ဧရာဝတီတိုင်းမ်
နိုဝင်ဘာ ၁၂ရက်
ကချင်လွတ်လပ်ရေးတပ်မတော် (KIA) တပ်မဟာ (၉) လက်အောက်ရှိ တပ်ရင်း၊ တပ်ဖွဲ့ အသီးသီးမှ KIA နှင့် K-PDF တပ်ဖွဲ့ဝင်များအနေဖြင့် ပြည်သူလူထုအပေါ် အနိုင်ကျင့် ဗိုလ်ကျခြင်း မပြုရန်နှင့် သာသနိက အဆောက် အအုံများအတွင်း လက်နက်ကိုင် ဝင်ရောက်ခြင်း မပြုကြရန် နိုဝင်ဘာလ ၁၀ ရက်နေ့ ရက်စွဲဖြင့် တင်းကျပ်စွာ သတိပေး တားမြစ်ကြောင်း ထုတ်ပြန်ခဲ့သည်။
အဆိုပါ ထုတ်ပြန်ချက်တွင် တော်လှန်ရေး တပ်ဖွဲ့ဝင်များအနေဖြင့် ပြည်သူ လူထုနှင့် ပေါင်းသင်း ဆက်ဆံရာတွင် ပြည်သူနှင့် KIAတပ်မတော်ကြား မလိုလားအပ်သော ပဋိပက္ခများ မဖြစ်ပေါ်စေရန်၊ ပြည်သူများ ငြိမ်းချမ်းစွာ နေထိုင်နိုင်ရေး ကာကွယ် စောင့်ရှောက်ရန် တာဝန်ရှိသည်ကို လေးစား လိုက်နာကြရန် သတိပေးထားသည်။ စည်းကမ်း ဖောက်ဖျက် ကျူးလွန်မှုများ မရှိစေရေးအတွက်လည်း အထူး တားမြစ်ထားသည်။
”ပြည်သူ့စစ်နဲ့ စစ်တပ်ဘက်က ဘုရားကျောင်းတွေထဲဝင်ပြီး တပ်စွဲတာရော စစ်သင်တန်းပေးတာရော အမျိုးမျိုးလုပ်တယ်။ PDF ဝတ်စုံတွေဝတ်ပြီး ပြည်သူတွေကို ပုံမှားရိုက် အနိုင်ကျင့်တာတွေရှိတယ်။ အဲဒါကြောင့် ထုတ်ပြန်ချက်တရားဝင်ထုတ်တာ ကွဲပြားသွားတာပေါ့” ဟု သတင်းရင်းမြစ်က ဧရာဝတီတိုင်းမ်ကို ပြောသည်။
ထို့အပြင် ပြည်သူလူထုအပေါ် အနိုင်ကျင့် ဗိုလ်ကျခြင်း၊ အတင်းအဓမ္မ စေခိုင်းခြင်း၊ အကြပ်ကိုင်ခြင်းနှင့် လမ်းခရီး သွားလာရာတွင် တပ်ဖွဲ့၏ မူဝါဒ နှင့် ဆန့်ကျင်ဘက်ဖြစ်စေသော လုပ်ရပ်များ မဖြစ်ပေါ်စေရန်အတွက် အထက်အဆင့်ဆင့်မှ ချမှတ်ထားသည့် မူဝါဒနှင့် လမ်းစဉ်များအတိုင်း တိကျစွာ လိုက်နာ ဆောင်ရွက်ကြရန်လည်း အထူး သတိပေး ထုတ်ပြန်ထားသည်။
မြို့၊ ရွာများအတွင်း ရှိနေသည့် တပ်ဖွဲ့ဝင် ရဲဘော်များနှင့် လက်နက် ကိုင်ဆောင်ထားသူများ အနေဖြင့် သမိုင်းဝင် ယဉ်ကျေးမှုနှင့် ဆက်စပ်သော နေရာများ၊ ဘုရားကျောင်းများ၊ ဘုန်းကြီးကျောင်းများနှင့် အများပြည်သူနှင့် သက်ဆိုင်သော နေရာများအတွင်း လက်နက်ကိုင်ဆောင်၍ ဝင်ရောက်ခြင်း လုံးဝ မပြုလုပ်ကြရန်လည်း ထုတ်ပြန်ချက်တွင် တားမြစ်ထားသည်။
အဆိုပါ သတိပေး ထုတ်ပြန်ချက်ကို ရှေ့တန်း၊ နောက်တန်းနှင့် ဌာနချုပ် (H.Q) ရှိ အရာရှိ၊ အရာခံ စစ်သည်များ အားလုံး တိကျစွာ လိုက်နာ ဆောင်ရွက်ကြရန် KIA တပ်မဟာ (၉) က အသိပေးထားသည်။
ပုံစာ- နန့်မွန်းခရစ်ယာန်ဘုရားကျောင်းအတွင်း စစ်သင်တန်းပေးနေသည့် SNA ရှမ်းနီပြည်သူ့စစ်များ
