော အခြေခံမီဇိုးဘာသာစကားအစီအစဉ်ကို Youth For Myanmarက အပတ်စဉ် တနင်္လာနေ့ (အိန္ဒိယစံတော်ချိန် နံနက် ၈ နာရီနှင့် ညပိုင်း(၈)နာရီအချိန်များတွင် Youth For Myanmar (Facebook Page)အွန်လိုင်းစာမျက်နှာမှတစ်ဆင့် ထုတ်လွှင့်သင်ကြားပေးနေကြောင်း သိရသည်။

မီဇိုးပြည်နယ်သို့ ရောက်ရှိလာကြသော မြန်မာစစ်ဘေးရှောင်ပြည်သူများသည် မီဇိုးဘာသာစကားပြောဆိုနိုင်သူ နည်းပါးပြီး မီဇိုးစကားမပြောတတ်သည့်အတွက် ခရီးသွားလာခြင်း၊ ဆေးရုံသွားခြင်း၊ ဈေးဝယ်ခြင်း၊ ဒေသခံပြည်သူများနှင့် စကားပြောဆက်ဆံရာတွင် အခက်အခဲမျိုးစုံဖြင့် ရင်ဆိုင်ကြုံတွေ့နေကြသည်ဟု မြန်မာစစ်ဘေးရှောင်ပြည်သူအချို့က ဆိုသည်။

“မီဇိုးရမ်ပြည်နယ်ကို ရောက်ရှိနေကြတဲ့ မြန်မာစစ်ဘေးရှောင်ပြည်သူများအနေနဲ့ မဖြစ်မနေသိသင့်သိအပ်တဲ့ မီဇိုးဘာသာစကားအခြေခံအကြောင်းအရာလေးတွေကို Youth For Myanmar(Facebook Page)အွန်လိုင်း စာမျက်နှာပေါ်ကနေ အပတ်စဉ်ထုတ်လွှင့်သင်ကြားပေးနေတာပေါ့နော်၊ စစ်ဘေးရှောင်ပြည်သူတွေရဲ့ အခက်အခဲအများကြီးတွေထဲမှာ ဒီအစီအစဉ်လေးကို ပြုလုပ်ခြင်းအားဖြင့် ဘာသာစကားမတတ်တဲ့ အခက်အခဲကို ဖြေရှင်းနိုင်မှာ ဖြစ်တဲ့အတွက် သင်ကြားပို့ချပေးဖို့ ဆုံးဖြတ်ကြတာဖြစ်တယ်၊ သင်ကြားပေးမယ့် ဆရာမကလဲ စစ်ဘေးရှောင်ပြည်သူတွေအတွက် အရမ်းအကျိုးရှိမယ့် အစီအစဉ်တစ်ခုဖြစ်တဲ့အတွက် လိုလိုလားလားနဲ့ သဘောတူလက်ခံခဲ့ပါတယ်၊ ယခုအပတ်စဉ် ထုတ်လွှင့်နေတဲ့ မီဇိုးဘာသာစကားကို အစီအစဉ်လေးကို သေချာလေ့လာလိုက်မယ်ဆိုရင် အခုကြုံတွေ့နေရတဲ့ အခက်အခဲတွေကို ဖြေရှင်းသွားနိုင်မှာ ဖြစ်ပါတယ်” ဟု Youth For Myanmarမှ တာဝန်ခံမဝါဝါက ဧရာဝတီတိုင်းမ်ကို ပြောသည်။

စစ်ဘေးရှောင်ပြည်သူများအနေဖြင့် ငွေကြေးအသုံးပြုရာတွင် သိသင့်သိအပ်သော ကိန်းဂဏာန်းနှင့် သက်ဆိုင်သည့် အသုံးအနှုန်းများ၊ ဈေးဝယ်ယူရာတွင် သုံးနှုန်းသော ဒေသစကားအခေါ်အဝေါ်များကို သင်ကြားပို့ချပေးလျက်ရှိပြီး ဒေသခံပြည်သူနှင့် အပြန်အလှန်စကားပြောဆိုရာ နားလည်တတ်ကျွမ်းသည့်အထိ တဆင့်ပြီးတဆင့် သင်ခန်းစာများကို မြှင့်တင်ပို့ချသင်ကြားပေးသွားမည်ဖြစ်ကြောင်း သိရသည်။

