ဧရာဝတီတိုင်းမ်
ဇူလိုင်လ ၈ ရက်
၂၀၂၁ ခုနှစ် အောက်တိုဘာလ(၂)ရက်နေ့က မန္တလေးမြို့၌ သံဃသမဂ္ဂသပိတ်စစ်ကြောင်း ငြိမ်းချမ်းစွာ ဆန္ဒဖော်ထုတ်နေစဉ် ပစ်ခတ်ဖမ်းဆီးခံခဲ့ရသည့် သံဃာတော်(၅)ပါး နှင့် ကျောင်းသား ၃ ဦးတို့ကို စစ်ကောင်စီက ထောင်ဒဏ် ၃ နှစ်စီချမှတ်လိုက်တယ်လို့ သံဃသမဂ္ဂ – မန္တလေးထံမှ သိရပါတယ်။
သံဃာတော် ၅ ပါးဖြစ်တဲ့ ဦးသုစိတ်တ၊ ဦးသီရိန္ဒ၊ ဦးဝိလာသ၊ ဦးရေဝတ၊ ဦးဝီရိယဓမ္မ နဲ့ ကျောင်းသားတွေဖြစ်ကြတဲ့ ကိုဌေးလွင်စိုး၊ ကိုရှိုင်းအောင်၊ ကိုဝင်းမင်း တို့ကို ပုဒ်မ ၅၀၅(က)ဖြင့် မန္တလေး အိုးဘိုထောင်တရားရုံးမှ ထောင်ဒဏ် (၃)နှစ်စီ အသီးသီး ချမှတ်လိုက်တာလို့ သိရပါတယ်။
” နွေဦးရဲ့သမိုင်းကို သူတို့ကိုယ်တိုင်အကောင်းဆုံးရေးပြီး လိပ်ပြာလုံခဲ့ကြတယ်၊၊ အပြင်မှာကျန်ခဲ့တဲ့လူတွေက မပြီးဆုံးသေးတဲ့ တော်လှန်ရေးကို လက်ဆင့်ကမ်းပြီး သယ်ဆောင်သွားကြဖို့လိုအပ်ပါတယ်။ အသက်ပေးသွားကြတဲ့ အာဇာနည်တွေအတွက် အကျဉ်းကျခံနေရတဲ့ သူရဲကောင်းတွေအတွက် စစ်အာဏာရူးတွေ အမြစ်ပြတ်တဲ့အထိ ညီညီညွတ်ညွတ်နဲ့ တော်လှန်တိုက်ပွဲဝင်ကြဖို့ တိုက်တွန်းလိုက်ရပါတယ်” လို့ သံဃသမဂ္ဂ-မန္တလေး က လူမှုကွန်ရက်စာမျက်နှာမှတဆင့် ရေးသားဖော်ပြထားပါတယ်။
အာဏာသိမ်းစစ်တပ်က ဆရာတော်တွေနှင့်အတူ ကျောင်းသားတွေ ကို ၂၀၂၁ ခုနှစ် အောက်တိုဘာ (၂) ရက်နေ့တွင် ကားနဲ့တိုက်ကာ ဖမ်းဆီးခဲ့ခြင်းဖြစ်ပြီး (၁၀)လကျော်မှာ အမိန့်ချလိုက်ခြင်းဖြစ်တယ်လို့ သံဃသမဂ္ဂက ရေးသားထုတ်ပြန်ပါတယ်။
သံဃသမဂ္ဂအဖွဲ့ဝင်ဆရာတော်ဖြစ်တဲ့ ဦးပညာသီဟကိုလည်း ယခုနှစ် ဇွန်လ ၁၀ ရက်နေ့မှာ ပုဒ်မ ၅၀၅(က)ဖြင့် မန္တလေး အိုးဘိုထောင်တွင် ထောင်ဒဏ် (၃)နှစ် ချမှတ်ခံထားရပြီးဖြစ်ပါတယ်။
လက်ရှိမှာ ဦးစန္ဒိမာ (သင်္ဂဇာ) ဆရာတော်လည်း ဖေဖော်ဝါရီ(၉)ရက်နေ့ ညပိုင်းမှာ အဖမ်းခံရပြီး ယနေ့အထိ သတင်းအစအန ပျောက်လျက်ရှိနေတယ်လို့ သိရပါတယ်။
ယနေ့အချိန်အထိ မန္တလေး အိုးဘိုထောင်ထဲမှာ အာဏာသိမ်းစစ်ကောင်စီရဲ့ မတရားဖမ်းဆီးခံထားရတဲ့ သံဃသမဂ္ဂ ဆရာတော် (၈)ပါးအထိရှိနေတယ်လို့ သံဃသမဂ္ဂ – မန္တလေးရဲ့ စာရင်းတွေအရ သိရပါတယ်။
