ပုသိမ်တွင် မီးလောင်မှုကြောင့် စိတ်ကျန်းမာရေးမကောင်းသည့် ကလေးငယ် သေဆုံး

ဧရာဝတီတိုင်းမ်
အောက်တိုဘာလ ၂၆ ရက်

ဧရာ၀တီတိုင်း၊ ပုသိမ်မြို့၊ အမှတ် (၅) ရပ်ကွက် ၀ဏ္ဏသိင်္ဂီလမ်း၊ ဘူတာအနီးရှိ ဆိုင်ခန်းတွင် အောက်တိုဘာလ ၂၅ ရက်နေ့ နံနက်ပိုင်းက မီးလောင်မှုဖြစ်ပွားခဲ့ပြီး ပိုင်ရှင်၏ အသက် ၁၃ နှစ်အရွယ် သမီးတစ်ဦးသေဆုံးခဲ့ကြောင်း သိရှိရသည်။

မီးလောင်သေဆုံးသွားသူ မိန်းကလေးမှာ မစံခွား(ခ) ဒူးယိမ်းထက်ဖြစ်ပြီး စိတ်ကျန်းမရေး(ညဏ်ရည်မမှီ)ရောဂါနှင့် ကိုယ်အင်္ဂါသန်စွမ်းမှုမရှိသောကြောင့်ဆိုင်ခန်းအပေါ်ထပ်ခိုးတွင် မီးခြစ်ကို ဆော့ကစားရာမှ သေဆုံးမှုဖြစ်ပွားကြောင်း မြို့နယ်ရဲတပ်ဖွဲ့မှတ်တမ်းများအရသိရှိရသည်။

” သူက မီးခြစ်နဲ့ ဆော့ရင်း မွေ့ယာပေါ်ကို မီးစွဲပြီးလောင်တာ၊ သူက မသန်တော့မပြေးနိုင်တော့ဘူး။ မီးသတ်နဲ့လူမှုကယ်ဆယ်ရေး တွေရောက်လာပေမယ့်ကယ်လို့မရခဲ့ဘူး”ဟု ပုသိမ်မြို့နယ်မီးသတ်တပ်ဖွဲ့၀င်တစ်ဦးက ဧရာ၀တီတိုင်းမ်ကိုပြောသည်။

မီးလောင်မှုကြောင့် သွပ်မိုး၊ အုပ်ကာ၊ ကွန်ကရစ်ခင်းဆိုင်ခန်းရှိ ဆိုင်ခန်းအမှတ် (၁၇၈၊ ၁၇၉) ဆိုင်ခန်း (၂) ခန်း၏ (၈x၈) ပေ ထပ်ခိုးအခင်းပျဉ်နှင့်သွပ်မိုး မီးလောင်ကျွမ်းပျက်စီးခဲ့ကြောင်းမီးသတ်တပ်ဖွဲ့မှတ်တမ်းများအရသိရှိရသည်။

မီးလောင်ကျွမ်းမှုကို မီးသတ်တပ်ဖွဲ့၀င်များနှင့် လူမှုကူညီရေးအဖွဲ့များမှ နာရီ၀က်ခန့်ငြိမ်းသတ်နိုင်ခဲ့ပြီး လူသေဆုံးမှုနှင့် မီးလောင်မှုနှင့်ပတ်သတ်ပြီး ပုသိမ်နယ်‌မြေရဲစခန်းတွင် မီးလောင်မှုပုဒ်မ ၂၈၅ ဖြင့် အမှုဖွင့်ထားကြောင်း ရဲတပ်ဖွဲ့နှင့်နီးစပ်သူများထံမှ သိရှိရသည်။

ဓာတ်ပုံ – ဒေသခံပေးပို့

#ပုသိမ်မြို့ #မီးလောင်မှု #အသက်၁၃နှစ်အရွယ်မိန်းကလေး #မီးလောင်သေဆုံး #Ayeyarwaddy_Times