Youth For Myanmarက အပတ်စဉ်ထုတ်လွှင့်နေသော အခြေခံမီဇိုးဘာသာစကားအစီအစဉ်ကို အွန်လိုင်းမှတစ်ဆင့် သင်ကြားပို့ချခြင်းဖြစ်သောကြောင့် တစ်ချို့စစ်ဘေးရှောင်စခန်းများတွင် အင်တာနက်လိုင်း မကောင်းခြင်း၊ သက်ကြီးရွယ်အိုများအနေဖြင့် နည်းပညာပိုင်းဆိုင်ရာ အခက်အခဲရှိခြင်းနှင့် ကြော်ငြာမှုအားနည်းခြင်းအခက်အခဲတို့ကြောင့် စစ်ဘေးရှောင်ပြည်သူများကြားတွင် သိရှိသူနည်းပါးလျှက်ရှိနေသည်။

“စစ်ဘေးရှောင်စခန်းတွေမှာ သွားရောက်ပြီး သင်ကြားပို့ချပေးဖို့ဆိုရင် တစ်ရက်ထဲနဲ့ သင်ခန်းစာတွေ အကုန်သင်ကြားပေးဖို့ မဖြစ်နိုင်တဲ့အတွက် ဖုန်းလိုင်းမကောင်းတဲ့ စစ်ဘေးရှောင်စခန်းတွေနဲ့ သက်ကြီးရွယ်အိုတွေအတွက် အွန်လိုင်းကနေ သင်ကြားပို့ချပေးတဲ့ အစီအစဉ်တွေကို အားတဲ့အချိန်လေ့လာနိုင်ဖို့ သက်ဆိုင်ရာစစ်ဘေးရှောင်စခန်းတွေမှာ ထောက်ပံ့မှုပေးအပ်ဖို့ သွားရောက်တဲ့အချိန်ကျရင် သူတို့ဖုန်းထဲမှာ ပြန်ထည့်ပေးထားဖို့ စီစဉ်ထားပါတယ်” ဟု Youth For Myanmar၊ တာဝန်ခံက ဆက်လက်ပြောကြားသည်။

Youth For Myanmarမှ အပတ်စဉ်တင်ဆက်ပေးသော အခြေခံမီဇိုးဘာသာစကားအစီအစဉ်ကို စစ်ဘေးရှောင်ပြည်သူတစ်ချို့က ကောင်းမွန်စွာ လေ့လာသင်ယူနေကြသလို မီဇိုးဘာသာစကားလေ့လာလို များအတွက် အကျိုးရှိကြောင်းပြောဆိုကြသည်။

“ပြီးခဲ့တဲ့ အပတ်မှာ Youth For Myanmarက အွန်လိုင်းကနေတစ်ဆင့် ကိန်းဂဏာန်းရေတွက်ခြင်း အကြောင်းအရာကို ထုတ်လွှင့်တာ လေ့လာဖြစ်တယ်ပေါ့နော်၊ မီဇိုးဘာသာစကားပြောဆိုဖို့ ခက်ခဲသူတွေအနေနဲ့ ကြည့်ရှု့လေ့လာသင့်တဲ့ အစီအစဉ်တစ်ခုပါ၊ မီဇိုးဘာသာစကားကို ဒီအတိုင်းတတ်ကျွမ်းဖို့ဆိုတာ အင်မတန်ခက်ခဲတဲ့ အရာပါ၊ ဒီအစီအစဉ်လေးတွေကို မကြာခဏကြည့်ရှု့ခြင်းအားဖြင့် မီဇိုးစကားပြောဆိုနိုင်ဖို့ ပိုမိုလွယ်ကူလာစေပြီး အများကြီးအထောက်အကူပြုပါတယ်”လို့ ကိုခမ်းတူးက ပြောသည်။

Youth For Myanmar အဖွဲ့ သည် အိန္ဒိယနိုင်ငံ၊ မီဇိုးပြည်နယ်တွင် အခြေစိုက်ကာ နွေဦးတော်လှန်ရေး ရံပုံငွေဈေးရောင်းပွဲတော်များပြုလုပ်ခြင်း၊ လူထုခေါင်းဆောင်ဒေါ်အောင်ဆန်းစုကြည်၏ မွေးနေ့အထိမ်းအမှတ် အနေဖြင့် တီရှပ်ရောင်းကာ ရံပုံငွေရှာဖွေခြင်းတို့ကို ပြုလုပ်၍ ရရှိလာသော ရံပုံငွေများကို မီဇိုးပြည်နယ်အတွင်းရှိ မြန်မာစစ်ဘေးရှောင် ပြည်သူများထံသို့ ထောက်ပံ့ပေးအပ်မှုများဆောင်ရွက်လျက်ရှိကြောင်း အဆိုပါအဖွဲ့ထံမှ သိရသည်။