စစ်တွေမြို့အနီး ၆ မိုင်အကွာအထိ AA ထိုးစစ် ရောက်ရှိလာ၊ ရွေးတုအစိုးရ၏ ရခိုင်ပြည်နယ် လွှတ်တော်ကိုပါ ရွှေ့ပြောင်းရန် စီစဉ်နေရ

‎ဧရာဝတီတိုင်းမ်
‎နိုဝင်ဘာ ၁၀ ရက်

‎ရခိုင်ပြည်နယ်၊ စစ်တွေမြို့နယ်အတွင်းရှိ ရွေးတုအစိုးရ စစ်တပ်၏ တပ်စခန်းများနှင့် ထောက်ပံ့ တပ်ရင်းများကို အာရက္ခတပ်တော် (AA) က အရှိန်အဟုန်မြှင့် ထိုးစစ်ဆင် တိုက်ခိုက်နေသဖြင့် ရေချမ်းပြင်နှင့် ပါဒလိတ် တပ်ရင်းဝန်းကျင် အပါအဝင် နေရာအများအပြား၌ တိုက်ပွဲများ အပြင်းအထန် ဖြစ်ပွားလျက်ရှိကြောင်း သိရသည်။

စစ်တပ်သည် ပုဏ္ဏားကျွန်းမြို့နယ်အတွင်းသို့ ထိုးဖောက်ဝင်ရောက်ရန် ကြိုးပမ်းခဲ့သော်လည်း ၎င်းတို့ ထိန်းချုပ်ထားဆဲဖြစ်သော စစ်တွေမြို့နယ်အတွင်းသို့ တိုက်ပွဲများ ကူးစက် ပြန့်နှံ့လာခြင်း ဖြစ်သည်။

‎”မြို့နဲ့ မိုင်အနည်းငယ်အကွာထိ စစ်ရေး ရောက်လာပြီး ဒကစ အနီးကိုလည်း ညှပ်တိုက်လာတဲ့ သဘောပေါ့။ ဝါဘိုဘက်မှာလည်း လက်နက်ကြီးသံတွေ ဆက်တိုက် ကြားနေရတယ်” ဟု မြေပြင် သတင်းရင်းမြစ်က ဧရာဝတီတိုင်းမ်ကို ပြောသည်။

လက်ရှိတွင် AA က ရေချမ်းပြင်ရှိ စစ်တပ် ကာကင်းစခန်းတစ်ခုကို တိုက်ခိုက် သိမ်းပိုက်နိုင်ခဲ့ပြီးနောက် အင်အားအမြောက်အမြားဖြင့် အခိုင်အမာ တပ်စွဲထားသည့် ရေချမ်းပြင်အနီးရှိ ထောက်ပံ့တပ်ရင်းနှင့် အနီးဝန်းကျင် စခန်းများကို ဆက်လက် ထိုးစစ်ဆင်လျက် ရှိသည်။

AA ၏ ထိုးစစ်မှာ စစ်တွေမြို့နှင့် ၆ မိုင်ခန့်သာ ကွာဝေးသည့် ကျားမသောက်ကျေးရွာအထိ ရောက်ရှိ လာပြီး ပုဏ္ဏားကျွန်း ထိုးစစ်တွင် နောက်ပြန်ဆုတ်၍ ခြေကုတ်ယူထားရသည့် စစ်တပ်စခန်း ရှိရာ အမြင့်ကျွန်းကိုလည်း အပြင်းအထန် တိုက်ခိုက်လျက် ရှိသည်။

ထို့ပြင် စစ်တွေမြို့နယ် အမြင့်ကျွန်းတံတားအနီး၊ ကျားမသောက်ကျေးရွာအနီး၊ ရွှေမင်းဂံဆိပ်ကမ်း အနီးနှင့် ပါဒလိတ်တပ်ရင်း ဝန်းကျင်တို့တွင်လည်း ယမန်နေ့ နိုဝင်ဘာ ၉ ရက်နေ့အထိ တိုက်ပွဲများ ဆက်လက် ဖြစ်ပွားခဲ့သည်။

ရွေးတုအစိုးရ စစ်တပ်ဘက်မှ စစ်တွေ-ရေချမ်းပြင် လမ်းမကြီးတစ်လျှောက်နှင့် စစ်တွေ-ပုဏ္ဏားကျွန်း လမ်းဆုံတို့၌ အမြောက်တပ်၊ ဆေးတပ်နှင့် အခြား တပ်ရင်းအများအပြား ဖြန့်ကျက်ထားသည့်အပြင် မြို့ပတ်လည်တွင် မိုင်းကွင်းများ ခင်းကာ မြို့ကို ခြံစည်းရိုး နှစ်ထပ် အခိုင်အမာ ခတ်ထားသည်။

တိုက်ပွဲများ အပြင်းအထန် ဖြစ်ပွားနေသည့် ရေချမ်းပြင်ဝန်းကျင်သည် ရွေးတုအစိုးရ၏ ရခိုင်ပြည်နယ် လွှတ်တော် အဆောက်အအုံနှင့် ၄ မိုင်နီးပါးခန့်သာ ကွာဝေးတော့သဖြင့် လုံခြုံရေးအရ လွှတ်တော်ကို အခြားနေရာသို့ ရွှေ့ပြောင်းကျင်းပရန် ပြင်ဆင်မှုများ ပြုလုပ်နေကြောင်း ဒေသတွင်း သတင်းရင်းမြစ် များထံမှ သိရသည်။

အဆိုပါ ရေချမ်းပြင်တွင် ရွေးတုအစိုးရ စစ်တပ်၏ ခြေလျင်တပ်ရင်း ခလရ-၂၇၀ တပ်စွဲထားပြီး ယခုလတ်တ လောတွင် အင်အားများ ထပ်မံတိုးချဲ့ကာ ကတုတ်ကျင်းများ တူး၍ မိုင်းများခင်းကာ ခုခံစစ် ပြင်ဆင်ထားကြောင်း သိရသည်။

ဓာတ်ပုံ-AA Info Desk (ပုံဟောင်း)